ಸಿದ್ದಾಪುರ: ತಾಲೂಕಿನ ಸೋವಿನಕೊಪ್ಪ ಗ್ರಾಮ ಪಂಚಾಯತ್ ವ್ಯಾಪ್ತಿಯ ಹುಲ್ಕುತ್ರಿ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯ ವಿದ್ಯಾರ್ಥಿಗಳು ಇತ್ತೀಚೆಗೆ ಇಕೋ ಕ್ಲಬ್ ವತಿಯಿಂದ ಹಮ್ಮಿಕೊಂಡಿದ್ದ ‘ಪ್ರಕೃತಿ ನಡಿಗೆ’ ಹಾಗೂ ಕ್ಷೇತ್ರ ಅಧ್ಯಯನದ ಮೂಲಕ ಇತಿಹಾಸದ ಕುತೂಹಲಕಾರಿ ಮಾಹಿತಿಗಳನ್ನ ಕಣ್ಣಾರೆ ಕಂಡು ಆನಂದಿಸಿದರು.
ಸೋಮನದಿ ತೀರದ ಒಕ್ಕೋಟಿಯ ಪರಿಸರದಲ್ಲಿ ಸಂಚರಿಸಿದ ವಿದ್ಯಾರ್ಥಿ ತಂಡವು, ಅಲ್ಲಿನ ಪ್ರಾಚೀನ ಜೈನರ ವಸತಿ ನೆಲೆಗಳನ್ನು ವೀಕ್ಷಿಸಿತು. ಅಂದಿನ ಕಾಲದ ಜೈನರು ವಾಸಿಸುತ್ತಿದ್ದ ಮನೆಗಳ ಪಳೆಯುಳಿಕೆಗಳು, ಅವರು ಪೂಜಿಸುತ್ತಿದ್ದ ನಾಗರ ಮೂರ್ತಿ, ಪದ್ಮಾವತಿ ವಿಗ್ರಹ ಹಾಗೂ ಶಾಸನಗಳನ್ನೊಳಗೊಂಡ ಶಿಲಾ ಫಲಕಗಳನ್ನು ಕಂಡು ಮಕ್ಕಳು ಅಚ್ಚರಿ ವ್ಯಕ್ತಪಡಿಸಿದರು.
ಅಲ್ಲದೆ, ಪುರಾತನ ಕಾಲದ ಭತ್ತ ಕುಟ್ಟುವ ಒರಳುಗಳನ್ನು ವೀಕ್ಷಿಸುವ ಮೂಲಕ ಅಂದಿನ ಜನರ ಜೀವನಶೈಲಿಯ ಬಗ್ಗೆ ಮಾಹಿತಿ ಪಡೆದುಕೊಂಡರು. ಒಕ್ಕೋಟಿಯಿಂದ ಸುಮಾರು ಒಂದು ಕಿಲೋ ಮೀಟರ್ ದೂರದಲ್ಲಿ ಜೈನರು ಬಳಸುತ್ತಿದ್ದ ಮಣ್ಣಿನ ಪಾತ್ರೆಗಳು ಮತ್ತು ಮಡಿಕೆಗಳು ಪತ್ತೆಯಾಗಿವೆ.
ವಿಶೇಷವೆಂದರೆ, ಕೆಲವು ಮಡಿಕೆಗಳ ಮೇಲೆ ಮನುಷ್ಯನ ಮುಖದ ಚಿತ್ರಣಗಳಿದ್ದು, ಇವು ಇಂದಿಗೂ ಸುಸ್ಥಿತಿಯಲ್ಲಿರುವುದು ವಿಶೇಷ. ಇನ್ನು ಅನೇಕ ಪಳೆಯುಳಿಕೆಗಳು ಮಣ್ಣಿನ ಅಡಿಯಲ್ಲಿ ಹೂತುಹೋಗಿದ್ದು, ಇವುಗಳ ಐತಿಹಾಸಿಕ ಮಹತ್ವದ ಕುರಿತು ಮಾರ್ಗದರ್ಶಕರಾದ ಜನಾರ್ಧನ ತಿಮ್ಮ ಗೌಡ ಅವರು ವಿದ್ಯಾರ್ಥಿಗಳಿಗೆ ಸವಿಸ್ತಾರವಾಗಿ ವಿವರಿಸಿದರು.
ಅಧ್ಯಯನದ ಜೊತೆಗೆ ಪ್ರಕೃತಿ ನಡಿಗೆಯನ್ನು ಕೈಗೊಂಡ ಮಕ್ಕಳು, ಸೋಮನದಿಯ ಮನಮೋಹಕ ದೃಶ್ಯವನ್ನು ಸವಿದರು. ಕಾಡಿನಲ್ಲಿ ಕಂಡುಬರುವ ವಿವಿಧ ಜಾತಿಯ ಮರಗಳು, ಬಳ್ಳಿಗಳು, ವನ್ಯಮೃಗಗಳ ಹಿಕ್ಕೆಗಳು ಹಾಗೂ ಸಾಂಬಾರ ಪದಾರ್ಥಗಳಾದ ದಾಲ್ಚಿನಿ ಮತ್ತು ರಾಮಪತ್ರೆಗಳ ಬಗ್ಗೆ ಪ್ರಾಯೋಗಿಕ ಜ್ಞಾನ ಪಡೆದರು.
ಈ ಸುದ್ದಿ ಓದಿದ್ದೀರಾ? ಕಾರವಾರ | ನೌಕಾಬಲಕ್ಕೆ ಆನೆಬಲ: ಕಲ್ವರಿ ಸಬ್ಮೆರಿನ್ ನಿರ್ವಹಣಾ ಕೇಂದ್ರ ಲೋಕಾರ್ಪಣೆ
ನದಿಯ ಸಮೀಪವಿರುವ ಸಣ್ಣ ಜಲಪಾತ ಹಾಗೂ ಹಿಂದೆ ತೆಪ್ಪ ನಡೆಸುತ್ತಿದ್ದ ಸ್ಥಳಗಳ ಬಗ್ಗೆಯೂ ಮಕ್ಕಳು ಕುತೂಹಲದಿಂದ ಮಾಹಿತಿ ಸಂಗ್ರಹಿಸಿದರು. ಈ ಅಪರೂಪದ ಶೈಕ್ಷಣಿಕ ಪ್ರವಾಸದಲ್ಲಿ ಶಾಲಾ ಶಿಕ್ಷಕರು ಹಾಗೂ ವಿದ್ಯಾರ್ಥಿಗಳು ಉತ್ಸಾಹದಿಂದ ಪಾಲ್ಗೊಂಡಿದ್ದರು.
ಇತಿಹಾಸದ ಕುರುಹುಗಳನ್ನು ಸಂರಕ್ಷಿಸುವ ಮತ್ತು ಪರಿಸರದ ಬಗ್ಗೆ ಅರಿವು ಮೂಡಿಸುವ ಉದ್ದೇಶದಿಂದ ಹಮ್ಮಿಕೊಂಡಿದ್ದ ಈ ಕಾರ್ಯಕ್ರಮಕ್ಕೆ ಮಾರ್ಗದರ್ಶಕರಾದ ಜನಾರ್ಧನ ತಿಮ್ಮ ಗೌಡ ಅವರು ಸಾಥ್ ನೀಡಿದರು.
