ಕರ್ನಾಟಕದ ಜನರು ಓದಲೇಬೇಕಾದ ಕಣ್ಣೀರ ಕತೆ ಇದು. ಸಮಾಜವಾದಿ ನಾಯಕ ಸಿದ್ದರಾಮಯ್ಯ ಅವರ ನೇತೃತ್ವದ ಸರ್ಕಾರದ ಆಡಳಿತದಲ್ಲೇ ಈ ದುರಂತ ನಡೆಯುತ್ತಿರುವುದು ಎಲ್ಲರಲ್ಲೂ ಹತಾಶೆ ಉಂಟು ಮಾಡಿದೆ. ಈಗಲಾದರೂ ಅವರು ಎಚ್ಚತ್ತುಕೊಂಡು ಈ ಅನ್ಯಾಯ ಸರಿಪಡಿಸುವರೋ ಏನೋ ಎಂಬ ಹಂಬಲ ಎಲ್ಲರದ್ದೂ.
ಬಿಜೆಪಿ ಸರ್ಕಾರದ ಕೊನೆಯ ದಿನಗಳ ಅವಧಿಯಲ್ಲಿ ಅಂದಿನ ಸಚಿವರಾಗಿದ್ದ ವಿ ಸೋಮಣ್ಣ ಅವರು ಧರ್ಮಸ್ಥಳಕ್ಕೆ ಮಿನಿ ವಿಮಾನ ನಿಲ್ದಾಣ ಮಂಜೂರು ಮಾಡಿದರು. ಧರ್ಮಸ್ಥಳಕ್ಕೆ ವಿಮಾನದಲ್ಲಿ ಆಗಮಿಸುವ ಭಕ್ತರ ಸಂಖ್ಯೆ ಕಡಿಮೆ. ಆದರೂ ಯಾರು ವಿರೋಧ ವ್ಯಕ್ತಪಡಿಸಲಿಲ್ಲ.
ಈಗ ಈ ವಿಮಾನ ನಿಲ್ದಾಣದ ಹೆಸರಿನಲ್ಲಿ ನಡೆಯುತ್ತಿರುವುದು ಮಾತ್ರ ಹಗಲು ದರೋಡೆ. ಧಮಸ್ಥಳದ ಬಳಿ ನಿರ್ಮಾಣವಾಗಬೇಕಿದ್ದ ಈ ಮಿನಿ ವಿಮಾನ ನಿಲ್ದಾಣವನ್ನು ಸುಮಾರು ಐದು ಕಿಲೋ ಮೀಟರ್ ದೂರದಲ್ಲಿ ನಿರ್ಮಿಸಲು ಅಧಿಕಾರಿಗಳು, ರಾಜಕಾರಣಿಗಳು ಸ್ಕೆಚ್ ಹಾಕಿದ್ದಾರೆ. ಸರ್ವೇ ಕೂಡಾ ಆರಂಭವಾಗಿದೆ. ಬಡವರು, ನಿರ್ಗತಿಕರ ಮನೆಗಳನ್ನೆಲ್ಲ ಆಪೋಶನ ತೆಗೆದುಕೊಂಡು ಉಳ್ಳವರ ಜಮೀನಿನ ಬೆಲೆ ಇನ್ನಷ್ಟು ಗಗನಮುಖಿಯಾಗುವಂತೆ ಮಾಡುವ ರೀತಿಯಲ್ಲೇ ಇದರ ರೂಪುರೇಷೆ ಮಾಡಲಾಗುತ್ತಿದೆ.
ಯಾವುದೇ ಒಂದು ಪ್ರಾಜೆಕ್ಟ್ ಆರಂಭಕ್ಕೆ ಮುನ್ನ ಒಂದು ಕಾರ್ಯಸಾಧ್ಯತಾ ಸಮೀಕ್ಷೆ ನಡೆಸಲೇಬೇಕು. ಅದನ್ನು ಇಲ್ಲಿ ನಡೆಸಲಾಗಿಲ್ಲ. ಸರ್ಕಾರ 200 ಕೋಟಿ ರೂ. ಹಣ ವ್ಯಯಯಿಸುತ್ತಿದೆ. ಅದರ ಲಾಭ ಯಾರಿಗೆ? ಇದನ್ನೆಲ್ಲ ಯೋಚಿಸದೆ, ಸರ್ಕಾರ ಈಗ ಬಡವರ ಹೊಟ್ಟೆಯ ಮೇಲೆ ಹೊಡೆಯಲು ಮುಂದಾಗಿರುವುದು ಎಷ್ಟು ಸರಿ?
ಮಿನಿ ವಿಮಾನ ನಿಲ್ದಾಣ ಅಗತ್ಯವಿದ್ದರೆ, ಧರ್ಮಸ್ಥಳದ ಪಕ್ಕದಲ್ಲೇ ಸರ್ಕಾರಿ ಜಮೀನಿನಲ್ಲೇ ಅದನ್ನು ನಿರ್ಮಿಸಬಹುದು. ಅದರ ಬದಲಿಗೆ ಯಾವುದೊ ಒಂದು ಮೂಲೆಯಲ್ಲಿ ಅದನ್ನು ನಿರ್ಮಿಸುವ ಹುನ್ನಾರ ಏನು? ಅದರ ಅಂತಿಮ ಲಾಭ ಯಾರಿಗೆ? ಈ ಎಲ್ಲಾ ಪ್ರಶ್ನೆಗಳಿಗೆ ಸರ್ಕಾರದ ಬಳಿ ಉತ್ತರವಿದೆಯೇ?
ಈಗ ಈ ವಿಮಾನ ನಿಲ್ದಾಣವನ್ನು ಸುಮಾರು ಐದು ಕಿಲೋಮೀಟರ್ ದೂರದ ಕನ್ಯಾಡಿ ಎಂಬಲ್ಲಿ ನಿರ್ಮಿಸಲಾಗುತ್ತಿದೆ. ಅಲ್ಲಿರುವವರೆಲ್ಲರೂ ಬಡವರು. ಅವರು ಖಂಡಿತಾ ಸರ್ಕಾರದ ವಿರುದ್ಧ ಧ್ವನಿ ಎತ್ತುವ ಸಾಮರ್ಥ್ಯ ಹೊಂದಿಲ್ಲ. ಇದನ್ನು ಅರಿತುಕೊಂಡೆ ಈಗ ಎಲ್ಲರನ್ನು ಒಕ್ಕಲೆಬ್ಬಿಸುವ ಹುನ್ನಾರ ನಡೆದಿದೆ.
ಧರ್ಮಸ್ಥಳದ ಭಕ್ತರಿಗೆ ಈಗ ಬೇಕಿರುವುದು ಅಲ್ಲಿಗೆ ನೇರ ರೈಲು ಸಂಪರ್ಕ. ಅದನ್ನು ಬಿಟ್ಟು ಈ ವಿಮಾನ ನಿಲ್ದಾಣ ಅಗತ್ಯವಿದೆಯೇ? ಈ ಬಗ್ಗೆ ಕರ್ನಾಟಕ ಸರ್ಕಾರ ಮೌನ ಮುರಿಯುವುದೇ?
– ಸೌಗಂಧಿನಿ ಬಹುಜನ
ಕ್ರಾಂತಿ ನೀರ ಚಿಲುಮೆ
ಉಜಿರೆ, ಬೆಳ್ತಂಗಡಿ ತಾಲೂಕು
