ಶಿರಸಿ: ನಗರದ ನಟರಾಜ ರಸ್ತೆಯಲ್ಲಿರುವ “ಶ್ರೀ ದುರ್ಗಾ ಜ್ಯುವೇಲರಿ ವರ್ಕ್ಸ್” ಎಂಬ ಚಿನ್ನದ ಅಂಗಡಿಯಲ್ಲಿ ಗ್ರಾಹಕರ ಸೋಗಿನಲ್ಲಿ ಬಂದ ಮೂವರು ಬುರ್ಕಾಧಾರಿ ಮಹಿಳೆಯರು ಸುಮಾರು 13.38 ಲಕ್ಷ ರೂಪಾಯಿ ಮೌಲ್ಯದ ಚಿನ್ನಾಭರಣಗಳನ್ನು ಕಳ್ಳತನ ಮಾಡಿರುವ ಘಟನೆ ನಡೆದಿದೆ.
ದೇವಿಕೆರೆ ಪಡ್ತಿಗಲ್ಲಿ ನಿವಾಸಿ ರಾಜೇಶ್ ಗಣಪತಿ ಶೇಟ್ ಎಂಬುವವರು ಕಳೆದ 21 ವರ್ಷಗಳಿಂದ ಚಿಲುಮೆಕೆರೆ ಎದುರು ಈ ಆಭರಣದ ಅಂಗಡಿಯನ್ನು ನಡೆಸುತ್ತಿದ್ದಾರೆ. ಡಿಸೆಂಬರ್ 16ರಂದು ಸಂಜೆ ಇವರು ಎಂದಿನಂತೆ ವ್ಯಾಪಾರದಲ್ಲಿ ತೊಡಗಿದ್ದಾಗ, ಸುಮಾರು 5:45 ಗಂಟೆಗೆ ಬುರ್ಕಾ ಧರಿಸಿದ ಮೂವರು ಮಹಿಳೆಯರು ಅಂಗಡಿಗೆ ಪ್ರವೇಶಿಸಿದ್ದಾರೆ.
ಆಭರಣಗಳನ್ನು ಖರೀದಿಸುವವರಂತೆ ನಟಿಸಿ, ವಿವಿಧ ಮಾದರಿಯ ಝುಮಕಿ ಹಾಗೂ ಓಲೆಗಳನ್ನು ತೋರಿಸುವಂತೆ ಮಾಲೀಕರನ್ನು ಕೇಳಿದ್ದಾರೆ.ವ್ಯಾಪಾರ ಮಾಡುವ ಭರದಲ್ಲಿದ್ದ ಮಾಲೀಕರ ಗಮನವನ್ನು ಬೇರೆಡೆಗೆ ಸೆಳೆದ ಈ ಕಿಲಾಡಿ ಮಹಿಳೆಯರು, ಸಮಯ ಸಾಧಿಸಿ ತಮಗೆ ಬೇಕಾದ ಆಭರಣಗಳನ್ನು ಅತೀ ಚಾಕಚಕ್ಯತೆಯಿಂದ ಎಗರಿಸಿದ್ದಾರೆ.
ಸಂಜೆ 6:45ರ ಸುಮಾರಿಗೆ ಅಲ್ಲಿಂದ ನಿರ್ಗಮಿಸಿದ ನಂತರ ಕಳ್ಳತನವಾಗಿರುವುದು ಮಾಲೀಕರ ಗಮನಕ್ಕೆ ಬಂದಿದೆ. ಅಂದಾಜು 103.750 ಗ್ರಾಂ ತೂಕದ ವಿವಿಧ ಚಿನ್ನದ ಆಭರಣಗಳು ಕಾಣೆಯಾಗಿದ್ದು, ಇವುಗಳ ಒಟ್ಟು ಮೌಲ್ಯ 13,38,000/- ರೂಪಾಯಿ ಎಂದು ಅಂದಾಜಿಸಲಾಗಿದೆ.
ಈ ಸುದ್ದಿ ಓದಿದ್ದೀರಾ? ಮುಂಡಗೋಡ-ಹಳಿಯಾಳದ ಮದ್ಯ-ಮಟ್ಕಾ ಅಡ್ಡೆಗಳ ಮೇಲೆ ಪೊಲೀಸ್ ದಾಳಿ; ಪಾಳಾ ಭಾಗದ ಮಟ್ಕಾ ದಂಧೆಗೆ ಬೀಳುತ್ತಾ ಬ್ರೇಕ್?
ಈ ಕುರಿತು ರಾಜೇಶ್ ಅವರು ಡಿಸೆಂಬರ್ 26ರಂದು ಶಿರಸಿ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿರುವ ಪೊಲೀಸರು, ಬಿ.ಎನ್.ಎಸ್ (BNS) ಸೆಕ್ಷನ್ 305ರ ಅಡಿಯಲ್ಲಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.
