ರಂಗ ಆರಾಧನಾ ಸಾಂಸ್ಕೃತಿಕ ಸಂಘಟನೆಯಿಂದ ಪ್ರತಿ ವರ್ಷ ನೀಡಲಾಗುವ ರಂಗ ಆರಾಧಕ ಹಾಗೂ ರಂಗ ಚಂದ್ರ ಪ್ರಶಸ್ತಿಗಳನ್ನು ಈ ಬಾರಿ ಮೂರು ದಶಕಗಳಿಗೂ ಅಧಿಕ ಕಾಲ ರಂಗಭೂಮಿಯಲ್ಲಿ ತೊಡಗಿಸಿಕೊಂಡಿರುವ ಸಾಧಕರಿಗೆ ಪ್ರದಾನ ಮಾಡಲಾಗುತ್ತಿದೆ.
ಶ್ರೀಯುತ ರುದ್ರಪ್ಪ ರಾಜಪ್ಪ ಶಿಂಧೆ ಅವರು ನೀಡುವ ರಂಗ ಆರಾಧಕ ಪ್ರಶಸ್ತಿ ಹಾಗೂ ದಿವಂಗತ ಹಿರಿಯ ನ್ಯಾಯವಾದಿ ವ್ಹಿ.ಆರ್.ಕಾರದಗಿ ಅವರ ಸ್ಮರಣಾರ್ಥ ನೀಡುವ ರಂಗ ಆರಾಧಕ ಪ್ರಶಸ್ತಿಗೆ ಧಾರವಾಡದ ರಂಗಕರ್ಮಿ ದಂಪತಿಗಳಾದ ಗೊಂಬೆ ಮನೆಯ ಡಾ.ಪ್ರಕಾಶ ಗರುಡ ಮತ್ತು ಶ್ರೀಮತಿ ರಜನಿ ಪ್ರಕಾಶ ಗರುಡ ಅವರು ಆಯ್ಕೆಯಾಗಿದ್ದಾರೆ.
ರಂಗ ಆರಾಧನಾ ಸಂಸ್ಥೆಯ ಹಿರಿಯ ಪೋಷಕರಾದ ದಿವಂಗತ ಚಂದ್ರಕಾಂತ ಸುಳ್ಳದ ಅವರ ಸ್ಮರಣಾರ್ಥ ನೀಡುವ ರಂಗ ಚಂದ್ರ ಪ್ರಶಸ್ತಿಗೆ ಧಾರವಾಡದ ಜಾನಪದ ಸಂಶೋಧನಾ ಕೇಂದ್ರದ ಶ್ರೀಮತಿ ವಿಶ್ವೇಶ್ವರಿ ಬಸಲಿಂಗಯ್ಯ ಹಿರೇಮಠ ಅವರು ಭಾಜನರಾಗಿದ್ದಾರೆ. ಪ್ರತಿ ಪ್ರಶಸ್ತಿಯು ರೂ.5,000 ನಗದು ಹಾಗೂ ಸ್ಮರಣ ಫಲಕವನ್ನು ಒಳಗೊಂಡಿದೆ. ಪ್ರಶಸ್ತಿ ಪ್ರದಾನ ಸಮಾರಂಭವು ನಾಟಕೋತ್ಸವದ ಮೊದಲ ದಿನ ನಡೆಯಲಿದೆ.
ಈ ವರ್ಷದ ಪರಸಗಡ ನಾಟಕೋತ್ಸವವು ಜನವರಿ 24 ರಿಂದ ಫೆಬ್ರವರಿ 2ರವರೆಗೆ ಹತ್ತು ದಿನಗಳ ಕಾಲ ನಡೆಯಲಿದೆ. ಉತ್ಸವದಲ್ಲಿ ರಂಗ ಆರಾಧನಾ ಸಾಂಸ್ಕೃತಿಕ ಸಂಘಟನೆಯಿಂದ ಬಿರುಕು, ಮಾಂತಮಲ್ಲಯ್ಯ; ರಂಗಾಯಣ ಧಾರವಾಡದಿಂದ ಕಂದಗಲ್ಲರಿಗೆ ನಮಸ್ಕಾರ (ಕಂದಗಲ್ಲ ಭಾರತ); ಬೆಳಗಾವಿಯ ವೇನಾಸಂ ತಂಡದಿಂದ ಸಾಹೇಬರು ಸಾಕದ ನಾಯಿ; ಉಡುಪಿಯ ಕೊಡವೂರು ಸುಮನಸಾ ತಂಡದಿಂದ ಈದಿ ಹಾಗೂ ಶಿಕಾರಿ; ಧಾರವಾಡದ ರಂಗ ಸಾಮ್ರಾಟ ರಂಗಶಾಲೆಯಿಂದ ಅಪ್ಪ ಅವ್ವ.ಕಾಮ್ ನಾಟಕಗಳು ಪ್ರದರ್ಶನಗೊಳ್ಳಲಿವೆ.
ಇದಲ್ಲದೆ ಶಿವ ಸಂಚಾರ ಸಾಣೇಹಳ್ಳಿಯಿಂದ ಜಂಗಮದೆಡೆಗೆ, ಶಿವಯೋಗಿ ಸಿದ್ದರಾಮೇಶ್ವರ ಮತ್ತು ಕಳ್ಳರ ಸಂತೆ ನಾಟಕಗಳು ಪ್ರದರ್ಶನಗೊಳ್ಳಲಿದ್ದು ಶಿವಯೋಗಿ ಸಿದ್ದರಾಮೇಶ್ವರ ನಾಟಕವು ನಾಡೋಜ ನಾಟ್ಯ ಭೂಷಣ ಏಣಗಿ ಬಾಳಪ್ಪನವರ ಸ್ಮರಣಾರ್ಥ ಪ್ರದರ್ಶನಗೊಳ್ಳಲಿದೆ ಎಂದು ಸಂಘಟನೆಯ ಅಧ್ಯಕ್ಷ ಶ್ರೀನಿವಾಸ ಗದಗ ತಿಳಿಸಿದ್ದಾರೆ.
