ಬೆಳಗಾವಿ ಜಿಲ್ಲೆಯ ಮೂಡಲಗಿ ತಾಲೂಕು ಅರಳಿಮಟ್ಟಿ ಗ್ರಾಮದಲ್ಲಿ ವಿದ್ಯುತ್ ತಂತಿ ಬಿದ್ದು ಮೂರು ಎಮ್ಮೆಗಳು ಹಾಗೂ ಒಂದು ಕುದುರೆ ಸಾವನ್ನಪ್ಪಿದ ದುರಂತ ಘಟನೆ ನಡೆದಿದೆ.
ಗ್ರಾಮದ ಶಂಕರ್ ಸಮಗರ ಅವರಿಗೆ ಸೇರಿದ ಎಮ್ಮೆಗಳು ಹಾಗೂ ಕುದುರೆಯನ್ನು ಅವರು ಕೊಟ್ಟಿಗೆಗೆ ಕಟ್ಟಿ ಹಾಕಿದ್ದರು. ಈ ವೇಳೆ ಬಿಸಿಲಿನ ತೀವ್ರತೆಗೆ ವಿದ್ಯುತ್ ತಂತಿ ತುಂಡಾಗಿ ಧರೆಗುರುಳಿದ್ದು, ಹತ್ತಿರದಲ್ಲೇ ಬಿದ್ದಿರುವ ಪೊದೆಯ ಸಂಪರ್ಕದಿಂದ ವಿದ್ಯುತ್ ಹರಿದಿದೆ. ಇದರಿಂದಾಗಿ ತಳದಲ್ಲಿ ಕಟ್ಟಿ ಹಾಕಿದ್ದ ಮೂರು ಎಮ್ಮೆಗಳು ಮತ್ತು ಒಂದು ಕುದುರೆ ಸ್ಥಳದಲ್ಲೇ ಮೃತಪಟ್ಟು ಬಿದ್ದಿವೆ.
ಘಟನೆ ನಡೆದೊಡನೆ ಸ್ಥಳೀಯರು ಘಟನಾ ಸ್ಥಳಕ್ಕೆ ಧಾವಿಸಿದ್ದು, ಸಾವಿಗೀಡಾದ ಪ್ರಾಣಿಗಳಿಗೆ ಕಣ್ಣೀರೆರೆದರು. ಘಟನೆಯ ಕುರಿತು ಮೂಡಲಗಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ವಿದ್ಯುತ್ ಇಲಾಖೆಯ ನಿರ್ಲಕ್ಷ್ಯವೇ ದುರಂತಕ್ಕೆ ಕಾರಣ ಎಂದು ಗ್ರಾಮಸ್ಥರು ಆರೋಪಿಸಿದ್ದಾರೆ.
