ದಕ್ಷಿಣ ಕನ್ನಡ ಜಿಲ್ಲೆಯ ಬೆಳ್ತಂಗಡಿ ತಾಲೂಕಿನ ಧರ್ಮಸ್ಥಳ ಪ್ರದೇಶದಲ್ಲಿನ ಮಹಿಳೆಯರ ಸಾವುಗಳು ಮತ್ತು ನಾಪತ್ತೆ ಮೊದಲಾದ ಬಗೆಹರಿಯದ ಪ್ರಕರಣಗಳಿಗೆ ನ್ಯಾಯಕ್ಕಾಗಿ ಒತ್ತಾಯಿಸಲು ಪ್ರಾರಂಭಿಸಲಾದ ‘ಕೊಂದವರು ಯಾರು- who killed women in Dharmasthala?’ ಆಂದೋಲನದ ಪ್ರತಿನಿಧಿಗಳು ನವೆಂಬರ್ 26 ರ ಬುಧವಾರದಂದು ಎಸ್ಐಟಿ ಮುಖ್ಯಸ್ಥ ಶ್ರೀ ಪ್ರಣಬ್ ಮೊಹಂತಿ ಅವರನ್ನು ಭೇಟಿ ಮಾಡಿ ಈ ವಿಷಯದ ಕುರಿತು ನಡೆಯುತ್ತಿರುವ ತನಿಖೆಗಳಿಗೆ ಸಂಬಂಧಿಸಿದಂತೆ ಒಂದು ಹಕ್ಕೊತ್ತಾಯ ಪತ್ರವನ್ನು ಸಲ್ಲಿಸಿದರು.
ಸರ್ಕಾರಿ ಆದೇಶದ ಪ್ರಕಾರ ಕಳೆದ ಎರಡು ದಶಕಗಳಲ್ಲಿ ಮಹಿಳೆಯರ ಅಸ್ವಾಭಾವಿಕ ಸಾವುಗಳು, ಅತ್ಯಾಚಾರಗಳು ಮತ್ತು ಕಣ್ಮರೆಗಳ ದೊಡ್ಡ ವಿಚಾರವನ್ನು ಕೈಗೆತ್ತಿಕೊಂಡಿದ್ದಕ್ಕಾಗಿ ಎಸ್ಐಟಿಯನ್ನು ಶ್ಲಾಘಿಸಿದ ನಿಯೋಗ, ಬಲಿಪಶುಗಳು, ಬದುಕುಳಿದವರು, ಸಾಕ್ಷಿಗಳು ಮತ್ತು ಕುಟುಂಬಗಳು ಯಾವುದೇ ಪ್ರತೀಕಾರದ ಭಯವಿಲ್ಲದೆ ಮುಂದೆ ಬರಲು ಅನುವು ಮಾಡಿಕೊಡುವ ಕ್ರಮವನ್ನು ತಕ್ಷಣವೇ ಜಾರಿಗೆ ತರಬೇಕೆಂದು ಎಸ್ಐಟಿಯನ್ನು ಒತ್ತಾಯಿಸಿತು. ಇದು ತನಿಖೆಗಳನ್ನು ಬಲಗೊಳಿಸಿ, ವಿಶ್ವಾಸಾರ್ಹತೆ ಖಾತ್ರಿಪಡಿಸುತ್ತದೆ ಮತ್ತು ಇದರಿಂದಾಗಿ ತನಿಖೆಯು ಸಮಗ್ರ ಮತ್ತು ಪರಿಣಾಮಕಾರಿಯಾಗುತ್ತದೆ ಎಂಬ ಭರವಸೆ ನೀಡಿದರು.
ಇಂತಹ ನಿರ್ಣಾಯಕ ಕ್ರಮಗಳು ಅಧಿಕಾರಿಗಳು ಸ್ಥಳೀಯ ಶಕ್ತಿ ಅಥವಾ ಪ್ರಭಾವವನ್ನು ಲೆಕ್ಕಿಸದೆ ಎಲ್ಲಾ ನಾಗರಿಕರು ಮತ್ತು ಗುಂಪುಗಳನ್ನು ಸಮಾನವಾಗಿ ಪರಿಗಣಿಸುತ್ತಿದ್ದಾರೆ ಎಂಬ ಬಲವಾದ ಸಾರ್ವಜನಿಕ ಸಂದೇಶವನ್ನು ರವಾನಿಸುತ್ತದೆ ಎಂದು ನಿಯೋಗದಲ್ಲಿ ಭಾಗವಹಿಸಿದ್ದ ಆಂದೋಲನದ ಪ್ರತಿನಿಧಿಗಳು ಹೇಳಿದರು. ಹಕ್ಕೊತ್ತಾಯದಲ್ಲಿ ದಾಖಲಿಸಲಾಗಿರುವ ಕ್ರಮಗಳಲ್ಲಿ- ಸಾರ್ವಜನಿಕ ಸೂಚನೆ ನೀಡುವುದು ಮತ್ತು ಸಾವುಗಳಿಗೆ ಸಂಬಂಧಿಸಿದ ದೂರುಗಳು ಮತ್ತು ಮಾಹಿತಿಗಾಗಿ ಸಹಾಯವಾಣಿಯನ್ನು ಸ್ಥಾಪಿಸುವುದು, ಸಾಕ್ಷಿಗಳು ಮತ್ತು ದೂರುದಾರರು ಮುಂದೆ ಬರಲು ಅಗತ್ಯವಾದ ರಕ್ಷಣೆ, ಸುರಕ್ಷತೆ ಮತ್ತು ಅನಾಮಧೇಯತೆಯನ್ನು ಒದಗಿಸುವುದು ಮತ್ತು ಲಿಂಗ ನ್ಯಾಯ ಮತ್ತು ಹೊಣೆಗಾರಿಕೆಯನ್ನು ಖಚಿತಪಡಿಸಿಕೊಳ್ಳಲು ಸ್ವತಂತ್ರ ಬೆಂಬಲ ಗುಂಪನ್ನು ಸ್ಥಾಪಿಸುವುದು ಸೇರಿವೆ.
ಕೊಂದವರು ಯಾರು ಆಂದೋಲನದ ಪ್ರತಿನಿಧಿಗಳು, ಈ ಸಲಹೆಗಳು ಮತ್ತು ಬೇಡಿಕೆಗಳನ್ನು ಸರ್ಕಾರದ ಮುಂದೆಯೂ ಮಂಡಿಸಿ, ಚರ್ಚೆ ಮಾಡಲಾಗುವುದು ಎಂದು ಹೇಳಿದರು.
ನಿಯೋಗದ ಸದಸ್ಯರಲ್ಲಿ ಹಿರಿಯ ಕಾರ್ಯಕರ್ತೆಯರಾದ ಕೆ.ಎಸ್. ವಿಮಲಾ, ಆಶಾ ರಮೇಶ್ ಮತ್ತು ಮಲ್ಲಿಗೆ ಸಿರಿಮನೆ ಸೇರಿದ್ದಾರೆ.
