ಅಂದು ಆದಿ ಉಡುಪಿಯಲ್ಲಿ ದನ ಕದ್ದರೆಂಬ ಕ್ಷುಲ್ಲಕ ಕಾರಣನೀಡಿ ಹಾಜಬ್ಬ ಮತ್ತು ಹಸನಬ್ಬರನ್ನು 2004 ರಲ್ಲಿ ಬೆತ್ತಲೆ ಗೊಳಿಸಿ ಥಳಿಸಿದಾಗಲೇ ಬ್ರಾಂಡ್ ಉಡುಪಿಯ ಘನತೆಗೆ ಧಕ್ಕೆ ಆಗಿದೆ. ಆನಂತರ ಸರಣಿ ಕೋಮುವಾದಿ ಘಟನೆಗಳು ಉಡುಪಿಯ ಘನತೆಯನ್ನು ಹರಾಜು ಹಾಕಿದ್ದಾವೆ, ಸರಿಪಡಿಸಲಾಗದ ಧಕ್ಕೆಯನ್ನುಂಟು ಮಾಡಿದ್ದಾವೆ.
ಕೊಕ್ಕರ್ಣೆ ಪಾದೇ ಮಠದಲ್ಲಿ ತಮ್ಮದೇ ಪಕ್ಷದ ಕಾರ್ಯಕರ್ತ ಪ್ರವೀಣ ಪೂಜಾರಿಯನ್ನು ಟೆಂಪೋದಲ್ಲಿ ದನಗಳನ್ನು ಬಾಡಿಗೆ ಮಾಡುವಾಗ ನಿಮ್ಮದೇ ಪಕ್ಷದ ಕಾರ್ಯಕರ್ತರು ಹೊಡೆದು ಕೊಂದರಲ್ಲಾ ಆಗ ಉಡುಪಿಯ ಘನತೆಗೆ ಧಕ್ಕೆ ಆಗಲಿಲ್ಲವೇ , ಒಂದು ಧರ್ಮದ ಸಂಪ್ರದಾಯ, ಆಚರಣೆಗೆ ಅಡ್ಡಿಪಡಿಸಿ ಹಿಜಾಬ್ ಧರಿಸಿ ಕಾಲೇಜಿಗೆ ಬರುವ ಹಾಗಿಲ್ಲಾ ಎಂದು ಹುಯಿಲೆಬ್ಬಿಸಿ ಇಡೀ ವಿಶ್ವದಲ್ಲೇ ಉಡುಪಿ ತಲೆ ತಗ್ಗಿಸುವಂತೆ ಮಾಡಿ, ಆ ವಿದ್ಯಾರ್ಥಿಗಳ ಭವಿಷ್ಯಕ್ಕೇ ಕೊಳ್ಳಿ ಇಟ್ಟೀರಲ್ಲಾ ಆಗ ಉಡುಪಿಯ ಘನತೆಗೆ ಧಕ್ಕೆ ಆಗಲಿಲ್ಲವೇ? ಮೊನ್ನೆ ಮೊನ್ನೆಯಷ್ಟೇ ಮೀನು ಕದ್ದರೆಂಬ ಸಣ್ಣ ಕಾರಣಕ್ಕೆ ಒಬ್ಬ ದಲಿತ ಮಹಿಳೆಯನ್ನು ಮರಕ್ಕೆ ಕಟ್ಟಿ ಸಾರ್ವಜನಿಕವಾಗಿ ವಿಡಿಯೋ ಮಾಡುತ್ತಾ ಹೊಡೆದರಲ್ಲಾ ಆಗ ಉಡುಪಿಯ ಘನತೆಗೆ ಧಕ್ಕೆ ಬರಲಿಲ್ಲವೇ? ಅದೂ ಇರಲೀ ಒಬ್ಬ ಜನ ಪ್ರತಿನಿಧಿಯಾಗಿ ಅದೇ ಹಲ್ಲೆಗೊಳಗಾದ ಮಹಿಳೆಯನ್ನು ಕೇಸ್ ವಾಪಾಸು ಪಡೆಯುವಂತೆ ಒತ್ತಾಯಿಸಿ ಇಡೀ ಸಮೂದಾಯವನ್ನೇ ಎತ್ತಿಕಟ್ಟಿ ಉಡುಪಿ ಜಿಲ್ಲಾಧಿಕಾರಿಯವರ ಕಛೇರಿ ಎದುರು ಮೆರವಣಿಗೆ ನಡೆಸಿ ಸಂತ್ರಸ್ತ ಮಹಿಳೆಯಿಂದಲೇ ಕೇಸು ವಾಪಾಸು ಪಡೆಯುವ ಮನವಿ ಕೊಡಿಸಿದಿರಲ್ಲಾ ಆಗ ಅಷ್ಟ ಮಠಗಳ ತವರೂರಾದಾ ಕನಕದಾಸರ ಭಕ್ತಿಗೆ ಮೆಚ್ಚಿ ತಿರುಗಿ ನಿಂತ ಕ್ರಷ್ಣ ನೆಲೆನಿಂತಿರುವ ಉಡುಪಿಯ ಘನತೆಗೆ ಧಕ್ಕೆ ಆಗಲಿಲ್ಲವೇ. ಈಗ ಹೇಳಿ ಉಡುಪಿಯ ಘನತೆಗೆ ಧಕ್ಕೆ ತಂದವರು ಯಾರು? ಎಂದು ಕರ್ನಾಟಕ ದಲಿತ ಸಂಘರ್ಷ ಸಮಿತಿ ಅಂಬೇಡ್ಕರ್ ವಾದ ಇದರ ಮೈಸೂರು ವಿಭಾಗೀಯ ಸಂಘಟನಾ ಸಂಚಾಲಕರಾದ ಶ್ಯಾಮರಾಜ್ ಬಿರ್ತಿಯವರು ಪ್ರಶ್ನಿಸಿದ್ದಾರೆ.
