ಟಿಬೆಟಿಯನ್ ಸಮುದಾಯದವರ ಪಾಲಿಗೆ ಅತ್ಯಂತ ಪವಿತ್ರ ಹಾಗೂ ಹೊಸ ವರ್ಷದ ಆರಂಭವನ್ನು ಸೂಚಿಸುವ ‘ಲೋಸಾರ್’ ಹಬ್ಬದ ಸಂಭ್ರಮ ಉತ್ತರ ಕನ್ನಡ ಜಿಲ್ಲೆಯ ಮುಂಡಗೋಡಿನ ಟಿಬೆಟಿಯನ್ ವಸಾಹತುಗಳಲ್ಲಿ ಮನೆಮಾಡಿದೆ.
ಬುಧವಾರದಿಂದ (ಫೆಬ್ರವರಿ 18) ಟಿಬೆಟಿಯನ್ ಪಂಚಾಂಗದ 2153ನೇ ವರ್ಷದ ಆಚರಣೆಗಳು ವಿಧ್ಯುಕ್ತವಾಗಿ ಆರಂಭಗೊಂಡಿದ್ದು, ಕ್ಯಾಂಪ್ಗಳಲ್ಲಿ ಧಾರ್ಮಿಕ ಶ್ರದ್ಧೆ ಹಾಗೂ ಸಾಂಸ್ಕೃತಿಕ ಸಡಗರ ಮೇಳೈಸಿದೆ.
ಈ ಬಾರಿಯ ಹೊಸ ವರ್ಷವನ್ನು ಟಿಬೆಟಿಯನ್ ಜ್ಯೋತಿಷ್ಯ ಶಾಸ್ತ್ರದ ಪ್ರಕಾರ ‘ಫೈರ್ ಹಾರ್ಸ್’ (Fire Horse) ವರ್ಷವೆಂದು ಕರೆಯಲಾಗುತ್ತದೆ. ಟಿಬೆಟಿಯನ್ ಸಂಪ್ರದಾಯದಲ್ಲಿ ಪ್ರಕೃತಿಯ ಐದು ಮೂಲತತ್ವಗಳಾದ ಮರ, ಬೆಂಕಿ, ಭೂಮಿ, ಲೋಹ ಮತ್ತು ನೀರಿಗೆ ಹೆಚ್ಚಿನ ಪ್ರಾಮುಖ್ಯತೆ ಇದೆ.
ಇದರಲ್ಲಿ ‘ಬೆಂಕಿ’ಯ ತತ್ವವು ಚೈತನ್ಯ, ವೇಗ ಮತ್ತು ಪರಿವರ್ತನೆಯ ಸಂಕೇತವಾಗಿದ್ದು, ಈ ವರ್ಷ ಎಲ್ಲರಿಗೂ ಹೊಸ ಆಶಾದಾಯಕ ಬದಲಾವಣೆ ತರಲಿದೆ ಎಂಬುದು ಟಿಬೆಟಿಯನ್ ಜನರ ನಂಬಿಕೆಯಾಗಿದೆ. ಲೋಸಾರ್ ಹಬ್ಬಕ್ಕಾಗಿ ಕಳೆದ ಕೆಲ ದಿನಗಳಿಂದಲೇ ಸಿದ್ಧತೆಗಳು ಬಿರುಸಿನಿಂದ ಸಾಗಿದ್ದವು.
ಇಲ್ಲಿನ ಬೌದ್ಧ ಕ್ಯಾಂಪ್ ನಲ್ಲಿರುವ ಟಿಬೆಟಿಯನ್ನರು ತಮ್ಮ ಮನೆಗಳನ್ನು ಸ್ವಚ್ಛಗೊಳಿಸಿ, ಬಣ್ಣಬಣ್ಣದ ತೋರಣಗಳಿಂದ ಅಲಂಕರಿಸಿ ಹೊಸ ವರ್ಷದ ದಿನವನ್ನು ಸಂಭ್ರಮದಿಂದ ಆಚರಿಸುತ್ತಾರೆ. ಹಬ್ಬದ ದಿನದಂದು ಟಿಬೆಟಿಯನ್ ಬೌದ್ಧ ಮಂದಿರಗಳಲ್ಲಿ ವಿಶೇಷ ಪ್ರಾರ್ಥನೆಗಳು ಜರುಗುತ್ತವೆ.
ಬೌದ್ಧ ಭಿಕ್ಕುಗಳು ಮತ್ತು ಸಾರ್ವಜನಿಕರು ಬೌದ್ಧ ಮಂದಿರಗಳಿಗೆ ಭೇಟಿ ನೀಡಿ ಬೆಣ್ಣೆಯ ದೀಪಗಳನ್ನು ಬೆಳಗಿ. ಸಮುದಾಯದ ಹಿರಿಯರು ಮತ್ತು ಕಿರಿಯರು ಪರಸ್ಪರ ‘ತಾಶಿ ದೆಲೆಕ್’ (ಶುಭವಾಗಲಿ) ಎಂದು ಶುಭಾಶಯ ವಿನಿಮಯ ಮಾಡಿಕೊಳ್ಳುತ್ತಾರೆ.
ಹಬ್ಬದ ಮೊದಲ ದಿನ ಧಾರ್ಮಿಕ ವಿಧಿವಿಧಾನಗಳಿಗೆ ಆದ್ಯತೆ ನೀಡಲಾಗುತ್ತದೆ, ಎರಡನೇ ದಿನ ಧರ್ಮಗುರುಗಳಾದ ದಲೈ ಲಾಮಾ ಅವರ ದೀರ್ಘಾಯುಷ್ಯಕ್ಕಾಗಿ ವಿಶೇಷ ಪ್ರಾರ್ಥನೆ ಸಲ್ಲಿಸಲಾಗುವುದು ಎಂದು ಬೌದ್ಧ ಸನ್ಯಾಸಿಗಳು ತಿಳಿಸಿದ್ದಾರೆ.
ಈ ಸುದ್ದಿ ಓದಿದ್ದೀರಾ ? ಕಾರವಾರ | ಗಡಿಭಾಗದ ಕನ್ನಡ ಶಾಲೆಯಲ್ಲಿ ಪುಂಡರ ಅಟ್ಟಹಾಸ: ನೀರಿನ ತೊಟ್ಟಿಗೆ ಮೂತ್ರ ವಿಸರ್ಜಿಸಿ ವಿಕೃತಿ!
ದೂರದ ಊರುಗಳಲ್ಲಿ ಉದ್ಯೋಗ ಮತ್ತು ಶಿಕ್ಷಣಕ್ಕಾಗಿ ತೆರಳಿದ್ದ ಯುವಕರು ಈ ಹಬ್ಬಕ್ಕಾಗಿ ತವರಿಗೆ ಮರಳಿ ಬಂದು ಕುಟುಂಬದವರೊಂದಿಗೆ ಸಾಂಪ್ರದಾಯಿಕ ಉಡುಪುಗಳನ್ನು ಧರಿಸಿಕೊಂಡು ಸಂತೋಷದಿಂದ ಹೊಸ ವರ್ಷವನ್ನು ಬರಮಾಡಿಕೊಳ್ಳಲಿದ್ದಾರೆ.
ರಾಜ್ಯದ ಮುಂಡಗೋಡ, ಬೈಲಕುಪ್ಪೆ, ಹುಣಸೂರು ಮಾತ್ರವಲ್ಲದೆ ಲಡಾಖ್ ಮತ್ತು ಧರ್ಮಶಾಲಾಗಳಲ್ಲಿಯೂ ಲೋಸಾರ್ ಹಬ್ಬದ ಸಡಗರ ಮುಗಿಲು ಮುಟ್ಟಿದೆ. ಶಾಂತಿ, ನೆಮ್ಮದಿ ಮತ್ತು ಸಮೃದ್ಧಿಯ ಬದುಕಿಗಾಗಿ ಪ್ರಾರ್ಥಿಸುವ ಮೂಲಕ ಟಿಬೆಟಿಯನ್ ಬಾಂಧವರು ತಮ್ಮ ಹೊಸ ವರ್ಷವನ್ನು ಶ್ರದ್ಧೆ ಮತ್ತು ಭಕ್ತಿಯಿಂದ ಬರಮಾಡಿಕೊಳ್ಳುತ್ತಿದ್ದಾರೆ.
