ಬಹು ನಿರೀಕ್ಷೆಯ ದ್ವಿತೀಯ ಪಿಯುಸಿ ವಾರ್ಷಿಕ ಪರೀಕ್ಷೆ-1 ಶನಿವಾರ (ಫೆ.28) ಆರಂಭವಾಗಿದ್ದು, ಜಿಲ್ಲೆಯಾದ್ಯಂತ 199 ಕಾಲೇಜುಗಳಲ್ಲಿ 36 ಪರೀಕ್ಷಾ ಕೇಂದ್ರಗಳಲ್ಲಿ ನಡೆದ ಪರೀಕ್ಷೆಗೆ 1,087 ವಿದ್ಯಾರ್ಥಿಗಳು ಗೈರು ಹಾಜರಾದರು.
ಮೊದಲ ದಿನ ಕನ್ನಡ ಹಾಗೂ ಅರೇಬಿಕ್ ಭಾಷೆಯ ಪತ್ರಿಕೆ ಎರಡೂ ಸೇರಿ ಒಟ್ಟು 10,840 ವಿದ್ಯಾರ್ಥಿಗಳು ನೋಂದಣಿ ಮಾಡಿಸಿಕೊಂಡಿದ್ದರು. ಈ ಪೈಕಿ 9,753 ವಿದ್ಯಾರ್ಥಿಗಳು ಹಾಜರಾದರೆ, 1,087 ವಿದ್ಯಾರ್ಥಿಗಳು ಗೈರು ಹಾಜರಾಗಿದ್ದಾರೆ.
ಪದವಿ ಪೂರ್ವ ಶಿಕ್ಷಣ ಇಲಾಖೆಯ ಉಪನಿರ್ದೇಶಕ ಚಂದ್ರಕಾಂತ ಶಾಬಾದಕರ್ ಅವರು ಬೀದರ್ ನಗರದಲ್ಲಿರುವ ಜ್ಞಾನ ಸುಧಾ ಕಾಲೇಜು, ಶಾಹು ಮಹಾರಾಜ್ ಕಾಲೇಜು ಹಾಗೂ ಆರ್.ಆರ್.ಕೆ. ಪಿಯು ಕಾಲೇಜುಗಳಿಗೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.
ಮೊದಲ ದಿನ ಜಿಲ್ಲೆಯ ಯಾವೊಂದು ಕೇಂದ್ರದಲ್ಲೂ ನಕಲು ಪ್ರಕರಣಗಳು ವರದಿಯಾಗಿಲ್ಲ. ಪರೀಕ್ಷೆಗಳು ಸುಗಮವಾಗಿ ಜರುಗಿದವು ಎಂದು ಪದವಿ ಪೂರ್ವ ಶಿಕ್ಷಣ ಇಲಾಖೆಯ ಉಪ ನಿರ್ದೇಶಕ ಚಂದ್ರಕಾಂತ ಶಾಬಾದಕರ್ ʼಈದಿನʼಕ್ಕೆ ತಿಳಿಸಿದರು.
