ಬೆಂಗಳೂರಿನ ಥಣಿಸಂದ್ರ ಪ್ರದೇಶದ 7 ಕಿಮೀ ಪಾದಚಾರಿ ಮಾರ್ಗ ಸಂಪೂರ್ಣ ಗುಣಮಟ್ಟದ ಮಾರ್ಗವಾಗಿದೆ. ತ್ಯಾಜ್ಯ ಮುಕ್ತ, ತಡೆ ರಹಿತ, ಸ್ವಚ್ಛ, ಸುಂದರ ಹಾಗೂ ಸರಾಗವಾಗಿ ನಡೆಯಬಹುದಾದ ಉತ್ತಮ ಗುಣಮಟ್ಟವುಳ್ಳ ಪಾದಚಾರಿ ಮಾರ್ಗವಾಗಿದ್ದು, ಇದು ನಾಗರಿಕರ ಅಚ್ಚುಮೆಚ್ಚಿನ ‘ದಿ ಬೆಸ್ಟ್’ ಪಾದಚಾರಿ ಮಾರ್ಗವಾಗಿದೆ.
ಪ್ರಾಜೆಕ್ಟ್ ವಾಕ್ಲೂರು 5ನೇ ಫುಟ್ ಪಾತ್ ವಾಕ್ ಶನಿವಾರ ಥಣಿಸಂದ್ರದಲ್ಲಿ ದೊಡ್ಡ ಮಟ್ಟದಲ್ಲಿ ನಡೆಯಿತು. ಸ್ಥಳೀಯ ನಿವಾಸಿಗಳು, ನಾಗರಿಕರು ಹಾಗೂ ಬೆಂಗಳೂರು ಉತ್ತರ ನಗರ ಪಾಲಿಕೆಯ ಅಧಿಕಾರಿ – ಸಿಬ್ಬಂದಿ ಸೇರಿದಂತೆ 100ಕ್ಕೂ ಹೆಚ್ಚು ನಡಿಗೆ ಪ್ರಿಯರು ಪಾಲ್ಗೊಂಡಿದ್ದರು.
ನಗರ ಪಾಲಿಕೆಯ ಆಯುಕ್ತರಾದ ಪೊಮ್ಮಲ ಸುನಿಲ್ ಕುಮಾರ್ ಕಾರ್ಯಕ್ರಮಕ್ಕೆ ಚಾಲನೆ ನೀಡಿದರು. ಸಂಪೂರ್ಣ ಮಾರ್ಗವನ್ನು ನಾಗರಿಕರ ಜೊತೆಗೆ ನಡೆದು ಪರಿಶೀಲಿಸಿದರು.
ಇಂದಿರಾ ಕ್ಯಾಂಟೀನ್ನಿಂದ ಬೆಳ್ಳಹಳ್ಳಿ ಕ್ರಾಸ್ವರೆಗೆ ಹಾಗೂ ನಂತರ ಹೆಗಡೆನಗರ ವೃತ್ತದವರೆಗೆ—ಒಟ್ಟು 7 ಕಿಮೀ ಪಾದಚಾರಿ ಮಾರ್ಗದಲ್ಲಿ ನಡೆಯಲಾಯಿತು.
ಪ್ರತಿ 1 ಕಿಮೀ ನಂತರ ಅಡೆತಡೆಗಳನ್ನು ದಾಖಲಿಸಿದ ಫಲಿತಾಂಶ ಹೇಗಿದೆ ಎಂದರೆ, ಕಸದ ಸ್ಥಳಗಳಿಲ್ಲ, ತೆರೆದ ಮೂತ್ರ ವಿಸರ್ಜನೆ ಸ್ಥಳಗಳಿಲ್ಲ, ಒಡೆದ ಅಥವಾ ಕಾಣೆಯಾದ ಸ್ಲ್ಯಾಬ್ ಒಂದೇ ಒಂದು ಕಂಡುಬಂದಿದೆ. 2-ವೀಲರ್ ಪಾರ್ಕಿಂಗ್ ಅಡ್ಡಿಯಿಲ್ಲ, ಏಳು ಕಿಲೋಮೀಟರ್ ಪಾದಚಾರಿ ಉದ್ದಕ್ಕೂ ಕಾರ್ ಪಾರ್ಕಿಂಗ್ ಅಡೆತಡೆ ಒಂದೇ ಕಡೆ ಇದೆ. ಅಂಗಡಿ/ವ್ಯಾಪಾರಿಗಳ ಅಡೆತಡೆಗಳು ಎರಡು ಕಡೆ ಇದ್ದರೆ, ಕಟ್ಟಡ ಸಾಮಗ್ರಿಗಳ ರಾಶಿ ಕಂಡುಬಂದಿಲ್ಲ.
ಒಟ್ಟು 7 ಕಿ.ಮೀ.ಗಳಲ್ಲಿ 7ಕ್ಕೂ ಕಡಿಮೆ ಪ್ರಮುಖ ಅಡೆತಡೆಗಳು ಮಾತ್ರ ಕಂಡುಬಂದಿದೆ. ಅವುಗಳಲ್ಲಿ ಒಂದು ಕಸ ಅಥವಾ ಮೂತ್ರ ವಿಸರ್ಜನೆ ಸ್ಥಳವಲ್ಲ ಎಂಬುದು ನಿಜಕ್ಕೂ ಮಹತ್ತರ ಸಾಧನೆಯಾಗಿದೆ.
“ಉತ್ತಮ ಪಾದಚಾರಿ ಮಾರ್ಗ ಉತ್ತರ ನಗರ ಪಾಲಿಕೆಯ ಅಧಿಕಾರಿಗಳು, ಸ್ಥಳೀಯರು ಹಾಗೂ ನಾಗರಿಕರ ಸಹಕಾರದ ನೇರ ಪರಿಣಾಮ. ಫುಟ್ ಪಾತ್ಗಳು ಸ್ವಚ್ಛವಾಗಿದ್ದು, ಅಗಲವಾಗಿವೆ. ಸುರಕ್ಷಿತವಾಗಿ ನಡೆದುಹೋಗಲು ಅನುಕೂಲವಾಗಿರುವುದು ಹೆಮ್ಮೆಯ ವಿಷಯ. BESCOM ಮೂಲಸೌಕರ್ಯಗಳಿಗೆ ಸಂಬಂಧಿಸಿದಂತೆ ಬದಲಾವಣೆ ಅಗತ್ಯವಿದ್ದು, ತಕ್ಷಣ ಕ್ರಮ ಕೈಗೊಳ್ಳಲಾಗುವುದು” ಎಂದು ಉತ್ತರ ನಗರ ಪಾಲಿಕೆ ಆಯುಕ್ತ ಪೊಮ್ಮಲ ಸುನೀಲ್ ಕುಮಾರ್ ಹೇಳಿದ್ದಾರೆ.
ಈ ಸುದ್ದಿ ಓದಿದ್ದೀರಾ? ಪಾದರಸ ಚುಚ್ಚಿ ಪತ್ನಿಯನ್ನೇ ಕೊಂದ ಪತಿ
ನವೆಂಬರ್ 1ರಂದು ಪ್ರಾರಂಭವಾದ ಪ್ರಾಜೆಕ್ಟ್ ವಾಕಲೂರು ಈಗಾಗಲೇ 33 ಕಿಮೀ ವಾಕಲೂರು ಪೂರ್ಣಗೊಳಿಸಿದೆ. ಶಿವಾಜಿನಗರ: 11K ರಾಜ್ಯೋತ್ಸವ ವಾಕ್, ಕೋರಮಂಗಲ: 5K ವಾಕ್, ಜಯನಗರ: 5K ವಾಕ್, ಬಾಣಸವಾಡಿ: 5K ವಾಕ್, ಈಗ ಥಣಿಸಂದ್ರ 7K ವಾಕ್ ಒಟ್ಟು 33 ಕಿಮೀ ವಾಕ್ ಪೂರ್ಣವಾಗಿದೆ. ಇನ್ನು ಎಲ್ಲ 5 ನಗರಪಾಲಿಕೆಗಳಲ್ಲಿ 100 ಕಿಮೀ ವಾಕ್ಥಾನ್ ಗುರಿ ಹೊಂದಿದೆ.
ನಾಗರಿಕರು ಮತ್ತು ಸರ್ಕಾರವು ಒಟ್ಟಾಗಿ ಕೆಲಸ ಮಾಡಿದಾಗ ಫಲಿತಾಂಶ ಹೇಗೆ ಅದ್ಭುತವಾಗಬಹುದು ಎಂಬುದಕ್ಕೆ ಇದು ಉದಾಹರಣೆಯಾಗಿದೆ. ಇದು ಪ್ರದೇಶಕ್ಕೆ, ನಗರಕ್ಕೆ ಹೆಮ್ಮೆ ತರುವ ಸಾಧನೆ ಎಂದು ಪ್ರಾಜೆಕ್ಟ್ ವಾಕಲೂರು ಸಂಯೋಜಕರಾದ ಅರುಣ್ ಪೈ ತಿಳಿಸಿದರು.
