ಪೋಲೀಸರ ಸೋಗಿನಲ್ಲಿ ದುರುಳರ ಗುಂಪೊಂದು ಮಹಿಳಾ ಪಿ.ಜಿ.ಗೆ ನುಗ್ಗಿದ್ದ ಘಟನೆ ಬೆಂಗಳೂರಿನಲ್ಲಿ ನಡೆದಿದೆ. ಗುಂಪು ಪಿ.ಜಿ.ಯಲ್ಲಿ ದರೋಡೆಗೆ ಯತ್ನಿಸಿತ್ತು ಎಂದು ಹೇಳಲಾಗಿದೆ. ಗುಂಪಿನಲ್ಲಿದ್ದ 6 ಮಂದಿಯನ್ನು ಪೊಲೀಸರು ಬಂಧಿಸಿದ್ದಾರೆ.
ಬೆಂಗಳೂರಿನ ಎಚ್ಎಎಲ್ ಪೊಲೀಸ್ ಠಾಣಾ ವ್ಯಾಪ್ತಿಯ ಸ್ಪೈಸ್ ಗಾರ್ಡನ್ನ ‘ಕೋ-ಲಿವಿಂಗ್’ ಪಿ.ಜಿಯಲ್ಲಿ ಘಟನೆ ನಡೆದಿದೆ. ಪಿ.ಜಿಯಲ್ಲಿದ್ದ ಯುವತಿಯೊಬ್ಬರಿಗೆ ಪರಿಚಿತನಾಗಿದ್ದ ಯುವಕನೊಬ್ಬ ತನ್ನ ಗುಂಪಿನೊಂದಿಗೆ ಪೊಲೀಸರ ಹೆಸರು ಹೇಳಿಕೊಂಡು, ಪಿ.ಜಿ ನುಗ್ಗಿದ್ದಾರೆ ಎಂದು ಆರೋಪಿಸಲಾಗಿದೆ.
ಆರೋಪಿಗಳನ್ನು ಕೇರಳ ಮೂಲದ ನಜಾಸ್, ಸರುಣ್, ಬೆಂಗಳೂರಿನ ವಿಷ್ಣು ಕೆ.ಟಿ, ದಿವಾಕರ್, ಮಧುಕುಮಾರ್, ಕಿರಣ್ ಎಂದು ಹೆಸರಿಸಲಾಗಿದೆ.
ಪ್ರಮುಖ ಆರೋಪಿ ನಜಾಸ್ಗೆ ಪಿ.ಜಿಯಲ್ಲಿದ್ದ ಯುವತಿ ಪರಿಚಯವಾಗಿದ್ದರು. ತನ್ನ ಜನ್ಮದಿನಾಚರಣೆಗಾಗಿ ಪಿ.ಜಿಗೆ ಬರುವಂತೆ ನಜಾಸ್ಗೆ ಆಹ್ವಾನಿಸಿದ್ದರು. ಆತ ತನ್ನ ಸ್ನೇಹಿತರ ಗುಂಪಿನಿಂದಿಗೆ ಪಿ.ಜಿಯಲ್ಲಿ ನಡೆದ ಹುಟ್ಟಹಬ್ಬದ ಸಂಭ್ರಮದಲ್ಲಿ ಭಾಗಿಯಾಗಿದ್ದ. ಆದರೆ, ಕಾರ್ಯಕ್ರಮ ಮುಗಿದ ಬಳಿಕ, ನಜಾಸ್ ಮತ್ತು ಆತನ ತಂಡ ಪಿ.ಜಿಯಲ್ಲಿದ್ದ ಕೊಠಡಿಗಳಿಗೆ ತೆರಳಿ, ತಾವು ಪೊಲೀಸರೆಂದು ಹೇಳಿಕೊಂಡು, ಯುವತಿಯರ ಬಳಿಯಿದ್ದ 2 ಮೊಬೈಲ್ಗಳನ್ನು ಕಸಿದುಕೊಂಡಿದ್ದಾರೆ. ಅಲ್ಲದೆ, 5 ಲಕ್ಷ ರೂ. ಹಣಕ್ಕೆ ಬೇಡಿಕೆ ಇಟ್ಟಿದ್ದಾರೆ ಎಂದು ಆರೋಪಿಸಲಾಗಿದೆ.
ಆರೋಪಿಗಳ ವರ್ತನೆ ಕಂಡು ಅನುಮಾನಗೊಂಡ ಯುವತಿಯರು ಎಚ್ಎಎಲ್ ಪೊಲೀಸ್ ಠಾಣೆಗೆ ಕರೆ ಮಾಡಿದ್ದಾರೆ. ಆಗ, ಅದು ನಕಲಿ ಪೊಲೀಸ್ ಗ್ಯಾಂಗ್ ಎಂಬುದು ಗೊತ್ತಾಗಿದೆ. ಬಳಿಕ, ಪೊಲೀಸರು ಕಾರ್ಯಾಚರಣೆ ನಡೆಸಿದ್ದು, ಆರೋಪಿಗಳನ್ನು ಬಂಧಿಸಿದ್ದಾರೆ.
ಬಂಧತ ಆರೋಪಿಗಳಲ್ಲಿ ಒಬ್ಬನಾದ ಸರುಣ್ ಎಂಬಾತ, ಈ ಹಿಂದೆ ಹನಿಟ್ರ್ಯಾಪ್ ಪ್ರಕರಣದಲ್ಲಿ ಬಂಧಿಸಲಾಗಿತ್ತು ಎಂದು ತಿಳಿದುಬಂದಿದೆ.
