ಬೆಂಗಳೂರಿನಲ್ಲಿ ಹೊಸ ವರ್ಷಾಚರಣೆ ಸಂಭ್ರಮವು ಜನವರಿ 1ರ ಮುಂಜಾನೆ 1 ಗಂಟೆಗೆ ಮುಕ್ತಾಯಗೊಳ್ಳಬೇಕು. ನಗರದ ಹೋಟೆಲ್ಗಳು, ಪಬ್ಗಳು, ಇತರ ವಾಣಿಜ್ಯ ಸಂಸ್ಥೆಗಳು ಹಾಗೂ ಕಾರ್ಯಕ್ರಮ ಆಯೋಜಕರು ತಮ್ಮ ಸ್ಥಳಗಳಲ್ಲಿ ಸಾಮರ್ಥ್ಯಕ್ಕಿಂತ ಹೆಚ್ಚಿನ ಜನಸಂದಣಿ ಅನುಮತಿಸಬಾರದು ಎಂದು ಬೆಂಗಳೂರು ಪೊಲೀಸರು ಎಚ್ಚರಿಕೆ ನೀಡಿದ್ದಾರೆ. ಹಲವು ನಿಯಮಗಳು ಮತ್ತು ಮಾರ್ಗಸೂಚಿಗಳನ್ನು ಜಾರಿಗೆ ತಂದಿದ್ದಾರೆ.
“ಹೊಸ ವರ್ಷದ ಸಂಭ್ರಮಾಚರಣೆ ನಡೆಯುವ ಸ್ಥಳಗಳು ತುಂಬಿಸಿದ್ದರೆ, ಆಯೋಜಕರು ಪ್ರವೇಶದ್ವಾರವನ್ನು ಮುಚ್ಚಬೇಕು. ಹೌಸ್ಫುಲ್ ಎಂಬ ಫಲಕಗಳನ್ನು ಪ್ರದರ್ಶಿಸಬೇಕು. ಸಂಭ್ರಮಿಸುವವರನ್ನು ಹೊರಗೆ ಅಥವಾ ಪಾದಚಾರಿ ಮಾರ್ಗಗಳಲ್ಲಿ ಕಾಯುವಂತೆ ಮಾಡಬಾರದು” ಎಂದು ನಗರ ಪೊಲೀಸ್ ಆಯುಕ್ತ ಸೀಮಂತ್ ಕುಮಾರ್ ಸಿಂಗ್ ಹೇಳಿರುವುದಾಗಿ ವರದಿಯಾಗಿದೆ.
“ಆಚರಣೆಯ ಸಮಯದಲ್ಲಿ ಪ್ರಸಾರ ಮಾಡುವ ಹಾಡುಗಳು ಅಥವಾ ಘೋಷಣೆಗಳು ಯಾರ ಧಾರ್ಮಿಕ ಅಥವಾ ಇತರ ಭಾವನೆಗಳಿಗೆ ನೋವುಂಟು ಮಾಡಬಾರದು. ಅಲ್ಲದೆ, ವಾಣಿಜ್ಯ ಸಂಸ್ಥೆಗಳಲ್ಲಿ ಯಾವುದೇ ಪಟಾಕಿಗಳು ಅಥವಾ ಸ್ಫೋಟಕಗಳನ್ನು ಬಳಸಬಾರದು” ಎಂದಿದ್ದಾರೆ.
ಪರವಾನಗಿ ಪಡೆಯದ ಸ್ಥಳಗಳಲ್ಲಿ ಪಾರ್ಟಿ ಮಾಡುವವರು ಸಂಬಂಧಪಟ್ಟ ಅಧಿಕಾರಿಗಳಿಂದ ತಾತ್ಕಾಲಿಕ ಪರವಾನಗಿ ಪಡೆಯಬೇಕು. ಡಿಸೆಂಬರ್ 31 ರಂದು ಬೆಳಿಗ್ಗೆ 6 ಗಂಟೆಯಿಂದ ಜನವರಿ 1ರ ಬೆಳಿಗ್ಗೆ (ಮುಂಜಾನೆ) 1 ಗಂಟೆಯವರೆಗಿನ ಅವಧಿಗೆ ಪರವಾನಗಿ ನೀಡಲಾತ್ತದೆ” ಎಂದು ಅವರು ಹೇಳಿದ್ದಾರೆ.
ಯಾವುದೇ ತುರ್ತು ಪರಿಸ್ಥಿತಿಗಳಿದ್ದರೆ, 100/112ಗೆ ಡಯಲ್ ಮಾಡುವ ಮೂಲಕ ಪೊಲೀಸರನ್ನು ಸಂಪರ್ಕಿಸಬಹುದು ಎಂದಿದ್ದಾರೆ.
ಹೊಸ ವರ್ಷಾಚರಣೆಯ ನಿಯಮಗಳು
- ಹೊಸ ವರ್ಷದ ಆಚರಣೆಗಳು ಜನವರಿ 1ರ ಬೆಳಿಗ್ಗೆ 1 ಗಂಟೆಯೊಳಗೆ ಕೊನೆಗೊಳ್ಳಬೇಕು
- ಧ್ವನಿವರ್ಧಕ ಬಳಸಲು ಪ್ರತ್ಯೇಕ ಅನುಮತಿ ಪಡೆಯಬೇಕು; ಶಬ್ದ ಮಿತಿಗಳನ್ನು ಅನುಸರಿಸಬೇಕು.
- ಸಂಭ್ರಮಾಚರಣೆ ಸ್ಥಳದ ಪ್ರವೇಶವು ಅನುಮೋದಿತ ಸಾಮರ್ಥ್ಯವನ್ನು ಮೀರಬಾರದು; ಅಪ್ರಾಪ್ತ ವಯಸ್ಕರಿಗೆ ಮದ್ಯ ನೀಡುವುದನ್ನು ನಿಷೇಧಿಸಲಾಗಿದೆ.
- ಸಂಭ್ರಮಾಚರಣೆಯ ಸ್ಥಳವನ್ನು ಪ್ರವೇಶಿಸುವ ಎಲ್ಲರನ್ನೂ ಭದ್ರತಾ ತಪಾಸಣೆಗೆ ಒಳಪಡಿಸುವುದು ಕಡ್ಡಾಯ; ಅನುಮಾನಾಸ್ಪದ ವ್ಯಕ್ತಿಗಳು ಅಥವಾ ವಸ್ತುಗಳು ಕಂಡುಬಂದರೆ ವರದಿ ಮಾಡಬೇಕು.
- ಅಗ್ನಿ ಸುರಕ್ಷತೆ, ಸ್ಟ್ಯಾಂಪೀಡ್ ವಿರೋಧಿ ಕ್ರಮಗಳು ಹಾಗೂ ಬ್ಯಾಕಪ್ ಪವರ್ ಒಳಗೊಳ್ಳುವುದು ಕಡ್ಡಾಯ
- ಅಗತ್ಯವಿರುವಲ್ಲಿ ಮಹಿಳಾ ಭದ್ರತಾ ಸಿಬ್ಬಂದಿಯನ್ನು ನಿಯೋಜಿಸಬೇಕು; ಮಹಿಳೆಯರು ಮತ್ತು ಮಕ್ಕಳನ್ನು ಮಹಿಳಾ ಸಿಬ್ಬಂದಿ ಮಾತ್ರ ತಪಾಸಣೆ ಮಾಡಬೇಕು.
- ಸಿಸಿಟಿವಿ ಕ್ಯಾಮೆರಾಗಳನ್ನು ಕಡ್ಡಾಯವಾಗಿ ಅಳವಡಿಸಿಕೊಂಡಿರಬೇಕು. 30 ದಿನಗಳವರೆಗೆ ದೃಶ್ಯಗಳನ್ನು ಸಂಗ್ರಹಿಸಬೇಕು; ರಸ್ತೆಗೆ ಎದುರಾಗಿರುವ ಕ್ಯಾಮೆರಾಗಳ ಸಂಪರ್ಕವನ್ನು ಪೊಲೀಸ್ ಕಮಾಂಡ್ ಸೆಂಟರ್ಗೆ ಒದಗಿಸಬೇಕು.
- ಗೊತ್ತುಪಡಿಸಿದ ಪ್ರದೇಶಗಳಲ್ಲಿ ಮಾತ್ರ ಧೂಮಪಾನವನ್ನು ಅನುಮತಿಸಲಾಗಿದೆ; ‘ಧೂಮಪಾನ ನಿಷೇಧ/ಮಾದಕ ಪದಾರ್ಥ ನಿಷೇಧ’ ಎಂಬ ಫಲಕ ಅಳವಡಿಕೆ ಕಡ್ಡಾಯ. ರಸ್ತೆಬದಿಯ ಪಾರ್ಕಿಂಗ್ ನಿಷೇಧ
- ಪಬ್ಗಳು, ಬಾರ್ಗಳು, ಹೋಟೆಲ್ಗಳು ಅತಿಥಿಗಳ ಸುರಕ್ಷಿತ ಮರಳುವಿಕೆಯನ್ನು ಖಚಿತಪಡಿಸಿಕೊಳ್ಳಬೇಕು; PSARA- ನೋಂದಾಯಿತ ಭದ್ರತಾ ಸಿಬ್ಬಂದಿ ನಿಯೋಜನೆ ಕಡ್ಡಾಯ; ಅವರ ಐಡಿಗಳು ಮತ್ತು ಡಿಜೆ/ಬೌನ್ಸರ್ ವಿವರಗಳನ್ನು ಮುಂಚಿತವಾಗಿ ಸಲ್ಲಿಸಬೇಕು.
- ಅಕ್ರಮ ಖಾಸಗಿ ಮತ್ತು ರೇವ್ ಪಾರ್ಟಿಗಳನ್ನು ನಿಷೇಧಿಸಲಾಗಿದೆ.
- ಬೆಂಗಳೂರು ನಗರ ಪೊಲೀಸ್ QR ಕೋಡ್ಗಳನ್ನು ಎಲ್ಲ ಸ್ಥಳಗಳಲ್ಲಿ ಪ್ರದರ್ಶಿಸಬೇಕು.
