ಅಲ್ಲಮ ತನ್ನ ವಚನಗಳಲ್ಲಿ ಬಳಸಿರುವ ವಿಶಿಷ್ಟವಾದ 101 ಪದಗಳನ್ನು ಗುರುತಿಸಿ, ಪ್ರತಿ ಪದದ ಬಗ್ಗೆ ಈ ಕೆಳಗಿನ ಮಾದರಿಯಲ್ಲಿ ವಿವರಿಸಲಾಗುವುದು. ಈದಿನ ಓದುಗರಿಗಾಗಿ ಅಲ್ಲಮನ ಅರಿವು…
ಸಾವ
ಇಂದು ಸಾವ ಹೆಂಡತಿಗೆ,
ನಾಳೆ ಸಾವ ಗಂಡನವ್ವಾ!
ಗಳಿಗೆಗಳಿಗೆಗೆ ಮಗು ಹುಟ್ಟಿ
ಕೈ ಬಾಯ್ಗೆ ಬಂದಿತ್ತವ್ವಾ!
ಅರಿವು ಕುರುಹನು ಮರವೆ ನುಂಗಿತ್ತು; ಗುಹೇಶ್ವರನುಳಿದನವ್ವಾ!
ವಚನಾರ್ಥ:
ಹೆಂಡತಿ ಎಂಬುದು ಸ್ತ್ರೀಲಿಂಗ. ಸ್ತ್ರೀ ಎಂದರೆ ಪ್ರಕೃತಿ. ಈ ದೇಹ ಪ್ರಕೃತಿದತ್ತವಾದುದು. ಗಂಡ ಎಂಬುದು ಪುಲ್ಲಿಂಗ. ಪುಲ್ಲಿಂಗ ಎಂದರೆ ಪುರುಷ. ಪುರುಷ ಎಂದರೆ ಆತ್ಮ. ಈ ದೇಹವನ್ನು ಆತ್ಮ ನಿಯಂತ್ರಿಸುತ್ತದೆ. ಹೆಂಡತಿ ಮತ್ತು ಗಂಡನ ಸಂಬಂಧದಂತೆ ದೇಹ ಮತ್ತು ಜೀವಾತ್ಮ. ಇಂದು ದೇಹಕ್ಕೆ ಅಂದರೆ ಹೆಂಡತಿಗೆ ಅಜ್ಞಾನವೆಂಬ ಸಾವು ಸಂಭವಿಸಿದರೆ ನಾಳೆ ಎಂದರೆ ಅದರ ಪರಿಣಾಮವಾಗಿ ಆತ್ಮಕ್ಕೆ ಅಂದರೆ ಗಂಡನಿಗೆ ಅನುಭಾವದ ಸಾವಾಗುತ್ತದೆ. ಹೀಗೆ ಸಾವಾಗುವ ಮುನ್ನ ನಡೆಯುವ ನಿರಂತರ ಜೀವ ಸಂಸಾರದಲ್ಲಿ ದಿನನಿತ್ಯ ಮಗುವಿನ ಜನನವಾಗುತ್ತಿರುತ್ತದೆ. ಆ ಮಗು ಯಾರೆಂದರೆ ಜೀವಪ್ರಜ್ಞೆ. ಆ ಪ್ರಜ್ಞೆ ಕೈಗೆ ಬರುತ್ತದೆ. ಅಂದರೆ ನಮ್ಮ ನಡೆಯಲ್ಲಿ ವ್ಯಕ್ತವಾಗುತ್ತದೆ. ಆ ಪ್ರಜ್ಞೆ ಬಾಯಿಗೆ ಬರುತ್ತದೆ. ಅಂದರೆ ನಮ್ಮ ನುಡಿಯಲ್ಲಿ ವ್ಯಕ್ತವಾಗುತ್ತದೆ. ಅಜ್ಞಾನವೆಂಬ ಮರವೆಯನ್ನು ಜ್ಞಾನದ ಕುರುಹು ನುಂಗುತ್ತದೆ. ಜೀವಾತ್ಮನಿಗೆ ತಾನು ಬೇರೆ ಅಲ್ಲ, ನಾನು ಲಿಂಗದ ಭಾಗ ಎಂಬ ತಿಳಿವು ಮೂಡುತ್ತದೆ. ಕೊನೆಯಲ್ಲಿ ಎಲ್ಲವೂ ಅಳಿದು ಗುಹೇಶ್ವರನೊಬ್ಬನೇ ಉಳಿಯುತ್ತಾನೆ.
ಪದ ಪ್ರಯೋಗಾರ್ಥ:
ಸಾವು, ಸಾಯುವ ಎಂಬುದರ ಪರಿಣಾಮಿ ಪದವೇ ಸಾವ. ಇಂದು ಸಾಯುವ ಹೆಂಡತಿಗೆ, ನಾಳೆ ಸಾಯುವ ಗಂಡನವ್ವಾ ಎಂದು ಸಹಜವಾಗಿ ಬರೆಯುವ ಸಂದರ್ಭದಲ್ಲಿ “ಇಂದು ಸಾವ ಹೆಂಡತಿಗೆ ನಾಳೆ ಸಾವ ಗಂಡನವ್ವಾ!” ಎಂದು ವಚನದಲ್ಲಿ ಬರೆದಿದ್ದು ಅಲ್ಲಮಪ್ರಭುವಿಗೆ ಕನ್ನಡ ಭಾಷೆಯ ವಿಭಿನ್ನ ಪದ ಬಳಕೆಯ ಮೇಲಿದ್ದ ಪ್ರಭುತ್ವವನ್ನು ತೋರಿಸುತ್ತದೆ. ಸಾವು ಎಂಬುದು ನಾಮಪದ. ಸಾವ ಎಂಬುದು ಕ್ರಿಯಾಪದ. ಹುಟ್ಟು, ಉಳಿವು, ಸಾವು ಎಂಬ ಜೀವನದ ಪ್ರಮುಖ ಘಟ್ಟಗಳನ್ನು ಆರು ಸಾಲಿನ ವಚನದಲ್ಲಿ ಹಿಡಿದಿಟ್ಟು ತೋರಿಸಿರುವ ದರ್ಶನ ಮತ್ತು ಪದ ಚಮತ್ಕಾರ ಈ ವಚನದಲ್ಲಿದೆ. “ಎಲ್ಲ ಎಲ್ಲವನರಿಯ ಬಹುದು; ಸಾವನರಿಯ ಬಾರದು. ಸರ್ವವಿದ್ಯೆ ಸಕಲವ್ಯಾಪ್ತಿಯನರಿಯ ಬಹುದು; ಸಾವನರಿಯ ಬಾರದು. ಶಿವ ಶಿವಾ, ಈ ಸಾವನರಿಯದೀ ಲೋಕ! ಗುಹೇಶ್ವರಾ” ಎಂದು ಅಲ್ಲಮ ಸಾವಿನ ಬಗ್ಗೆ ವ್ಯಾಖ್ಯಾನ ಮಾಡಿದ ವಚನವಿದೆ. ಇಂದು ಸಾವ ಹೆಂಡತಿಗೆ, ನಾಳೆ ಸಾವ ಗಂಡನವ್ವಾ! ವಚನಕ್ಕೆ ಕನ್ನಡದ ಖ್ಯಾತ ಜಾನಪದ ಗಾಯಕ ಬಾನಂದೂರು ಕೆಂಪಯ್ಯನವರು ಉತ್ತಮವಾಗಿ ರಾಗ ಸಂಯೋಜಿಸಿದ್ದಾರೆ.
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಸಾಯದ ಸಂಚು
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಅನುಪಮಸುಖಿ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ನೀರಲಾದ ನಿರ್ಮಿತಂಗಳು
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಹೊದಕುಳಿ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಅನುಪಮಸುಖಿ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಆಶಾಪಾಶ ವಿರಹಿತರು
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಮಡದಿಯರ ಒಲುಮೆ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಬಗೆದು ಬಿತ್ತಿದ ಬ್ರಹ್ಮಬೀಜ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ತಾನಿದ್ದಲ್ಲಿ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ನಿದ್ರೆಯೆಂಬ ಕಾಳೋರಗ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಕೀಲು ಮಡಗಿದಾತ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಮಾದುದು ಮಾದುದಲ್ಲ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಮಾಯದ ಮಂಜು
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ದಳದುಳಿ
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ಬಯಲು
ಇದನ್ನು ಓದಿದ್ದೀರಾ?: ಅಲ್ಲಮನ ಅನನ್ಯ ಪದಪ್ರಯೋಗಗಳು | ನಷ್ಟಸಂತಾನ
ಹರಿಹರ ಶಿವಕುಮಾರ್
ಲೇಖಕ, ವೃತ್ತಿಯಿಂದ ಚಾರ್ಟರ್ಡ್ ಅಕೌಂಟೆಂಟ್. ಲೆಕ್ಕಪರಿಶೋಧನೆ ಮತ್ತು ತೆರಿಗೆ ವಿಚಾರಗಳಲ್ಲಿ ಪರಿಣತಿ. ಕನ್ನಡದಲ್ಲಿ ಕಂಪ್ಯೂಟರ್ ಬಳಕೆ ಇವರ ಹವ್ಯಾಸ. ಕನ್ನಡ ಭಾಷೆ ಮತ್ತು ಸಾಹಿತ್ಯದಲ್ಲಿ ಆಸಕ್ತರು. ಶಿವಮೊಗ್ಗ ಜಿಲ್ಲೆಯವರು, ಸದ್ಯ ಬೆಂಗಳೂರಿನಲ್ಲಿ ನೆಲೆ.
