ಖ್ಯಾತ ಸಂಗೀತ ನಿರ್ದೇಶಕ ಹಂಸಲೇಖ ಅವರಿಗೆ ಶ್ರೀಗುರು ಪುಟ್ಟರಾಜ ಪುರಸ್ಕಾರ ನೀಡಿ ಮೂರು ಸಾವಿರದ ಮಠದ ಡಾ. ಗುರುಸಿದ್ದರಾಜೇಂದ್ರ ಶ್ರೀ ಗೌರವಿಸಿದ್ದಾರೆ.
ದಾವಣಗೆರೆಯ ವೀರೇಶ್ವರ ಪುಣ್ಯಾಶ್ರಮದಲ್ಲಿ ನಡೆದ ಪಂಚಾಕ್ಷರಿ ಗವಾಯಿಗಳ 79ನೇ ಸ್ಮರಣೋತ್ಸವ ಹಾಗೂ ಪಂಡಿತ ಪುಟ್ಟರಾಜ ಗವಾಯಿಗಳ 13ನೇ ಸ್ಮರಣೋತ್ಸವ ಕಾರ್ಯಕ್ರಮದಲ್ಲಿ ಪುರಸ್ಕಾರ ನೀಡಿ ಗೌರವಿಸಲಾಗಿದೆ.
ಕಾರ್ಯಕ್ರಮದಲ್ಲಿ ಮಾತನಾಡಿದ ಗುರುಸಿದ್ದರಾಜೇಂದ್ರ ಶ್ರೀ, “ಹಂಸಲೇಖ ಅವರು ಕನ್ನಡ ನಾಡು, ನುಡಿಗೆ ಸಲ್ಲಿಸಿದ ಸೇವೆಯನ್ನು ಗುರುತಿಸಿ ಲಿಂ. ಎರೆಕುಪ್ಪಿ ಹಿರೇಮಠದ ತಿಪ್ಪಯ್ಯ ನವರ ಸ್ಮರಣಾರ್ಥ ಕೊಡಮಾಡುವ ‘ಶ್ರೀ ಗುರು ಪುಟ್ಟರಾಜ ಪುರಸ್ಕಾರ’ ನೀಡಿರುವುದು ಶ್ಲಾಘನೀಯ. ಕನ್ನಡಕ್ಕೆ ಕುತ್ತು ಬಂದಾಗ ಎಲ್ಲರೂ ಎಚ್ಚರಗೊಳ್ಳಬೇಕೆಂದು ಕರೆ ನೀಡಿರುವ ಹಂಸಲೇಖಾ ಅವರ ಕಾಳಜಿಯನ್ನು ಎಲ್ಲರೂ ಅರ್ಥಮಾಡಿಕೊಳ್ಳಬೇಕು” ಎಂದು ತಿಳಿಸಿದರು.
“ಹಾನಗಲ್ ಕುಮಾರಸ್ವಾಮಿ ಮತ್ತು ಪಂಚಾಕ್ಷರಿ ಗವಾಯಿ ಅವರು ಸಮಾಜಕ್ಕೆ ನೀಡಿರುವ ಕೊಡುಗೆ ಅಪಾರವಾದದ್ದು. ಅನೇಕ ಸನ್ಯಾಸಿಗಳು ಭಕ್ತರಿಂದ ಹಣ, ಬಂಗಾರ, ಆಸ್ತಿಯನ್ನು ಜೋಳಿಗೆಗೆ ಹಾಕಿಸಿಕೊಂಡಿದ್ದೇವೆ. ಆದರೆ, ಹಾನಗಲ್ ಮಠದ ಕುಮಾರಸ್ವಾಮಿಗಳು ಅಂಧ ಮಕ್ಕಳನ್ನು ಜೋಳಿಗೆಗೆ ಹಾಕಿಸಿಕೊಂಡು ಬಂದು ಅವರಿಗೆ ಸಂಗೀತ ದೀಕ್ಷೆ ನೀಡಿದ ಮಹಾನ್ ಸಾಧಕರಾಗಿದ್ದಾರೆ. ಜಗತ್ತಿನ ಸನ್ಯಾಸಿಗಳ ಪಟ್ಟಿಯಲ್ಲಿ ಈ ರೀತಿಯ ಭಿಕ್ಷೆ ಬೇಡಿದ ಏಕೈಕ ಸನ್ಯಾಸಿ ಇದ್ದರೆ ಅದು ಹಾನಗಲ್ನ ಕುಮಾರಸ್ವಾಮಿಗಳು ಮಾತ್ರ. ಅವರ ಶಿಷ್ಯರಾಗಿ ಪಂಚಾಕ್ಷರ ಗವಾಯಿಗಳು ಅದೇ ಪರಂಪರೆಯನ್ನು ಬಂದು ಮುಂದುವರೆಸಿಕೊಂಡು ಅವರು ಮಾಡಿದ ಸಾಧನೆ ಕೂಡ ಅಪರೂಪವಾದುದು” ಎಂದು ಬಣ್ಣಿಸಿದರು.
ಹೊಸಪೇಟೆ ಹಾಲಕೇರಿಯ ಅನ್ನದಾನೀಶ್ವರ ಮಠದ ಮುಪ್ಪಿನ ಬಸವಲಿಂಗ ಮಹಾಸ್ವಾಮೀಜಿ ಮಾತನಾಡಿ, “ಮಠಮಾನ್ಯಗಳಿಗೆ ಸಾಕಷ್ಟು ಜವಾಬ್ದಾರಿಗಳಿವೆ. ಆದರೆ ಸ್ವಾಮೀಜಿಗಳು ಮಾಡಬೇಕಾದ ತಮ್ಮ ಕರ್ತವ್ಯಗಳನ್ನು ಬಿಟ್ಟು ಬೇರೆಲ್ಲ ಕೆಲಸಗಳನ್ನು ಮಾಡುತ್ತಿದ್ದಾರೆ. ಆದರೆ ಕುಮಾರಸ್ವಾಮಿಗಳು ನಿಷ್ಟಾವಂತ ಸನ್ಯಾಸಿಗಳಾಗಿ ಮಠ ಮತ್ತು ಸಮಾಜದ ಉದ್ದಾರ ಮಾಡಿ, ನೂರಾರು ಅಂದ ವಿದ್ಯಾಥಿಗಳ ಬಾಳಿಗೆ ಬೆಳಕಾಗಿದ್ದಾರೆ. ಇದುವೆ ಒಬ್ಬ ನಿಜವಾದ ಸ್ವಾಮೀಜಿ ಮಾಡಬೇಕಾದ ಕರ್ತವ್ಯ” ಎಂದರು.
“ಮಕ್ಕಳಿಗೆ ಶಿಕ್ಷಣ ಕೊಡುವುದು ಅತ್ಯಂತ ಪವಿತ್ರವಾದ ಕೆಲಸ, ಅದರಲ್ಲೂ ನಯನ ಇಲ್ಲದ ಮಕ್ಕಳಿಗೆ ಶಿಕ್ಷಣ ನೀಡುವುದು ನಿಜವಾದ ಪರಮಾತ್ಮನ ಸೇವೆಯಾಗಿದೆ. ಅನ್ನ ದಾಸೋಹದ ಮೂಲಕ ಹೊಟ್ಟೆ ತುಂಬಿಸಬಹುದು. ಆದರೆ ದುಡಿದು ತಿನ್ನಬೇಕೆಂಬ ದೂರದೃಷ್ಟಿಯಿಂದ ಅಂಧ ವಿದ್ಯಾರ್ಥಿಗಳಿಗೆ ಶಿಕ್ಷಣ ನೀಡಿದ್ದಾರೆ. ಕುಮಾರಸ್ವಾಮಿಗಳು, ಪಂಚಾಕ್ಷರಿ ಗವಾಯಿಗಳು ಇಲ್ಲದೇ ಇದ್ದಿದ್ದರೆ ಅಂಧ ಮಕ್ಕಳು ಭಿಕ್ಷೆ ಬೇಡುವ ಸ್ಥಿತಿಗೆ ಬರುತ್ತಿದ್ದರು, ಆದರೆ ಇಂದು ಸಂಗೀತ ಶಿಕ್ಷಣದ ಮೂಲಕ ಸಾವಿರಾರು ಅಂಧ ವಿದ್ಯಾರ್ಥಿಗಳು ರಾಷ್ಟ್ರ, ಅಂತರಾಷ್ಟ್ರಮಟ್ಟದಲ್ಲಿ ಗುರುತಿಸಿಕೊಳ್ಳಲು ಸಾಧ್ಯವಾಗಿದೆ” ಎಂದು ಹೇಳಿದರು.
ಸಮಾರಂಭದಲ್ಲಿ ಆವರಗೊಳ್ಳದ ಶಿವಾಚಾರ್ಯ ಮಹಾಸ್ವಾಮಿಗಳು, ಹೊಸಪೇಟೆಯ ಅನ್ನದಾನೀಶ್ವರ ಮಠದ ಮುಪ್ಪಿನ ಬಸವಲಿಂಗ ಮಹಾಸ್ವಾಮಿಗಳು, ವಿಧಾನಪರಿಷತ್ ಮಾಜಿ ಸಚೇತಕ ಡಾ.ಎ.ಎಚ್.ಶಿವಯೋಗಿಸ್ವಾಮಿ, ಹಿರಿಯ ಲೆಕ್ಕ ಪರಿಶೋಧಕ ಡಾ. ಅಥಣಿ ಎಸ್.ವೀರಣ್ಣ, ಪುಣ್ಯಾಶ್ರಮದ ಕಾರ್ಯದರ್ಶಿ ಸ್ವಾಮಿ,ದೇವರಮನೆ ಶಿವಕುಮಾರ್ ಇತರರು ಉಪಸ್ಥಿತರಿದ್ದರು.
