ಸೌಜನ್ಯ ಪರ ಹೋರಾಟಗಾರ ಮಹೇಶ್ ಶೆಟ್ಟಿ ತಿಮರೋಡಿ ಅವರನ್ನು ಗಡಿಪಾರು ಮಾಡಬೇಕೆಂದು ದುರುದ್ದೇಶಪೂರಿತ ಪ್ರಕರಣಗಳನ್ನು ದಾಖಲಿಸಲಾಗಿದೆ. ನ್ಯಾಯಾಲಯಕ್ಕೆ ಸುಳ್ಳು ಮಾಹಿತಿಯುಳ್ಳ ವರದಿ ನೀಡಲಾಗಿದೆ ಎಂದು ಬಂಟ್ವಾಳ ಡಿವೈಎಸ್ಪಿ ವ್ಯಾಲೆಂಟೈನ್ ಡಿ’ಸೋಜಾ ವಿರುದ್ಧ ಗಂಭೀರ ಆರೋಪ ಕೇಳಿಬಂದಿದೆ. ನ್ಯಾಯಾಲಯದ ದಾರಿ ತಪ್ಪಿಸಿರುವ ಡಿವೈಎಸ್ಪಿ ವಿರುದ್ಧ ಕ್ರಮ ಕೈಗೊಳ್ಳಬೇಕೆಂದು ‘ನೇಟಿವ್ ಎಂಪವರಿಂಗ್ ಅಂಡ್ ಎಕ್ಯುಪಿಂಗ್ ಟೀಮ್ ಫಾರ್ ಹೋಪ್ ಅಂಡ್ ಇಟರ್ಯಾಕ್ಷನ್’ (ನೀತಿ) ಸಂಸ್ಥೆ ಒತ್ತಾಯಿಸಿದೆ.
ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರಿಗೆ ಪತ್ರ ಬರೆದಿರುವ ‘ನೀತಿ’ ಸಂಸ್ಥೆ, “ತಿಮರೋಡಿ ಅವರನ್ನು ಗಡಿಪಾರು ಮಾಡುವ ಸಂಚಿನಲ್ಲಿ ಡಿವೈಎಸ್ಪಿ ವ್ಯಾಲೆಂಟೈನ್ ಡಿ’ಸೋಜಾ ಅವರು ನೇರವಾಗಿ ಭಾಗಿಯಾಗಿದ್ದಾರೆ. ಅವರು ಪುತ್ತೂರು ಉಪ ವಿಭಾಗದ ಸಹಾಯಕ ಆಯುಕ್ತರ ನ್ಯಾಯಾಲಯಕ್ಕೆ ಸುಳ್ಳು ಮಾಹಿತಿಯುಳ್ಳ ವರದಿ ನೀಡಿದ್ದು, ನ್ಯಾಯಾಲಯವು ತಿಮರೋಡಿ ಅವರ ವಿರುದ್ಧ ಗಡಿಪಾರು ಆದೇಶ ನೀಡುವಂತೆ ಪ್ರಭಾವ ಬೀರಿದ್ದಾರೆ” ಎಂದು ಆರೋಪಿಸಿದೆ.
“ತಿಮರೋಡಿ ಅವರ ವಿರುದ್ಧ ಒಟ್ಟು 26 ಪ್ರಕರಣಗಳಿದ್ದವು. ಆ ಪೈಕಿ, ನ್ಯಾಯಾಲಯದ ಆದೇಶದಂತೆ 16 ಪ್ರಕರಣಗಳು ಖುಲಾಸೆಗೊಂಡಿದ್ದು, ಕೇವಲ 10 ಪ್ರಕರಣಗಳು ಮಾತ್ರವೇ ಬಾಕಿ ಇವೆ. ಆದರೆ, ಡಿ’ಸೋಜಾ ಅವರು 13 ಪ್ರಕರಣಗಳು ಖುಲಾಸೆಗೊಂಡಿವೆ. ಇನ್ನೂ 13 ಪ್ರಕರಣಗಳು ಬಾಕಿ ಇವೆ ಎಂಬುದಾಗಿ ಸುಳ್ಳು ವರದಿ ನೀಡಿದ್ದಾರೆ. ಜೊತೆಗೆ, ದುರುದ್ದೇಶದಿಂದ ಕೆಲವು ಪ್ರಕರಣಗಳನ್ನು ದಾಖಲಿಸಿದ್ದಾರೆ. ಬೆಳ್ತಂಗಡಿ ಪೊಲೀಸ್ ಠಾಣೆಯ ಉಪ ಪೊಲೀಸ್ ಅಧಿಕಾರಿ ನೀಡಿರುವ ವರದಿ ಪತ್ರವನ್ನು ಗಣನೆಗೆ ತೆಗೆದುಕೊಳ್ಳದೆ ನಿಯಮ ಉಲ್ಲಂಘನೆ ಮಾಡಿದ್ದಾರೆ. ನ್ಯಾಯಾಲಯಕ್ಕೆ ತಪ್ಪು ಮಾಹಿತಿಯುಳ್ಳು ವರದಿ ಸಲ್ಲಿಸಿದ್ದಾರೆ” ಎಂದು ಆರೋಪಿಸಿದೆ.
ಈ ಲೇಖನ ಓದಿದ್ದೀರಾ?: ಕೋಟ್ಯಂತರ ರೂಪಾಯಿ ಗುರುದಕ್ಷಿಣೆ ಲೆಕ್ಕ ಕೊಡದ ‘ಸಂಘ’ವೇ ಸ್ವಯಂ ಭ್ರಷ್ಟವಾಗಿದೆ
“ತಿಮರೋಡಿ ಅವರು ತಮ್ಮ ವಿರುದ್ಧದ ಪಿರ್ಯಾದಿದಾರರು (ದೂರುದಾರ) ಮತ್ತು ಸಾಕ್ಷಿದಾರರ ಮೇಲೆ ದರ್ಪ ಮತ್ತು ರೌಡಿ ಪ್ರವೃತ್ತಿಯಿಂದ ಹೆದರಿಸಿದ್ದಾರೆ ಎಂದು ಡಿವೈಎಸ್ಪಿ ವರದಿಯಲ್ಲಿ ಉಲ್ಲೇಖಿಸಿದ್ದಾರೆ. ಆದರೆ, ಈ ಬೆದರಿಕೆ ಆರೋಪಗಳಿಗೆ ಸಂಬಂಧಿಸಿದಂತೆ ದೂರುದಾರರು ನೀಡಿದ ದೂರು ಅಥವಾ ಪೊಲೀಸರು ಖುದ್ದು ದಾಖಲಿಸಿಕೊಂಡ ‘ಸುವೋಮೋಟೊ’ ಪ್ರಕರಣ ಮತ್ತು ತನಿಖೆ ನಡೆಸಿದ ವರದಿಯ ಕುರಿತು ಯಾವುದೇ ಮಾಹಿತಿ/ದಾಖಲೆ ನೀಡಲಾಗಿಲ್ಲ” ಎಂದು ‘ನೀತಿ’ ಸಂಸ್ಥೆ ಗಮನ ಸೆಳೆದಿದೆ.
“ಸಂವಿಧಾನದ ಅಡಿಯಲ್ಲಿ ಸಾರ್ವಜನಿಕ ಸೇವೆಯಲ್ಲಿ ಇದ್ದುಕೊಂಡು, ನ್ಯಾಯಾಲಯದ ಗೌರವಕ್ಕೆ ಧಕ್ಕೆ ಉಂಟುಮಾಡಿರುವ, ಜನರಲ್ಲಿ ಗೊಂದಲ ಸೃಷ್ಟಿಸಿರುವ, ದುರುದ್ದೇಶಪೂರಿತ ಅಸಂಬದ್ಧ ವರದಿ ನೀಡಿರುವ ಹಾಗೂ ಸುಳ್ಳು ಆರೋಪಗಳ ಮೂಲಕ ಗಡಿಪಾರು ಆದೇಶ ನೀಡುವಂತೆ ಎ.ಸಿ ನ್ಯಾಯಾಲಯಕ್ಕೆ ಒತ್ತಡ ಹಾಕಿರುವ ಡಿವೈಎಸ್ಪಿ ವಿರುದ್ಧ ಕ್ರಮ ಕೈಗೊಳ್ಳಬೇಕು” ಎಂದು ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರಿಗಗೆ ‘ನೀತಿ’ ಸಂಸ್ಥೆ ಮನವಿ ಮಾಡಿದೆ.
