ದೇಶಾದ್ಯಂತ ಭಾರೀ ಸಂಚಲನ ಮೂಡಿಸಿದ್ದ ʼಧುರಂಧರ್ʼನ ಮುಂದುವರೆದ ಭಾಗ ‘ಧುರಂಧರ್: ದಿ ರಿವೆಂಜ್’ ಬಿಡುಗಡೆಗೆ ಸಿದ್ಧವಾಗಿದ್ದು, ಚಿತ್ರದ ರನ್ ಟೈಮ್ ಕೂಡ ಬಹಿರಂಗವಾಗಿದೆ.
ಆದಿತ್ಯ ಧರ್ ನಿರ್ದೇಶಿಸಿ ರಣವೀರ್ ನಾಯಕನಾಗಿ ಕಾಣಿಸಿಕೊಂಡಿರುವ ಈ ಚಿತ್ರಕ್ಕೆ ಕೇಂದ್ರೀಯ ಚಲನಚಿತ್ರ ಪ್ರಮಾಣೀಕರಣ ಮಂಡಳಿಯು (CBFC), ‘A’ (ವಯಸ್ಕರಿಗೆ ಮಾತ್ರ) ಪ್ರಮಾಣ ಪತ್ರ ನೀಡಿದೆ. ಜೊತೆಗೆ ಸುಮಾರು 21 ಕಡೆ ಕತ್ತರಿ ಪ್ರಯೋಗ ಮಾಡಿದೆ ಎಂದು ವರದಿಯಾಗಿದೆ. ಚಿತ್ರದ ರನ್ ಟೈಮ್ ಬರೋಬ್ಬರಿ 3 ಗಂಟೆ, 49 ನಿಮಿಷ ಮತ್ತು 6 ಸೆಕೆಂಡ್ ಇರಲಿದೆ ಎಂದು ನಿರ್ಮಾಪಕರು ಅಧಿಕೃತವಾಗಿ ಘೋಷಿಸಿದ್ದಾರೆ.
ನಾಳೆ (ಮಾ.19) ಬಿಡುಗಡೆಯಾಗಲಿರುವ ಚಿತ್ರದ ಮುಂಗಡ ಬುಕಿಂಗ್ ಮಾ.14 ರಂದೇ ಆರಂಭವಾಗಿದ್ದು, ಬಿಡುಗಡೆಗೂ ಮುನ್ನ ಭಾರೀ ಸೌಂಡ್ ಮಾಡುತ್ತಿದೆ. ಮಾರ್ಚ್ 18 ರಂದು ನಿಗದಿಯಾಗಿರುವ ‘ಪೇಯ್ಡ್ ಪ್ರಿವ್ಯೂ’ (Paid Previews) ಶೋಗಳ ಟಿಕೆಟ್ಗಳು ಕಳೆದ ವಾರವೇ ಮಾರಾಟವಾಗಿವೆ.
ಟ್ರೇಡ್ ಟ್ರ್ಯಾಕರ್ ‘ಸ್ಯಾಕ್ನಿಲ್ಕ್’ (Sacnilk) ವರದಿಯ ಪ್ರಕಾರ, ವಿದೇಶಿ ಮಾರುಕಟ್ಟೆಯಲ್ಲೂ ಸ್ಪೈ ಥ್ರಿಲ್ಲರ್ ಕಥಾಹಂದರ ಹೊಂದಿರುವ ಈ ಚಿತ್ರಕ್ಕೆ ಭರ್ಜರಿ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಅಮೆರಿಕದಲ್ಲಿ ಸುಮಾರು 678 ಸ್ಥಳಗಳ 1,684 ಶೋಗಳಿಂದ ಈಗಾಗಲೇ 61,491 ಟಿಕೆಟ್ಗಳು ಮಾರಾಟವಾಗಿದ್ದು, ಸುಮಾರು 9,82,374 ಯುಎಸ್ ಡಾಲರ್ ಸಂಗ್ರಹವಾಗಿದೆ.
ರಣವೀರ್ ಸಿಂಗ್ ಅವರ ಭಾರತೀಯ ಗೂಢಾಚಾರಿ ಹಮ್ಜಾ (ಜಸ್ಕಿರತ್ ಸಿಂಗ್ ರಂಗಿ) ಪಾತ್ರ ಈ ಸೀಕ್ವೆಲ್ನಲ್ಲಿ ಮರುಕಳಿಸಲಿದೆ. ಚಿತ್ರದಲ್ಲಿ ಸಂಜಯ್ ದತ್, ಅರ್ಜುನ್ ರಾಂಪಾಲ್ ಮತ್ತು ಸಾರಾ ಅರ್ಜುನ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಕಳೆದ ವರ್ಷ ಡಿಸೆಂಬರ್ನಲ್ಲಿ ಬಿಡುಗಡೆಯಾಗಿದ್ದ ಮೊದಲ ಭಾಗ ‘ಧುರಂಧರ್’ ವಿಶ್ವಾದ್ಯಂತ ಸುಮಾರು 1300 ಕೋಟಿ ರೂಪಾಯಿ ಗಳಿಸಿತ್ತು, ಹೀಗಾಗಿ ಈ ಎರಡನೇ ಭಾಗದ ಮೇಲೂ ಹೆಚ್ಚಿನ ನಿರೀಕ್ಷೆಗಳಿವೆ.
ಇದನ್ನೂ ಓದಿ: ‘ಸರ್ಸೆ ಸರ್ಸೆ ನಿನ್ನ ಸೆರಗ ಸರ್ಸೆ’ ಹಾಡಿಗೆ ಆಕ್ರೋಶ: ತಕ್ಷಣ ಕ್ರಮಕ್ಕೆ ಮಹಿಳಾಪರ ಸಂಘಟನೆಗಳ ಆಗ್ರಹ
ಜಿಯೋ ಸ್ಟುಡಿಯೋಸ್ ಮತ್ತು B62 ಸ್ಟುಡಿಯೋಸ್ ನಿರ್ಮಾಣದ ಈ ಚಿತ್ರಕ್ಕೆ ಜ್ಯೋತಿ ದೇಶಪಾಂಡೆ ಮತ್ತು ಲೋಕೇಶ್ ಧರ್ ಕೂಡ ಹಣ ಹೂಡಿದ್ದಾರೆ. ‘ಧುರಂಧರ್: ದಿ ರಿವೆಂಜ್’ ಹಿಂದಿ, ತಮಿಳು, ತೆಲುಗು, ಮಲಯಾಳಂ ಮತ್ತು ಕನ್ನಡ ಸೇರಿದಂತೆ ಐದು ಭಾಷೆಗಳಲ್ಲಿ ಬಿಡುಗಡೆಯಾಗುತ್ತಿದೆ.
