ಮಂಗಳೂರು ಹೊರವಲಯದ ಉಳ್ಳಾಲ ಠಾಣಾ ವ್ಯಾಪ್ತಿಯ ಕೆ ಸಿ ರೋಡ್ನಲ್ಲಿರುವ ಕೋಟೆಕಾರ್ ಬ್ಯಾಂಕ್(ವ್ಯವಸಾಯ ಸೇವಾ ಸಹಕಾರಿ ಸಂಘದ ಬ್ಯಾಂಕ್)ನಿಂದ ಕಳವು ಮಾಡಲಾದ 18.314 ಕೆಜಿ ಚಿನ್ನ ಮತ್ತು ₹3.80 ಲಕ್ಷ ನಗದು ವಶಪಡಿಸಿಕೊಳ್ಳಲಾಗಿದೆ ಎಂದು ಮಂಗಳೂರು ನಗರ ಪೊಲೀಸ್ ಆಯುಕ್ತ ಅನುಪಮ್ ಅಗರ್ವಾಲ್ ತಿಳಿಸಿದ್ದಾರೆ.
ಸೋಮವಾರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, “ದರೋಡೆಕೋರರು ಆರು ತಿಂಗಳ ಹಿಂದೆಯೇ ದರೋಡೆಗೆ ಯೋಜಿಸಿದ್ದರು. ಆರೋಪಿಗಳಾದ ಮುರುಗನ್, ಕಣ್ಣನ್ ಮಣಿ ತಲೋಜಾ ಜೈಲಿನಲ್ಲಿ ಭೇಟಿಯಾಗಿ ಸ್ಥಳೀಯ ಸಹಚರ ಶಶಿ ಥೇವರ್ ಅವರೊಂದಿಗೆ ಪಿತೂರಿ ನಡೆಸಿದ್ದರು” ಎಂದರು.
“ಜನವರಿ 17ರಂದು ಮಧ್ಯಾಹ್ನ 1ರಿಂದ 1.20ರ ನಡುವೆ ಬ್ಯಾಂಕಿನಲ್ಲಿ ದರೋಡೆ ನಡೆದಿತ್ತು. ಮುಖವಾಡ ಧರಿಸಿ, ಶಸ್ತ್ರಸಜ್ಜಿತ ವ್ಯಕ್ತಿಗಳ ಗುಂಪು ಪಿಸ್ತೂಲ್ ಮತ್ತು ಚಾಕುಗಳನ್ನು ಹಿಡಿದು ಬ್ಯಾಂಕ್ ಆವರಣಕ್ಕೆ ಹೋಗಿ ನಗದು ಹಾಗೂ ಚಿನ್ನದ ಆಭರಣಗಳನ್ನು ಲೂಟಿ ಮಾಡಿತ್ತು. ನಿರ್ವಹಣೆಯಲ್ಲಿರುವ ಸಿಸಿಟಿವಿ ಕ್ಯಾಮೆರಾಗಳು ಮತ್ತು ಮಾಸ್ಟರ್ ಲಾಕರ್ ತೆರೆದಿರುವುದು ಸೇರಿದಂತೆ ಬ್ಯಾಂಕಿನಲ್ಲಿ ಕೆಲವು ಲೋಪಗಳು ಉಂಟಾಗಿದ್ದು, ಅಪರಾಧಿಗಳಿಗೆ ಕಳ್ಳತನ ಮಾಡಲು ಅನುಕೂಲವಾಗಿದೆ” ಎಂದು ಆಯುಕ್ತರು ಹೇಳಿದರು.
“ಆರಂಭದಲ್ಲಿ ತಂಡವು ಯಾವುದೇ ಮುನ್ನಡೆಯನ್ನು ಹೊಂದಿರಲಿಲ್ಲ. ಆದರೆ ನಂತರ ಪ್ರಕರಣಕ್ಕೆ ಹಲವಾರು ತಂಡಗಳನ್ನು ರಚಿಸಿದೆ” ಎಂದು ಆಯುಕ್ತರು ಹೇಳಿದರು.
“ನಂಬರ್ ಪ್ಲೇಟ್ ಬದಲಾಯಿಸಲು ಫಿಯೆಟ್ ಕಾರನ್ನು ನಿಲ್ಲಿಸಿದಾಗ ಹೆಜಮಾಡಿಯ ಸಿಸಿಟಿವಿ ದೃಶ್ಯಾವಳಿಗಳು ಮೊದಲ ಸುಳಿವು ಸಿಕ್ಕಿದ್ದು, ಅಪರಾಧಿಗಳನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದೆ. ಹೆಚ್ಚಿನ ಪ್ರಕರಣಗಳಲ್ಲಿ, ಆರೋಪಿಗಳನ್ನು ಬಂಧಿಸುವಲ್ಲಿ ವಿಳಂಬವಾದರೆ ವಸೂಲಿ ಕಷ್ಟ. ಆರೋಪಿಗಳನ್ನು ಕಂಡುಹಿಡಿದು ವಸೂಲಿ ಮಾಡದಿದ್ದರೆ, ಚಿನ್ನದ ಠೇವಣಿದಾರರಿಗೆ ಅನ್ಯಾಯವಾಗುತ್ತದೆ. ಈ ಪ್ರಕರಣದಲ್ಲಿ ಕಳೆದುಹೋದ ಬಹುತೇಕ ಸಂಪೂರ್ಣ ಆಸ್ತಿಯನ್ನು ಮರುಪಡೆಯುವಲ್ಲಿ ನಾವು ಯಶಸ್ವಿಯಾಗಿದ್ದೇವೆ” ಎಂದು ಆಯುಕ್ತರು ಹೇಳಿದರು.
ನಾಲ್ವರು ಆರೋಪಿಗಳನ್ನು ಬಂಧಿಸಲಾಗಿದೆ. ಕಣ್ಣನ್ ಮಣಿ(36) ಅವರನ್ನು ತಿರುವಣ್ಣಾಮಲೈನಿಂದ, ಮುರುಗನ್ ಡಿ ಥೇವರ್(36) ಮತ್ತು ಯೋಶ್ವ ರಾಜೇಂದ್ರನ್(35) ಅವರನ್ನು ಅಂಬಾ ಸಮಾಧಿಯಿಂದ ಮತ್ತು ಎಂ ಷಣ್ಮುಗ ಸುಂದರನ್(65) ಅವರನ್ನು ಜನವರಿ 23ರಂದು ಬಂಧಿಸಲಾಗಿದೆ. ಅಪರಾಧಿಗಳನ್ನು ಪತ್ತೆಹಚ್ಚಲು ನಮ್ಮ ತಂಡವು ಸುಮಾರು 2,700 ಕಿಲೋಮೀಟರ್ ದೂರ ತೆರಳಿದೆ. ತಮಿಳಿನಲ್ಲಿ ಸಂವಹನ ನಡೆಸಬಲ್ಲ ಕೆಲವು ಸಿಬ್ಬಂದಿಯನ್ನು ನಾವು ಕಳುಹಿಸಿದ್ದೇವೆ” ಎಂದು ಆಯುಕ್ತರು ಹೇಳಿದರು.
“ಆರೋಪಿಗಳಾದ ಶಶಿ, ಮುರುಗನ್ ಮತ್ತು ಇತರರು ಪ್ರವೇಶ, ನಿರ್ಗಮನ ಮಾರ್ಗಗಳು ಮತ್ತು ಕಾರ್ಯ ಯೋಜಿಸಲು ಕಳೆದ ವರ್ಷ ಆಗಸ್ಟ್ ಮತ್ತು ನವೆಂಬರ್ ನಡುವೆ ಮೂರು ಬಾರಿ ಬೇಹುಗಾರಿಕೆ ನಡೆಸಿದರು. ಸ್ಥಳೀಯರು(ಈ ಪ್ರದೇಶದಲ್ಲಿ ಬಹುಸಂಖ್ಯಾತರಾಗಿರುವ ಮುಸ್ಲಿಮರು) ಶುಕ್ರವಾರದ ನಮಾಝ್ನಲ್ಲಿ ನಿರತರಾಗಿರುವುದರಿಂದ ಶುಕ್ರವಾರವೇ ದರೋಡೆ ನಡೆಸಲು ನಿರ್ಧರಿಸಿದರು” ಎಂದು ಆಯುಕ್ತರು ತಿಳಿಸಿದ್ದಾರೆ.
“ಪ್ರಮುಖ ಸಂಚುಕೋರರಲ್ಲಿ ಒಬ್ಬನಾದ ಶಶಿ ಥೇವರ್ ಸ್ಥಳೀಯನೆಂದು ಹೇಳಲಾಗಿದ್ದು, ಭದ್ರತಾ ವ್ಯವಸ್ಥೆ ದುರ್ಬಲವಾಗಿರುವ ಕೋಟೆಕಾರ್ ಬ್ಯಾಂಕ್ ದರೋಡೆ ಮಾಡಲು ಯೋಜಿಸಿದ್ದನು. ದರೋಡೆಕೋರರಿಗೆ ಸ್ಥಳವನ್ನು ತೋರಿಸಿದ್ದನು. ದರೋಡೆ ಗ್ಯಾಂಗ್ನಲ್ಲಿ ಉತ್ತರ ಭಾರತದ ಕೆಲವು ಆರೋಪಿಗಳು ಇನ್ನೂ ತಲೆಮರೆಸಿಕೊಂಡಿದ್ದಾರೆ” ಎಂದರು.
“ಮುರುಗನ್ ಮತ್ತು ಮೂವರು ಸಹಚರರು ಜನವರಿ 16ರಂದು ಫಿಯೆಟ್ ಕಾರಿನಲ್ಲಿ ಮುಂಬೈನ ತಿಲಕ್ ನಗರದಿಂದ ಹೊರಟರೆ, ಕಣ್ಣನ್ ಮಣಿ ಮತ್ತು ಇನ್ನೊಬ್ಬ ಆರೋಪಿ ರೈಲಿನಲ್ಲಿ ಪ್ರಯಾಣಿಸಿದ್ದರು. ಶಿರೂರು ಗೇಟ್ ಬಳಿ ನಕಲಿ ಮಹಾರಾಷ್ಟ್ರ ನೋಂದಣಿ ಹಾಗೂ ಸುರತ್ಕಲ್ನಲ್ಲಿ ಕೆಎ ಒ4 ನೋಂದಣಿಯೊಂದಿಗೆ ಎರಡು ಬಾರಿ ಕಾರಿನ ನಂಬರ್ ಪ್ಲೇಟ್ ಬದಲಾಯಿಸಲಾಗಿದೆ. ನಂತರ ಎಲ್ಲ ಆರೋಪಿಗಳು ಸುರತ್ಕಲ್ನಲ್ಲಿ ಒಂದೆಡೆ ಸೇರಿ ಬ್ಯಾಂಕಿಗೆ ತೆರಳಿದ್ದಾರೆ” ಎಂದು ಕಮಿಷನರ್ ಬಹಿರಂಗಪಡಿಸಿದರು.
“ಶುಕ್ರವಾರದ ಪ್ರಾರ್ಥನೆ ಪ್ರಾರಂಭವಾಗುವುದನ್ನೇ ಆರೋಪಿಗಳು ಮಧ್ಯಾಹ್ನ 12.26ರಿಂದ ಬ್ಯಾಂಕಿನ ಬಳಿ ಕಾಯುತ್ತಿದ್ದರು. ಕಣ್ಣನ್ ಗೇಟ್ ಬಳಿ ನೆಲಮಹಡಿಯ ಬಳಿ ಕಾಯುತ್ತಿದ್ದಾಗ ಮುರುಗನ್ ಕಾರಿನಲ್ಲಿಯೇ ಇದ್ದರು. ಇತರರು ಈ ಅಪರಾಧವನ್ನು ಮಾಡಿದ್ದಾರೆ. ದರೋಡೆಯ ನಂತರ ಮುರುಗನ್ ಮತ್ತು ಯೋಶ್ವ ಫಿಯೆಟ್ ಕಾರಿನಲ್ಲಿ ತಲಪಾಡಿ ಚೆಕ್ ಪೋಸ್ಟ್ ಮೂಲಕ ಕೇರಳಕ್ಕೆ ಪರಾರಿಯಾಗಿದ್ದರೆ, ಮೂವರು ಆರೋಪಿಗಳು ಆಟೋ ಮೂಲಕ ಮಂಗಳೂರು ಸೆಂಟ್ರಲ್ ರೈಲ್ವೆ ನಿಲ್ದಾಣಕ್ಕೆ ಮತ್ತು ಇನ್ನೊಬ್ಬ ವ್ಯಕ್ತಿ ಬಸ್ನಲ್ಲಿ ಪ್ರಯಾಣಿಸಿದ್ದಾರೆ. ಕದ್ದ ಸೊತ್ತನ್ನು ಮುಂಬೈನಲ್ಲಿ ವಿಲೇವಾರಿ ಮಾಡಲು ಬಯಸಿದ್ದರು” ಎಂದು ಕಮಿಷನರ್ ಬಹಿರಂಗಪಡಿಸಿದರು.
ಈ ಸುದ್ದಿ ಓದಿದ್ದೀರಾ? ಉಡುಪಿ | ಶಾರದಾ ಶಾಲೆಯಲ್ಲಿ ಯಾವುದೇ ಬಾಂಬ್ ಕಂಡು ಬಂದಿಲ್ಲ – ಎಸ್ ಪಿ ಡಾ.ಅರುಣ್
“ಬ್ಯಾಂಕಿನಲ್ಲಿ 29 ಕೆಜಿ ಚಿನ್ನವನ್ನು ಠೇವಣಿ ಇಡಲಾಗಿದೆ. ಅದರಲ್ಲಿ 10 ಕೆಜಿ ಚಿನ್ನವನ್ನು ದರೋಡೆ ಗ್ಯಾಂಗ್ ಮುಟ್ಟಿಲ್ಲ. 18.6743 ಕೆಜಿ ಚಿನ್ನ ಮತ್ತು ₹11.67 ಲಕ್ಷ ನಗದು ಕಳ್ಳತನವಾಗಿದ್ದು, 18.314 ಕೆಜಿ ಚಿನ್ನ ಮತ್ತು ₹3.80 ಲಕ್ಷ ನಗದು ವಶಪಡಿಸಿಕೊಳ್ಳಲಾಗಿದೆ. ಬಂಧಿತರಿಂದ ಎರಡು ಪಿಸ್ತೂಲ್, ಮೂರು ಲೈವ್ ರೌಂಡ್ಸ್, ಎರಡು ಮಚ್ಚು, ಫಿಯೆಟ್ ಕಾರು ಹಾಗೂ ನಕಲಿ ನಂಬರ್ ಪ್ಲೇಟ್ ವಶಪಡಿಸಿಕೊಳ್ಳಲಾಗಿದೆ” ಎಂದು ಹೇಳಿದರು.
“ಮುಂಬೈನ ಜನಪ್ರಿಯ ಫೈನಾನ್ಸ್ ಕಂಪೆನಿ ದರೋಡೆಯಲ್ಲಿ ಭಾಗಿಯಾಗಿದ್ದ ಮುರುಗನ್ ವಿರುದ್ಧ ಎಂಸಿಒಸಿಎ(ಮಹಾರಾಷ್ಟ್ರ ಸಂಘಟಿತ ಅಪರಾಧ ನಿಯಂತ್ರಣ ಕಾಯ್ದೆ, 1999) ಅಡಿಯಲ್ಲಿ ಒಂದು ಪ್ರಕರಣ ಸೇರಿದಂತೆ ಈ ಹಿಂದೆ ಮೂರು ಪ್ರಕರಣಗಳು ದಾಖಲಾಗಿವೆ. ಯೋಶ್ವಾ ಈ ಹಿಂದೆ ಗುಜರಾತ್ನಲ್ಲಿ ಫೈನಾನ್ಸ್ ಕಂಪೆನಿ ದರೋಡೆ ಮತ್ತು ಪ್ರಕರಣವೊಂದರಲ್ಲಿ ಭಾಗಿಯಾಗಿದ್ದರೆ, ಕಣ್ಣನ್ ಮಣಿ ವಿರುದ್ಧ ಮುಂಬೈನ ತಿಲಕ್ ನಗರ ಠಾಣೆಯಲ್ಲಿ ಒಂದು ಪ್ರಕರಣ ದಾಖಲಾಗಿದೆ” ಎಂದು ತಿಳಿಸಿದ್ದಾರೆ.
