ಪ್ರತಿಷ್ಠಿತ ಆಸ್ಕರ್ ಪ್ರಶಸ್ತಿ ರೇಸ್ನಲ್ಲಿರುವ (ಶಾರ್ಟ್ಲಿಸ್ಟ್) ನೀರಜ್ ಘಾಯ್ವಾನ್ ನಿರ್ದೇಶನದ ‘ಹೋಮ್ಬೌಂಡ್’ ಸಿನಿಮಾ ಇದೀಗ ಕಾನೂನು ಸಂಕಷ್ಟದಲ್ಲಿ ಸಿಲುಕಿದೆ. ತಮ್ಮ ಕಾದಂಬರಿಯನ್ನು ಕದ್ದು ಈ ಸಿನಿಮಾ ಮಾಡಲಾಗಿದೆ ಎಂದು ಆರೋಪಿಸಿ ಪತ್ರಕರ್ತೆ ಹಾಗೂ ಲೇಖಕಿ ಪೂಜಾ ಚಂಗೋಯಿವಾಲಾ ಅವರು ಧರ್ಮ ಪ್ರೊಡಕ್ಷನ್ಸ್ ಮತ್ತು ನೆಟ್ಫ್ಲಿಕ್ಸ್ ವಿರುದ್ಧ ಕಾನೂನು ಸಮರ ಸಾರಿದ್ದಾರೆ.
2021ರಲ್ಲಿ ಪ್ರಕಟವಾದ ತಮ್ಮದೇ ಹೆಸರಿನ ‘ಹೋಮ್ಬೌಂಡ್’ ಕಾದಂಬರಿಯನ್ನು ಚಿತ್ರತಂಡ ಅಕ್ರಮವಾಗಿ ಬಳಸಿಕೊಂಡಿದೆ ಎಂಬುದು ಪೂಜಾ ಅವರ ಆರೋಪವಾಗಿದೆ.
ಶೀರ್ಷಿಕೆ ಮತ್ತು ಕಥೆಯೂ ಕಳವು: ಲೇಖಕಿ ಆರೋಪ
ಈ ಕುರಿತು ಮಾಧ್ಯಮವೊಂದಕ್ಕೆ ಪ್ರತಿಕ್ರಿಯಿಸಿರುವ ಪೂಜಾ, “ನನ್ನ ವಕೀಲರು ನಿರ್ಮಾಣ ಸಂಸ್ಥೆಗೆ ನೋಟಿಸ್ ನೀಡಿದ್ದರೂ ಅವರು ಅದನ್ನು ಕಡೆಗಣಿಸಿದ್ದಾರೆ. ಹೀಗಾಗಿ ಕಾನೂನು ಕ್ರಮ ಅನಿವಾರ್ಯವಾಯಿತು,” ಎಂದು ತಿಳಿಸಿದ್ದಾರೆ. 2020ರ ಕೋವಿಡ್ ಲಾಕ್ಡೌನ್ ಸಂದರ್ಭದ ವಲಸೆ ಕಾರ್ಮಿಕರ ದುರಂತವೇ ತಮ್ಮ ಕಾದಂಬರಿ ಮತ್ತು ಈ ಸಿನಿಮಾ ಎರಡರ ವಿಷಯವಸ್ತುವಾಗಿದೆ. ಆದರೆ, ಹೋಲಿಕೆ ಕೇವಲ ವಿಷಯಕ್ಕೆ ಸೀಮಿತವಾಗಿಲ್ಲ ಎಂದು ಅವರು ದೂರಿದ್ದಾರೆ.
”ಚಿತ್ರವನ್ನು ವೀಕ್ಷಿಸಿದಾಗ, ನಿರ್ಮಾಪಕರು ಕೇವಲ ನನ್ನ ಪುಸ್ತಕದ ಶೀರ್ಷಿಕೆಯನ್ನು ಮಾತ್ರ ಬಳಸಿಕೊಂಡಿಲ್ಲ, ಬದಲಾಗಿ ಸಿನಿಮಾದ ದ್ವಿತೀಯಾರ್ಧದಲ್ಲಿ ನನ್ನ ಕಾದಂಬರಿಯ ಬಹುತೇಕ ದೃಶ್ಯಗಳು, ಸಂಭಾಷಣೆ, ನಿರೂಪಣಾ ಶೈಲಿ ಮತ್ತು ಘಟನಾವಳಿಗಳನ್ನು ಯಥಾವತ್ತಾಗಿ ಬಳಸಿಕೊಂಡಿದ್ದಾರೆ ಎಂಬುದು ವೇದ್ಯವಾಯಿತು,” ಎಂದು ಪೂಜಾ ಗಂಭೀರ ಆರೋಪ ಮಾಡಿದ್ದಾರೆ.
ಅಕ್ಟೋಬರ್ 15ರಂದೇ ಧರ್ಮ ಪ್ರೊಡಕ್ಷನ್ಸ್ಗೆ ಲೀಗಲ್ ನೋಟಿಸ್ ಕಳುಹಿಸಿ, ದೃಶ್ಯವಾರು ಕೃತಿಚೌರ್ಯದ ವಿವರ ನೀಡಲಾಗಿತ್ತು. ಆದರೆ ನಿರ್ಮಾಣ ಸಂಸ್ಥೆ ಉಲ್ಲಂಘನೆಯನ್ನು ಒಪ್ಪಿಕೊಳ್ಳಲು ನಿರಾಕರಿಸಿದೆ. ತಮ್ಮ ಕಾದಂಬರಿ 2021ರಲ್ಲಿ ಪ್ರಕಟವಾಗಿದ್ದರೆ, ಚಿತ್ರದ ಸ್ಕ್ರಿಪ್ಟ್ ಸಿದ್ಧವಾಗಿದ್ದು 2022ರಲ್ಲಿ. ಹೀಗಾಗಿ ಒಂದೇ ಶೀರ್ಷಿಕೆ ಮತ್ತು ಕಥೆಯ ಸಾಮ್ಯತೆ ಕಾಕತಾಳೀಯವಲ್ಲ ಎಂಬುದು ಲೇಖಕಿಯ ವಾದವಾಗಿದೆ.
ಇದನ್ನು ಓದಿದ್ದೀರಾ? ಬಂಗಾಳದ ಅಂಗಳದಲ್ಲಿ ‘ಮೆಸ್ಸಿ’ ಆಕರ್ಷಣೆ: ದಾದಾ-ಬಾದ್ಷಾ ಸಾಥ್, ಅಭಿಮಾನಿಗಳ ಪಾಲಿಗೆ ಹಬ್ಬ
ಚಿತ್ರದ ವಿತರಣೆಗೆ ತಡೆ ನೀಡುವುದು, ಕೃತಿಚೌರ್ಯ ಮಾಡಲಾದ ದೃಶ್ಯಗಳನ್ನು ತೆಗೆದುಹಾಕುವುದು, ಶೀರ್ಷಿಕೆ ಬದಲಾವಣೆ ಹಾಗೂ ಹಕ್ಕುಸ್ವಾಮ್ಯ ಉಲ್ಲಂಘನೆಗಾಗಿ ಸೂಕ್ತ ಪರಿಹಾರ ನೀಡಬೇಕೆಂದು ಲೇಖಕಿ ಆಗ್ರಹಿಸಿದ್ದಾರೆ. “ಬಲಿಷ್ಠ ಸಂಸ್ಥೆಗಳ ವಿರುದ್ಧ ಹೋರಾಡುವುದು ಕಷ್ಟ ಎಂದು ತಿಳಿದಿದ್ದರೂ, ಲೇಖಕರ ಹಕ್ಕಿಗಾಗಿ ಈ ನಿರ್ಧಾರ ಕೈಗೊಂಡಿದ್ದೇನೆ,” ಎಂದು ಅವರು ಹೇಳಿದ್ದಾರೆ.
ಆಸ್ಕರ್ ಮೇಲೆ ಕರಾಳ ಛಾಯೆ?
‘ಹೋಮ್ಬೌಂಡ್’ ಚಿತ್ರವು 2025ರ ಕಾನ್ ಫಿಲ್ಮ್ ಫೆಸ್ಟಿವಲ್ ಮತ್ತು ಟೊರೊಂಟೊ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವಗಳಲ್ಲಿ ಪ್ರದರ್ಶನಗೊಂಡು ಮೆಚ್ಚುಗೆ ಗಳಿಸಿತ್ತು. ಇತ್ತೀಚೆಗೆ 98ನೇ ಆಸ್ಕರ್ ಪ್ರಶಸ್ತಿಯ ‘ಅತ್ಯುತ್ತಮ ಅಂತಾರಾಷ್ಟ್ರೀಯ ಫೀಚರ್ ಫಿಲ್ಮ್’ ವಿಭಾಗಕ್ಕೆ ಶಾರ್ಟ್ಲಿಸ್ಟ್ ಆಗಿರುವ ಬೆನ್ನಲ್ಲೇ ಈ ವಿವಾದ ಭುಗಿಲೆದ್ದಿದೆ. ಸದ್ಯ ಧರ್ಮ ಪ್ರೊಡಕ್ಷನ್ಸ್ ಈ ಬಗ್ಗೆ ಯಾವುದೇ ಅಧಿಕೃತ ಹೇಳಿಕೆ ಬಿಡುಗಡೆ ಮಾಡಿಲ್ಲ.
