ಬೆಂಗಳೂರು ಬಳಿಯ, ಬನ್ನೇರುಘಟ್ಟ ರಾಷ್ಟ್ರೀಯ ಉದ್ಯಾನವನದ ಪರಿಸರ ಸೂಕ್ಷ್ಮ ವಲಯವನ್ನು (ಇಎಸ್ಝಡ್) ದುರ್ಬಲಗೊಳಿಸುವ ಕರ್ನಾಟಕ ಸರ್ಕಾರದ 2020ರ ಅಧಿಸೂಚನೆಯನ್ನು ಹಿಂತೆಗೆದುಕೊಳ್ಳಬೇಕು. 2016ರ ಕರಡು ಅಧಿಸೂಚನೆಯಲ್ಲಿ ಪ್ರಸ್ತಾಪಿಸಲಾದ ವಿಶಾಲ ಇಎಸ್ಝಡ್ಅನ್ನು 6 ತಿಂಗಳೊಳಗೆ ಮರುಸ್ಥಾಪಿಸಬೇಕು ಎಂದು ಕೇಂದ್ರ ಸಬಲೀಕರಣ ಸಮಿತಿ (ಸೆಂಟ್ರಲ್ ಎಂಪರ್ವ್ಡ್ ಕಮಿಟಿ – ಸಿಇಸಿ) ಶಿಫಾರಸು ಮಾಡಿದೆ. ಇದು, ಕರ್ನಾಟಕ ಸರ್ಕಾರಕ್ಕೆ ಬಹುದೊಡ್ಡ ಹೊಡೆತ ನೀಡಿದೆ.
ಸರ್ಕಾರದ ಅಧಿಸೂಚನೆಗಳು ಬನ್ನೇರುಘಟ್ಟ ರಾಷ್ಟ್ರೀಯ ಉದ್ಯಾನವನದ (ಬಿಎನ್ಪಿ) ಗಡಿಯ ಸುತ್ತಲಿನ ಇಎಸ್ಝಡ್ ವ್ಯಾಪ್ತಿಯನ್ನು ಕಡಿಮೆ ಮಾಡುತ್ತವೆ ಎಂದು ಆರೋಪಿಸಿ ಕೆಬಿ ಬೆಳ್ಳಿಯಪ್ಪ ಮತ್ತು ಇತರರು ಸಿಇಸಿಗೆ ಅರ್ಜಿ ಸಲ್ಲಿಸಿದ್ದರು. ಆ ಅರ್ಜಿಗಳ ಆಧಾರದಲ್ಲಿ ಸಿಇಸಿ ಬನ್ನೇರುಘಟ್ಟ ರಾಷ್ಟ್ರೀಯ ಉದ್ಯಾನಕ್ಕೆ ಭೇಟಿ ನೀಡಿ, ಪರಿಶೀಲನೆ ನಡೆಸಿತ್ತು. ಇದೀಗ, ತನ್ನ ವರದಿಯಲ್ಲಿ ಬಿಡುಗಡೆ ಮಾಡಿದೆ.
2017ರಲ್ಲಿ ಇಎಸ್ಝಡ್ಅನ್ನು ಬಿಎನ್ಪಿಯ ಗಡಿಯಿಂದ 100 ಮೀಟರ್ನಿಂದ 4.5 ಕಿ.ಮೀ.ವರೆಗೆ ವಿಸ್ತರಿಸಲು ಪ್ರಸ್ತಾಪಿಸಲಾಗಿತ್ತು. ಆದರೆ, 2020ರ ಅಧಿಸೂಚನೆಯ ಪ್ರಕಾರ ಇಎಸ್ಝಡ್ಅನ್ನು 100 ಮೀಟರ್ನಿಂದ 1 ಕಿ.ಮೀ.ಗೆ ಕಡಿತಗೊಳಿಸಲಾಗಿದೆ. ಇದರ ಪರಿಣಾಮವಾಗಿ, ಇಎಸ್ಝಡ್ ಅಡಿಯಲ್ಲಿ ಒಟ್ಟು ವಿಸ್ತೀರ್ಣ 268.96 ಚದರ ಕಿ.ಮೀ.ನಿಂದ 168.84 ಚದರ ಕಿ.ಮೀ.ಗೆ ಕುಸಿದಿದೆ. ಇದು ಬಫರ್ ವಲಯದ ಸುಮಾರು 100 ಚದರ ಕಿ.ಮೀ. ವಲಯಕ್ಕೆ ನೀಡಲಾಗಿದ್ದ ರಕ್ಷಣೆಯನ್ನು ತೆಗೆದುಹಾಕುತ್ತದೆ ಎಂದು ಅರ್ಜಿದಾರರು ವಾದಿಸಿದ್ದರು.
“ಇಎಸ್ಝಡ್ ಮತ್ತು ಬಫರ್ ವಲಯದ ದುರ್ಬಲಗೊಳಿಸುವಿಕೆಯು ಭೂಮಿಯ ದೊಡ್ಡ ಪ್ರಮಾಣದ ವಾಣಿಜ್ಯೀಕರಣಕ್ಕೆ ಕಾರಣವಾಗಿದೆ. ಪರಿಣಾಮವಾಗಿ ರೆಸಾರ್ಟ್ಗಳು ಅಣಬೆಗಳಂತೆ ಹುಟ್ಟಿಕೊಂಡಿವೆ. ಇಎಸ್ಝಡ್ ಸಮೀಪದಲ್ಲಿ ಅನಿಯಂತ್ರಿತ ಕಲ್ಲು ಗಣಿಗಾರಿಕೆಯೂ ನಡೆದಿದೆ. ರೈತರು ತಮ್ಮ ಭೂಮಿಯನ್ನು ಲೇಔಟ್ಗಳಿಗಾಗಿ ಮಾರಾಟ ಮಾಡುವಂತೆ ಒತ್ತಡ ಹೇರಲಾಗಿದೆ” ಎಂದು ಅರ್ಜಿದಾರರು ಆರೋಪಿಸಿದ್ದಾರೆ.
ಈ ಲೇಖನ ಓದಿದ್ದೀರಾ?: ದೇವರಾಜ ಅರಸು-ಸಿದ್ದರಾಮಯ್ಯ | ಸಾಮಾಜಿಕ ನ್ಯಾಯದ ನಿಜ ಹರಿಕಾರ ಯಾರು?
ಕರ್ನಾಟಕ ಮತ್ತು ತಮಿಳುನಾಡಿನ ಮೂರು ವನ್ಯಜೀವಿ ಅಭಯಾರಣ್ಯಗಳೊಂದಿಗೆ ಬಿಎನ್ಪಿ ಸುಮಾರು 3,000 ಚದರ ಕಿ.ಮೀ. ವಿಸ್ತೀರ್ಣದ ಅರಣ್ಯ ಸಂಕೀರ್ಣವನ್ನು ಹೊಂದಿದೆ. ಇದು ಕಾಲೋಚಿತವಾಗಿ 100 ಆನೆಗಳಿಗೆ ಆಶ್ರಯ ನೀಡುತ್ತದೆ. ಕರಡಿಕ್ಕಲ್-ಮಾದೇಶ್ವರ ಕಾರಿಡಾರ್, ತಾಲಿ-ಬಿಲಿಕಲ್ ಕಾರಿಡಾರ್ ಹಾಗೂ ಬಿಲಿಕಲ್-ಜೋಳಗಿರಿ ಕಾರಿಡಾರ್ ಅನ್ನು ಸಂಪರ್ಕಿಸುವ ಮೂರು ಆನೆ ಕಾರಿಡಾರ್ಗಳನ್ನು ಒಳಗೊಂಡಿದೆ. ಪರಿಸರ ಮತ್ತು ಅರಣ್ಯ ಸಚಿವಾಲಯದ (MoEF) 2011ರ ಮಾರ್ಗಸೂಚಿಗಳು ಹೇಳುವಂತೆ, ವನ್ಯಜೀವಿ ಕಾರಿಡಾರ್ಗಳ ಭಾಗವಾಗಿದ್ದರೆ ಕಂದಾಯ ಪ್ರದೇಶಗಳು ಕೂಡ ಇಎಸ್ಝಡ್ನ ಭಾಗವಾಗಿರಬೇಕು” ಎಂದು ಸಿಇಸಿ ವರದಿ ಸ್ಪಷ್ಟವಾಗಿ ಹೇಳಿದೆ.
“2016ರ ಕರಡು ಅಧಿಸೂಚನೆಯಲ್ಲಿ ಪ್ರಸ್ತಾಪಿಸಲಾದ 268.96 ಚದರ ಕಿ.ಮೀ.ನ ಮೂಲ ಇಎಸ್ಝಡ್ ವ್ಯಾಪ್ತಿಯನ್ನು ಸಂಪೂರ್ಣವಾಗಿ ಪುನಃಸ್ಥಾಪಿಸಬೇಕು. ಇದನ್ನು ಆರು ತಿಂಗಳಲ್ಲಿ ಪೂರ್ಣಗೊಳಿಸಬೇಕು” ಎಂದು ಕರ್ನಾಟಕ ಸರ್ಕಾರಕ್ಕೆ ಸಿಇಸಿ ತಾಕೀತು ಮಾಡಿದೆ.
“2011ರ ಇಎಸ್ಝಡ್ ಮಾರ್ಗಸೂಚಿಗಳನ್ನು ಅನುಸರಿಸಲು ಸರ್ಕಾರ ವಿಫಲವಾದ ಕಾರಣ ಸೂಕ್ಷ್ಮ ಪ್ರದೇಶಕ್ಕೆ ಗಂಭೀರ ಹಾನಿಯಾಗಿದೆ. 4.5 ಕಿ.ಮೀ. ಬಫರ್ ವಲಯದೊಳಗೆ ಸಂಭವಿಸಿರುವ ಹಾನಿಯನ್ನು ಸರ್ಕಾರ ನಿರ್ಣಯಿಸಬೇಕು. ಹೆಚ್ಚಿನ ಹಾನಿ ಮತ್ತು ಮಾನವ-ವನ್ಯಜೀವಿ ಸಂಘರ್ಷಗಳನ್ನು ತಡೆಗಟ್ಟಲು ಇಡೀ ಭೂಪ್ರದೇಶವನ್ನು ಮರುಸ್ಥಾಪಿಸಬೇಕು” ಎಂದು ಎಂದು ಪರಿಸರವಾದಿ ಕಿರಣ್ ಉರ್ಸ್ ಹೇಳಿದ್ದಾರೆ.
