ಮಂಗಳವಾರ (ಏ.9) ಶವ್ವಾಲ್ ಚಂದ್ರ ದರ್ಶನದ ನಂತರ ಇಂದು (ಏ.10) ಈದ್ ಉಲ್ ಫಿತರ್ ಹಬ್ಬದ ಘೋಷಣೆಯಾಗಿತ್ತು. ಮುಸ್ಲಿಂ ಬಾಂಧವರು ಉಡುಪಿ, ಉ.ಕ ಮತ್ತು ದಕ್ಷಿಣ ಕನ್ನಡ ಜಿಲ್ಲೆಗಳಲ್ಲಿ ಸಂಭ್ರಮದ ಈದ್ ಉಲ್ ಫಿತರ್ ಆಚರಣೆ ನಡೆಸಿದರು.
ಚಂದ್ರ ದರ್ಶನದ ನಂತರ ಬಡವರಿಗೆ ಫಿತ್ ಝಕಾತ್ ಹಂಚಿದ ಮುಸ್ಲಿಮ್ ಬಾಂಧವರು ಮಸೀದಿ, ಈದ್ಗಾಗಳಿಗೆ ಹೊಸ ಉಡುಪು ಧರಿಸಿ ಬಂದು ಈದ್ ನಮಾಝ್ ಮಾಡಿದರು. ನಮಾಝಿನ ನಂತರ ಮಸೀದಿ, ಈದ್ಗಾಗಳಲ್ಲಿ ಖುತ್ವಾ (ಪ್ರಭಾಷಣ) ನೆರೆವೇರಿತು. ನಂತರ ಹಿರಿಯರು, ಕಿರಿಯರು ಪರಸ್ಪರ ಶುಭಾಶಯ ವಿನಿಮಯ ಮಾಡಿಕೊಳ್ಳುವ ದೃಶ್ಯಗಳು ನಗರದಲ್ಲಿ ಸಾಮಾನ್ಯವಾಗಿ ಕಂಡು ಬಂತು.
ರಂಝಾನಿನ ಒಂದು ತಿಂಗಳ ಉಪವಾಸದ ನಂತರ ಈದ್ ಉಲ್ ಫಿತರ್ ಹಬ್ಬವನ್ನು ಮುಸ್ಲಿಮರು ಆಚರಿಸುತ್ತಿದ್ದು, ಇದನ್ನು ದಾನ ಧರ್ಮಗಳ ಹಬ್ಬ ಎಂದು ಕರೆಯಲಾಗುತ್ತದೆ.
