ಉತ್ತರ ಕನ್ನಡ ಜಿಲ್ಲೆಯಲ್ಲಿ ಆನ್ಲೈನ್ ಕೆಲಸದ ಆಮಿಷ ತೋರಿಸಿ ಖಾಸಗಿ ನೌಕರಿ ಮಾಡುತ್ತಿದ ಮಹಿಳೆಗೆ ಲಕ್ಷಾಂತರ ರೂಪಾಯಿ ವಂಚಿಸಿರುವ ಮತ್ತೊಂದು ಪ್ರಕರಣ ಬೆಳಕಿಗೆ ಬಂದಿದೆ. ಟೆಲಿಗ್ರಾಂನಲ್ಲಿ “Mishika” ಎಂದು ಪರಿಚಯಿಸಿಕೊಂಡ ವ್ಯಕ್ತಿಯಿಂದ ಬಂದ ಸಂದೇಶದ ಆಧಾರದ ಮೇಲೆ ಮಹಿಳೆ ಅವರು ‘ಮನೆಯಲ್ಲೇ ಕುಳಿತು ಪ್ರತಿ ದಿನ ₹3,000 ಗಳಿಸಬಹುದು’ ಎಂಬ ಮಾತನ್ನು ನಂಬಿ ಹೂಡಿಕೆ ಮಾಡಿದ್ದಾರೆ.
ನವೆಂಬರ್ 4ರಂದು ಟೆಲಿಗ್ರಾಂ ಮೂಲಕ ಬಂದ ಸಂದೇಶದಲ್ಲಿ ಆನ್ಲೈನ್ ಪಾರ್ಟ್–ಟೈಮ್ ಕೆಲಸವಿದೆ ಎಂದು ತಿಳಿಸಿ, ನಂತರ ವಾಟ್ಸಪ್ ಮೂಲಕ ಸಂಪರ್ಕ ಮಾಡುವುದಾಗಿ ಹೇಳಿ ಮಹಿಳೆಯ ಮೊಬೈಲ್ ಸಂಖ್ಯೆಗೆ 8985056339 ಎಂಬ ಸಂಖ್ಯೆಯಿಂದ ಸಂದೇಶ ಬಂದಿದೆ. ಆರೋಪಿಗಳು ಕಳುಹಿಸಿದ ಲಿಂಕ್ ಕ್ಲಿಕ್ ಮಾಡಿದಾಗ “RENT” ಎಂದು ಕಾಣಿಸಿಕೊಂಡ ವೆಬ್ಸೈಟ್ ತೆರೆದುಕೊಂಡಿದ್ದೆ. ಅಲ್ಲಿ ಲಾಗಿನ್ ಆದ ಮಹಿಳೆಗೆ ಹಲವು ಕಂಪನಿಗಳ ಉತ್ಪನ್ನಗಳಿಗೆ ರೇಟಿಂಗ್ ಹಾಗೂ ವಿಮರ್ಶೆ (ರಿವ್ಯೂ) ನೀಡುವುದು ಕೆಲಸ ಎಂದು ತಿಳಿಸಿ, ಮೊದಲ ಹಂತವಾಗಿ ₹10,000 ಹಣವನ್ನು ಡಿಪಾಸಿಟ್ ಮಾಡಲು ಸೂಚಿಸಲಾಗಿದೆ.
ವಂಚಕರು ಹೇಳಿದಂತೆ ಹಣ ಜಮಾ ಮಾಡಿದ ನಂತರ, ಲಾಭಾಂಶದ ಹೆಸರಿನಲ್ಲಿ ₹15,268 ಹಣ ಬಂದಿರುವಂತೆ ತೋರಿಸಿ ನಂಬಿಕೆ ಮೂಡಿಸಲಾಗಿದೆ. ಆ ನಂತರ ಇನ್ನೂ ಜಾಸ್ತಿ ಲಾಭ ಪಡೆಯಲು ಇನ್ನಷ್ಟು ಹಣ ಹೂಡಿಕೆ ಮಾಡುವಂತೆ ಆರೋಪಿಗಳು ಒತ್ತಾಯಿಸಿದ್ದು, ಮಹಿಳೆ ತಮ್ಮ ಪರಿಚಿತರ ಸಹಾಯದಿಂದ ಅವರು ಹೇಳಿದಂತೆ ವಿಭಿನ್ನ ಬ್ಯಾಂಕ್ ಖಾತೆಗಳಿಗೆ ಒಟ್ಟು ₹10,98,113 ಮೊತ್ತವನ್ನು ವರ್ಗಾವಣೆ ಮಾಡಿದ್ದಾರೆ. ಹೀಗೆ ಹಣ ಕಳುಹಿಸಿದ ಬಳಿಕ ಲಾಭಾಂಶವೂ ಬಾರದಿದ್ದು, ಹೂಡಿಕೆ ಮಾಡಿದ ಮೊತ್ತದ ಮರುಪಾವತಿಗೂ ಯಾವುದೇ ಮಾಹಿತಿ ಸಿಗದೆ ಸಂಪರ್ಕ ಸಂಪೂರ್ಣ ಕಡಿತಗೊಂಡಿರುವುದನ್ನು ಗಮನಿಸಿ ತಾವು ವಂಚನೆಗೆ ಒಳಗಾಗಿರುವುದು ಮಹಿಳೆಗೆ ಅರಿವಾಗಿದೆ. ಈ ಹಿನ್ನೆಲೆಯಲ್ಲಿ ಸಂಬಂಧಿತ ದಾಖಲೆಗಳಾದ ಬ್ಯಾಂಕ್ ಖಾತೆ ವಿವರಗಳು, ಟೆಲಿಗ್ರಾಂ ಹಾಗೂ ವಾಟ್ಸಪ್ ಸಂದೇಶಗಳ ಸ್ಕ್ರೀನ್ಶಾಟ್ಗಳನ್ನು ಸೇರಿಸಿ ಠಾಣೆಗೆ ದೂರು ಸಲ್ಲಿಸಿದ್ದಾರೆ.
ಈ ಸುದ್ದಿ ಓದಿದ್ದೀರಾ? ಉತ್ತರ ಕನ್ನಡ | ಅಬಕಾರಿ ಇಲಾಖೆಯ ಕಾರ್ಯಾಚರಣೆ; ಅಕ್ರಮ ಮದ್ಯ ಸೇರಿ ₹7 ಲಕ್ಷ ಮೌಲ್ಯದ ವಸ್ತುಗಳು ಜಪ್ತಿ
ಪೊಲೀಸರು ದೂರು ದಾಖಲಿಸಿಕೊಂಡು, ಆರೋಪಿಗಳ ಫೋನ್ ಸಂಖ್ಯೆ, ವೆಬ್ಸೈಟ್ ಮತ್ತು ಹಣ ಜಮಾ ಮಾಡಿದ ಖಾತೆಗಳ ಬಗ್ಗೆ ತನಿಖೆ ಆರಂಭಿಸಿದ್ದಾರೆ. ವಂಚನೆಯಲ್ಲಿ ಬಳಸಿದ ಲಿಂಕ್, ಮೊಬೈಲ್ ನಂಬರ್ ಹಾಗೂ ಸಂಬಂಧಿಸಿದ ಬ್ಯಾಂಕ್ ಖಾತೆಗಳ ಪರಿಶೀಲನೆಗಾಗಿ ಸೈಬರ್ ವಿಭಾಗದ ಸಹಾಯ ಪಡೆಯಲಾಗುತ್ತಿದೆ ಎಂದು ತಿಳಿದುಬಂದಿದೆ.
