ಅಲ್ಲಮ ತನ್ನ ವಚನಗಳಲ್ಲಿ ಬಳಸಿರುವ ವಿಶಿಷ್ಟವಾದ 101 ಪದಗಳನ್ನು ಗುರುತಿಸಿ, ಪ್ರತಿ ಪದದ ಬಗ್ಗೆ ಈ ಕೆಳಗಿನ ಮಾದರಿಯಲ್ಲಿ ವಿವರಿಸಲಾಗುವುದು. ಈದಿನ ಓದುಗರಿಗಾಗಿ ಅಲ್ಲಮನ ಅರಿವು…
ಯಂತ್ರವಾಹಕ
ಅಕಲ್ಪಿತ ನಿತ್ಯ ನಿರಂಜನ ನಿಸ್ಸೀಮ ನಿರವಯ ಅಖಂಡ ಪರಿಪೂರ್ಣ ಪರಂಜ್ಯೋತಿಯಾದ ಮಹಾ ಘನವಸ್ತುವಿನಲ್ಲಿ ಪರಮಾತ್ಮನುತ್ಪತ್ತಿ. ಆ ಪರಮಾತ್ಮನಿಂದ ಅಂತರಾತ್ಮನುತ್ಪತ್ತಿ.
ಆ ಅಂತರಾತ್ಮನಿಂದ ಜೀವಾತ್ಮನುತ್ಪತ್ತಿ.
ಈ ತ್ರಯಾತ್ಮರೊಳಗೆ ಜೀವ-ಅಂತರಾತ್ಮಾದಿಗಳೆ ಪಾಶಬದ್ಧರು. ಪರಮಾತ್ಮನೆ ಪಾಶಮುಕ್ತನು.
ಈ ಸಂಚವನರಿದ ದ್ವಂದ್ವರಹಿತ ತಾನೆ
ನಮ್ಮ ಗುಹೇಶ್ವರಲಿಂಗದಲ್ಲಿ ಯಂತ್ರವಾಹಕನೆನಿಸುವನು.
ವಚನಾರ್ಥ:
ಇಲ್ಲಿ ಮೂರು ರೀತಿಯ ಆತ್ಮಕಲ್ಪನೆಗಳ ಬಗ್ಗೆ ಚರ್ಚೆಯಿದೆ. ಪರಮಾತ್ಮ, ಅಂತರಾತ್ಮ ಮತ್ತು ಜೀವಾತ್ಮ. ಮೊದಲು ಪರಮಾತ್ಮನು, ಪರಮಾತ್ಮನಿಂದ ಅಂತರಾತ್ಮನು, ಅಂತರಾತ್ಮನಿಂದ ಜೀವಾತ್ಮನು ಉತ್ಪತ್ತಿಯಾದರು. ಉತ್ಪತ್ತಿ ಅಂದರೆ ಸಂಪೂರ್ಣ ಹೊಸ ಹುಟ್ಟು ಎಂದು ಅರ್ಥೈಸದೆ ಅದನ್ನು ಉಗಮ ಅಥವಾ ವಿಕಾಸ ಎಂದು ಹೇಳಬಹುದು. ಪರಮಾತ್ಮನು ಜೀವದಲ್ಲಿ ಬೆರೆತು ಅಂತರಾತ್ಮನಾಗುತ್ತಾನೆ. ನಂತರ ಜೀವಾತ್ಮವಾಗಿ ವಿಕಸಿತಗೊಳ್ಳುತ್ತಾನೆ. ದೇಹವನ್ನು ತೊಟ್ಟವನು ಜೀವಾತ್ಮ. ಈ ಮೂರರಲ್ಲಿ ಪರಮಾತ್ಮನು ಪಾಶಮುಕ್ತನು. ಪರಮಾತ್ಮನಿಗೆ ಪಾಶವೆಂಬ ಸಂಕೋಲೆ ಇಲ್ಲ. ಅಂತರಾತ್ಮ ಮತ್ತು ಜೀವಾತ್ಮರು ಪಾಶಗಳನ್ನು ಕಟ್ಟಿಕೊಂಡವರು. ಇಂದ್ರಿಯ ಪ್ರಲೋಭನೆಗಳಿಗೆ ಒಳಪಟ್ಟವರು. “ಪಾಶಗಳು ಹೊರಗೆ, ಕೊಂಡಿಗಳು ನಮ್ಮೊಳಗಿಹುವು ಮಂಕುತಿಮ್ಮ” ಎಂಬ ಕಗ್ಗ ನುಡಿಯಿದೆ. ನಮ್ಮಲ್ಲಿ ನಾವು ಸೃಷ್ಟಿಸಿಕೊಂಡಿರುವ ಕೊಂಡಿಗಳು ಯಾರೋ ಹೊರಗಿಂದ ಬೀಸುವ ಪಾಶಕ್ಕೆ ಸಿಕ್ಕಿಕೊಂಡು ಜೀವಾತ್ಮ ಬಳಲುತ್ತಾನೆ. ಇದೊಂದು ಸಂಚು ಎಂದು ಅಲ್ಲಮನ ಅಭಿಪ್ರಾಯ. ಈ ಸಂಚನ್ನು ಅರಿತ ಶರಣ ಯಾವುದೇ ದ್ವಂದ್ವಕ್ಕೆ ಒಳಗಾಗದೆ ಗುಹೇಶ್ವರಲಿಂಗದಲ್ಲಿ ಯಂತ್ರವಾಹಕನೆನಿಸುವನು.
ಪದಪ್ರಯೋಗಾರ್ಥ:
ವಾಹಕ ಅಂದರೆ ಒಂದು ವಸ್ತುವನ್ನು ನಿರ್ದಿಷ್ಟ ಪಥದಲ್ಲಿ ಚಲಿಸುವಂತೆ ಅನುವು ಮಾಡಿಕೊಡುವ ವ್ಯವಸ್ಥೆ. ಉದಾಹರಣೆಗೆ ವಿದ್ಯುತ್ ತಂತಿಗಳು. ಅವು ವಿದ್ಯುತ್ತನ್ನು ಒಂದೆಡೆಗೆ ಚಲಿಸುವಂತೆ ಮಾಡುವ ವಾಹಕಗಳು. ಯಂತ್ರವಾಹಕ ಅಂದರೆ ಜಡ ಯಂತ್ರವನ್ನು ಕಾರ್ಯತತ್ಪರ ಮಾಡುವ ಚಾಲಕ ಶಕ್ತಿ. ಆ ಶಕ್ತಿ ವ್ಯಕ್ತವೂ ಆಗಿರಬಹುದು, ಅವ್ಯಕ್ತವೂ ಆಗಿರಬಹುದು. ಆಧ್ಯಾತ್ಮಿಕ ಅರ್ಥದಲ್ಲಿ ಅಂತಹ ಶಕ್ತಿ ಅಗಮ್ಯ, ಅಗೋಚರ, ಅಪ್ರತಿಮ. ರಾಮಕೃಷ್ಣ ಪರಮಹಂಸರ ವಚನ ವೇದದಲ್ಲಿ ಇಂಥದೊಂದು ಅದ್ಭುತ ಪರಿಕಲ್ಪನೆ ಬರುತ್ತದೆ. “ಅವನೇ ಚಾಲಕ ಶಕ್ತಿ ನಾನೊಂದು ಯಂತ್ರ, ನಾನೊಂದು ಬರಿಯ ಮನೆ ಅವನಿದರ ಒಡೆಯ, ನಾನೊಂದು ಉಪಕರಣ ಅವನದರ ಶಿಲ್ಪಿ, ನಾನೊಂದು ರಥವಾಗೆ ಅವನದರ ರಥಿಕ, ಅವನಡೆಸೆ ನಾನಡೆವೆ ಅವನದೀ ಲೋಕ.” ರಾಮಕೃಷ್ಣ ಪರಮಹಂಸರ ಯಂತ್ರ ವಾಹಕ ಚಿಂತನೆಯನ್ನು ಕನ್ನಡದಲ್ಲಿ ಪ್ರಸ್ತುತಪಡಿಸಿದವರು ಕುವೆಂಪು. ಜೀವಾತ್ಮನ ದೇಹವೆಂಬ ಯಂತ್ರದಲ್ಲಿ ದ್ವಂದ್ವವಿಲ್ಲದ ಚಿಂತನೆಯೇ ವಾಹಕವಾಗಿ ದೈವತ್ವದೆಡೆಗೆ ಶರಣನನ್ನು ಕೊಂಡೊಯ್ಯುವ ಸಾಧನವಾಗುವುದನ್ನು ಅಲ್ಲಮ ಇಲ್ಲಿ ಯಂತ್ರವಾಹಕ ಎಂಬ ಪದಪ್ರಯೋಗದ ಮೂಲಕ ಪ್ರಸ್ತುತಪಡಿಸಿರುವುದು ಗಮನಾರ್ಹ.
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಸಾಯದ ಸಂಚು
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಅನುಪಮಸುಖಿ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ನೀರಲಾದ ನಿರ್ಮಿತಂಗಳು
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಹೊದಕುಳಿ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಅನುಪಮಸುಖಿ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಆಶಾಪಾಶ ವಿರಹಿತರು
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಮಡದಿಯರ ಒಲುಮೆ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಬಗೆದು ಬಿತ್ತಿದ ಬ್ರಹ್ಮಬೀಜ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ತಾನಿದ್ದಲ್ಲಿ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ನಿದ್ರೆಯೆಂಬ ಕಾಳೋರಗ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಕೀಲು ಮಡಗಿದಾತ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಮಾದುದು ಮಾದುದಲ್ಲ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಮಾಯದ ಮಂಜು
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ದಳದುಳಿ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಬಯಲು
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ನಷ್ಟಸಂತಾನ
ಹರಿಹರ ಶಿವಕುಮಾರ್
ಲೇಖಕ, ವೃತ್ತಿಯಿಂದ ಚಾರ್ಟರ್ಡ್ ಅಕೌಂಟೆಂಟ್. ಲೆಕ್ಕಪರಿಶೋಧನೆ ಮತ್ತು ತೆರಿಗೆ ವಿಚಾರಗಳಲ್ಲಿ ಪರಿಣತಿ. ಕನ್ನಡದಲ್ಲಿ ಕಂಪ್ಯೂಟರ್ ಬಳಕೆ ಇವರ ಹವ್ಯಾಸ. ಕನ್ನಡ ಭಾಷೆ ಮತ್ತು ಸಾಹಿತ್ಯದಲ್ಲಿ ಆಸಕ್ತರು. ಶಿವಮೊಗ್ಗ ಜಿಲ್ಲೆಯವರು, ಸದ್ಯ ಬೆಂಗಳೂರಿನಲ್ಲಿ ನೆಲೆ.
