ಬಳ್ಳಾರಿ ನಗರದಲ್ಲಿರುವ ಸಾಂಸ್ಕೃತಿಕ ಸಮುಚ್ಚಯ ಆವರಣದಲ್ಲಿ ಕನಿಷ್ಠ ಮೂಲಭೂತ ಸೌಕರ್ಯಗಳಿಲ್ಲದೆ ಸಮಸ್ಯೆಗಳ ಆಗರವಾಗಿದೆ. ಸಾಂಸ್ಕೃತಿಕ ಸಮುಚ್ಚಯದ ಆವರಣದಲ್ಲಿಯೇ ನಗರ ಕೇಂದ್ರ ಗ್ರಂಥಾಲಯ, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ, ಸಂಗನಕಲ್ಲು ಮ್ಯೂಸಿಯಂ, ಕನ್ನಡ ಭವನ, ಹೊಂಗಿರಣದ ಸಭಾಂಗಣ ಕಟ್ಟಡಗಳಿವೆ. ಆದರೂ, ಅಗತ್ಯ ಸೌಲಭ್ಯಗಳಿಲ್ಲದೆ ಜನರು ಪರದಾಡುವಂತಾಗಿದೆ.
ಸಮುಚ್ಚಯ ಆವರಣದಲ್ಲಿ ವಿದ್ಯುತ್ ದ್ವೀಪಗಳು ಸರಿಯಿಲ್ಲ, ಕಂಬಗಳು ಮುರಿದು ಬಿದ್ದಿವೆ. ಹೊಂಗಿರಣ ಹತ್ತಿರ ಶುದ್ಧ ಕುಡಿಯುವ ನೀರು ಇಲ್ಲ. ಶೌಚಾಲಯ ನಿರ್ಮಾಣ ಮಾಡಿ ಬಹಳ ದಿನಗಳೇ ಕಳೆದಿದ್ದರೂ, ಇನ್ನೂ ಸಾರ್ವಜನಿಕರ ಬಳಕೆಗೆ ದೊರೆತಿಲ್ಲ. ಆವರಣ ಸ್ವಚ್ಛವಾಗಿರ ಕಾರಣ, ಸಾರ್ವಜನಿಕರು ಮತ್ತು ವಿದ್ಯಾರ್ಥಿಗಳಿಗೆ ತೊಂದರೆಯಾಗುತ್ತಿದೆ ಎಂದು ಸ್ಥಳೀಯರು ಆರೋಪಿಸಿದ್ದಾರೆ.
ಈ ದಿನ.ಕಾಮ್ ಜೊತೆ ಮಾತನಾಡಿದ ಸಾಮಾಜಿಕ ಕಾರ್ಯಕರ್ತ ವೆಂಕಟ ರೆಡ್ಡಿ, ”ವಿಜ್ಞಾನಾರ್ಜನೆಗೆ ವಿದ್ಯಾರ್ಥಿಗಳು, ಬೆಳಿಗ್ಗೆ ಮತ್ತು ಸಂಜೆ ವಾಯು ವಿಹಾರಕ್ಕೆ ಹಿರಿಯ ನಾಗರಿಕರು, ಕಲೆ, ಸಾಹಿತ್ಯ ಸಂಗೀತ ಕಲಾವಿದರು ಹೀಗೆ, ದಿನ ನಿತ್ಯ ಸಾವಿರಾರು ಜನ ಈ ಸಾಂಸ್ಕೃತಿಕ ಸಮುಚ್ಚಯ ಆವರಣಕ್ಕೆ ಬರುತ್ತಾರೆ. ಆದರೆ, ಹೀಗೆ ಬರುವವರಿಗೆ ಇಲ್ಲಿ ಶುದ್ಧ ಕುಡಿಯುವ ನೀರು ಸಿಗಲ್ಲ, ನೂತನ ಶೌಚಾಲಯ ಇದ್ದರು ಉದ್ಘಾಟನೆ ಆಗಿಲ್ಲ, ಹಳೇ ಶೌಚಾಲಯ ನಿರ್ವಹಣೆ ಸರಿಯಾಗಿಲ್ಲ. ಆವರಣದಲ್ಲಿ ಸ್ವಚ್ಛತೆ ಇಲ್ಲ ಹೀಗೆ ಕನಿಷ್ಠ ಮೂಲಭೂತ ಸೌಕರ್ಯಗಳಿಲ್ಲದೆ, ಸಾಂಸ್ಕೃತಿಕ ಸಮುಚ್ಚಯ ಆವರಣ ಸಮಸ್ಯೆಗಳ ಆಗರವಾಗಿದ್ದು, ಸಂಬಂಧಿಸಿದ ಅಧಿಕಾರಿಗಳು ಕೂಡಲೇ ಕ್ರಮ ಕೈಗೊಳ್ಳಬೇಕು” ಎಂದು ಒತ್ಥಾಯಿಸಿದ್ದಾರೆ.
