ಅಂದುಕೊಂಡಿದ್ದು ಸರ್ಕಾರಿ ನೌಕರರು ಆಗಬೇಕೆಂದು, ಆಗಿದ್ದು ಮಾತ್ರ ಕೃಷಿಕ. ಆದರೆ ಇವತ್ತು ಸುತ್ತಮುತ್ತಲಿನ ಊರಿನ ರೈತರಿಗೆ ಮಾದರಿಯಾಗಿದ್ದಾರೆ. ಅಷ್ಟೇ ಅಲ್ಲದೆ ಕೆಲವು ಜನರಿಗೆ ಉದ್ಯೋಗಾವಕಾಶಗಳನ್ನೂ ಒದಗಿಸಿದ್ದಾರೆ.
ಕೃಷಿಯಲ್ಲಿ ಲಾಭ ಕಡಿಮೆ, ಬೆಳೆದ ಬೆಳೆಗಳಿಗೆ ಸೂಕ್ತ ಬೆಲೆ ಸಿಗುತ್ತಿಲ್ಲವೆಂದು ಹಲವು ರೈತರು ಬೇಸರ ವ್ಯಕ್ತಪಡಿಸುತ್ತಾರೆ. ಇವರ ಮಧ್ಯೆ ಕೃಷಿಯಲ್ಲಿ ಹೊಸ ಹೊಸ ಪದ್ಧತಿಗಳನ್ನು ಅಳವಡಿಸಿಕೊಂಡು ಉತ್ತಮ ಆದಾಯ ಹೊಂದಬಹುದು ಎನ್ನುವುದಕ್ಕೆ ಬಸವರಾಜ ನಡುವಿನಮನಿ ಅವರು ಮಾದರಿಯಾಗಿದ್ದಾರೆ.
ಉತ್ತರ ಕನ್ನಡ ಜಿಲ್ಲೆಯ ಯುವ ಕೃಷಿಕರಾಗಿರುವ ಇವರು ತಮ್ಮ ಜಮೀನಿನಲ್ಲಿ ಸಾವಯವ ಸಂಸ್ಕರಣಾ ಘಟಕ ಸ್ಥಾಪಿಸಿ, ಬಹುಪಾಲು ಸಾವಯವ ಕೃಷಿ ಪದ್ಧತಿಯಲ್ಲಿ ಬೇಸಾಯ ಮಾಡುತ್ತ ಉತ್ತಮ ಫಸಲು ಪಡೆಯುತ್ತಿದ್ದಾರೆ. ಸಮಗ್ರ ಕೃಷಿ ಪದ್ಧತಿ ಅಳವಡಿಸಿಕೊಂಡಿರುವ ಇವರು ಸಾವಯವ ಗೊಬ್ಬರದೊಂದಿಗೆ ರಾಸಾಯನಿಕ ಗೊಬ್ಬರವನ್ನೂ ಉಪಯೋಗಿಸುತ್ತಾರೆ. ಸುಮಾರು 63 ಎಕರೆ ಜಮೀನಿನಲ್ಲಿ ಅಡಕೆ, ಶ್ರೀಗಂಧ, ಮಹಾಗನಿ, ರಕ್ತ ಚಂದನ, ಕರಿಬೇವು, ಕಾಳು ಮೆಣಸು, ಏಲಕ್ಕಿ, ಹಲಸು, ಕಾಫಿ, ತೆಂಗು, ಮೆಕ್ಕೆಜೋಳ ಸೇರಿದಂತೆ ಮುಂತಾದ ಬೆಳೆಗಳನ್ನು ಬೆಳೆದು ಅಧಿಕ ಲಾಭ ಪಡೆದುಕೊಳ್ಳುತ್ತಿದ್ದಾರೆ. ಇದರ ಜತೆಗೆ ಹೈನುಗಾರಿಕೆ, ಜೇನು ಸಾಕಾಣಿಕೆಯೂ ಕೂಡಾ ಕೈಹಿಡಿದಿದೆ.
ರೈತ ಬಸವರಾಜ ಅವರು ಕೃಷಿ ಕ್ಷೇತ್ರದಲ್ಲಿ ಮಾಡಿದ ಸಾಧನೆಗೆ ಅನೇಕ ಪ್ರಶಸ್ತಿಗಳು ಬಂದಿವೆ. ಅದರಲ್ಲಿ ಮುಖ್ಯವಾಗಿ ಕೃಷಿ ಕಾಡು ಕರ್ತಾರು ಪ್ರಶಸ್ತಿ, ತಾಲೂಕು ಮಟ್ಟದ ಶ್ರೇಷ್ಠ ಕೃಷಿಕ ಪ್ರಶಸ್ತಿ, ಜಿಲ್ಲಾ ಮಟ್ಟದ ಯುವ ಶ್ರೇಷ್ಠ ಕೃಷಿಕ ಪ್ರಶಸ್ತಿ, ಬಾಗಲಕೋಟೆ ತೋಟಗಾರಿಕಾ ವಿಶ್ವ ವಿದ್ಯಾಲಯದ ರಾಜ್ಯಮಟ್ಟದ ಶ್ರೇಷ್ಠ ತೋಟಗಾರಿಕಾ ಪ್ರಶಸ್ತಿ, ಧಾರವಾಡ ಕೃಷಿ ವಿಶ್ವ ವಿದ್ಯಾಲಯದ ಶ್ರೇಷ್ಠ ಕೃಷಿಕ ಪ್ರಶಸ್ತಿ, ದೆಹಲಿಯ ಕೃಷಿ ಜಾಗರಣ ಅಸೋಸಿಯೇಷನ್ ನೀಡುವ ಮಿಲಿಯನೇರ್ ಫಾರ್ಮರ್ ಆಫ್ ಇಂಡಿಯಾ(ಎಂಎಸ್ಒಐ) ಪ್ರಶಸ್ತಿ, ಅಂಕೋಲಾದ ಗಾಂವಕರ್ ಮೆಮೋರಿಯಲ್ ಫೌಂಡೇಶನ್ ಪ್ರಶಸ್ತಿ ಸೇರಿದಂತೆ ಹತ್ತು ಹಲವಾರು ಪ್ರಶಸ್ತಿಗಳು ಸಂದಿವೆ. ಇದಲ್ಲದೇ ಅನೇಕ ಸಂಘ-ಸಂಸ್ಥೆಗಳೂ ಕೂಡ ಗೌರವಿಸಿವೆ.
ಬಸವರಾಜ ಅವರು ರೈತರು ಅರಣ್ಯ ಕೃಷಿಯನ್ನು ಮಾಡಿ ಆರ್ಥಿಕವಾಗಿ ಸಬಲರಾಗಲಿ ಎಂಬ ಉದ್ದೇಶದಿಂದ ವಿಶ್ವ ಪರಿಸರ ದಿನದಂದು ತಮ್ಮ ತೋಟದಲ್ಲಿ ರೈತರನ್ನು ಸೇರಿಸಿ ಅರಣ್ಯ ಕೃಷಿ ಮಹತ್ವವನ್ನು ತಿಳಿಸಿ, ಉಚಿತವಾಗಿ ಸಸಿಗಳನ್ನು ನೀಡುತ್ತ ಬರುತ್ತಿದ್ದಾರೆ.
ಇದಲ್ಲದೇ ಕೃಷಿ ಕಾರ್ಯಕ್ರಮ, ಕೃಷಿ ತರಬೇತಿಗಳಲ್ಲಿ ಸಂಪನ್ಮೂಲ ವ್ಯಕ್ತಿಯಾಗಿ ಪಾಲ್ಗೊಂಡು ರೈತರಿಗೆ ತಿಳುವಳಿಕೆ ನೀಡುವ ಕಾರ್ಯ ಮಾಡುತ್ತಿದ್ದಾರೆ.
ಇವರು ಅಂದುಕೊಂಡಿದ್ದು ಸರ್ಕಾರಿ ನೌಕರರು ಆಗಬೇಕೆಂದು, ಆಗಿದ್ದು ಮಾತ್ರ ಕೃಷಿಕ. ಆದರೆ ಇವತ್ತು ಸುತ್ತಮುತ್ತಲಿನ ಊರಿನ ರೈತರಿಗೆ ಮಾದರಿಯಾಗಿದ್ದಾರೆ. ಅಷ್ಟೇ ಅಲ್ಲದೆ ಕೆಲವು ಜನರಿಗೆ ಉದ್ಯೋಗಾವಕಾಶಗಳನ್ನೂ ಒದಗಿಸಿದ್ದಾರೆ. ಇದೀಗ ಕೃಷಿಯಲ್ಲಿ ಯಶಸ್ಸು ಗಳಿಸಿ ಸಾಧಕ ಕೃಷಿಕ ಎನಿಸಿದ್ದಾರೆ.
ಕೃಷಿ ಎಂದರೆ ಮೂಗು ಮುರಿಯುವ ಇಂದಿನ ದಿನಮಾನದಲ್ಲಿ ಎಲ್ಲರೂ ಹುಬ್ಬೇರುವಂತೆ ಬಸವರಾಜ ನಡುವಿನಮನಿ ಕೃಷಿಯಲ್ಲಿ ಸಾಧನೆ ಮಾಡಿದ್ದಾರೆ.
ಉತ್ತರ ಕನ್ನಡ ಜಿಲ್ಲೆಯ ಮುಂಡಗೋಡ ತಾಲೂಕಿನ ಹುಲಿಹೊಂಡ ಗ್ರಾಮದ ನಿವಾಸಿ ಬಸವರಾಜ ಅವರು ರೈತನ ಮಗನಾದರೂ ತನ್ನ ತಂದೆಯ ಆಸೆಯಂತೆಯೇ ಪೊಲೀಸ್ ಅಧಿಕಾರಿಯಾಗಬೇಕೆಂಬ ದೊಡ್ಡ ಕನಸು ಕಂಡಿದ್ದರು. ಆದರೆ, ಸಬ್ ಇನ್ಸ್ಪೆಕ್ಟರ್ ಪರೀಕ್ಷೆಯಲ್ಲಿ ಉತ್ತೀರ್ಣರಾಗಿ ಅಂತಿಮ ಪಟ್ಟಿಯಲ್ಲಿ ಹೆಸರು ಬಾರದ ಕಾರಣ ಕೃಷಿಯತ್ತ ಮುಖ ಮಾಡಿ, ಅಮೋಘ ಸಾಧನೆ ಮಾಡಿದ್ದಾರೆ. ಇಂದು ಬಸವರಾಜ ಅವರು ತಿಂಗಳಿಗೆ ಲಕ್ಷ ಲಕ್ಷ ಸಂಪಾದನೆ ಮಾಡುತ್ತಿದ್ದಾರೆ.
ತಂದೆ ರೈತರಾಗಿದ್ದು, ತಮ್ಮ ಮಕ್ಕಳು ವಿದ್ಯಾವಂತರಾಗಿ ಉನ್ನತ ಅಧಿಕಾರಿಗಳಾಗಬೇಕೆಂಬ ಕನಸು ಕಂಡಿದ್ದರು. ಅದರಂತೆ ಮಕ್ಕಳಿಗೆ ಉತ್ತಮ ಶಿಕ್ಷಣ ಕೊಡಿಸಿದ್ದಾರೆ.
“2012ರಲ್ಲಿ ಧಾರವಾಡಕ್ಕೆ ಬಂದು ಸ್ಪರ್ಧಾತ್ಮಕ ಪರೀಕ್ಷೆಗಳಿಗೆ ತರಬೇತಿ ನಡೆಸಿ ಅನೇಕ ಸ್ಪರ್ಧಾತ್ಮಕ ಪರೀಕ್ಷೆಗಳನ್ನು ಎದುರಿಸಿದೆ. 2017ರಲ್ಲಿ ಸಬ್ ಇನ್ಸ್ಪೆಕ್ಟರ್ ಪರೀಕ್ಷೆಯಲ್ಲಿ ಉತ್ತೀರ್ಣನಾಗಿ ಅಂತಿಮ ಸಂದರ್ಶನದಲ್ಲಿ ಕಾರಣಾಂತರಗಳಿಂದ ನೇಮಕಗೊಳ್ಳಲಿಲ್ಲ. ಇದಾದ ಬಳಿಕ ದಿಕ್ಕೇ ತೋಚದಂತಾಯಿತು. ಆಮೇಲೆ ತನ್ನ ಗುರಿಯನ್ನು ಬದಲಾಯಿಸಿಕೊಂಡು ಕೃಷಿಕನಾಗಬೇಕು ಎಂದು ಬಯಸಿದೆ. ಈ ನಿರ್ಧಾರಕ್ಕೆ ಪೋಷಕರು, ಸಹೋದರರು, ಸ್ನೇಹಿತರು, ನೆರೆಹೊರೆಯವರು ಆಶ್ಚರ್ಯ ವ್ಯಕ್ತಿಪಡಿಸಿದರು. ಆಲ್ಲದೆ ಕೃಷಿ ಮಾಡುವುದು ಸುಲಭದ ಕೆಲಸವಲ್ಲ. ಮತ್ತೊಮ್ಮೆ ಆಲೋಚಿಸು ಎಂಬಂತಹ ಸಲಹೆ ನೀಡಿದ್ದರು. ಇದ್ಯಾವುದಕ್ಕೂ ಕಿವಿ ಕೊಡದೆ ಕೃಷಿಯಲ್ಲೇ ಸಾಧನೆ ಮಾಡಬೇಕೆಂಬ ಹಠಕ್ಕೆ ಬಿದ್ದೆ. ಹಾಗಾಗಿ ನನ್ನ ತಂದೆ ಈರಯ್ಯ ಹಾಗೂ ಸಮಸ್ತ ಕುಟುಂಬಸ್ಥರು ನೆರವಿಗೆ ನಿಂತರು” ಎಂವುದು ಬಸವರಾಜ ಅವರ ಮಾತುಗಳು.
“ಮನೆಯವರ ನೆರವಿನಂತೆ ಪ್ರಾಯೋಗಿಕವಾಗಿ ಮೊದಲಿಗೆ ನಮ್ಮ ತಂದೆಯೊಂದಿಗೆ ಜಮೀನಿನಲ್ಲಿ ದುಡಿದೆ. ಈ ವೇಳೆ ಅಡಕೆ ಬೆಳೆಯನ್ನು ನೆಟ್ಟಿದ್ದೆವು. ಆದರೆ, ರಾಸಾಯನಿಕ ಗೊಬ್ಬರ ಸಿಂಪಡಣೆ ಹಾಗೂ ಅನಿರೀಕ್ಷಿತ ಹವಾಮಾನ ಬದಲಾವಣೆಯಿಂದ ಬೆಳೆಗಳು ಹಾನಿಯಾಗಿದ್ದವು. ಆದರೂ, ಕುಗ್ಗಲಿಲ್ಲ. ಸೋಲೇ ಯಶಸ್ಸಿನ ಮೊದಲ ಮೆಟ್ಟಿಲು ಎಂಬುದನ್ನು ಗಮನದಲ್ಲಿಟ್ಟುಕೊಂಡು ಮುಂದೆ ಸಾಗಿದೆ. ಬಳಿಕ ಹುಲಿಹೊಂಡದ 63 ಎಕರೆ ಜಮೀನಿನಲ್ಲಿ ಕೃಷಿ ಮಾಡಿ, ಈಗ ಆರೋಗ್ಯಕರ ಬೆಳೆ ಬೆಳೆದಿದ್ದೇನೆ. ಇದಕ್ಕಾಗಿ ವಿವಿಧ ಕ್ಷೇತ್ರಗಳಿಗೆ ಭೇಟಿ ಮಾಹಿತಿ ಸಂಗ್ರಹಿಸಿದೆ, ಅಲ್ಲದೆ ವ್ಯವಸಾಯದಲ್ಲಿ ಪರಿಣಿತರಾಗಿರುವ ನನ್ನ ತಂದೆಯವರಿಂದಲೂ ಸಲಹೆ ಪಡೆದುಕೊಂಡಿದ್ದೇನೆ” ಎಂದರು.
“ಈ ಸಲ ಮುಂಗಾರು ಪೂರ್ವ ಮಳೆ ಹಾಗೂ ಬೇಸಿಗೆ ಕಾಲದಲ್ಲಿ ವಿಪರೀತ ಬಿಸಿಲಿನಿಂದ ಹಾಗೂ ಅದು ಸಾಲದೆಂಬಂತೆ ಬಿಟ್ಟೂ ಬಿಡದೆ ಈಗ ಸುರಿಯುತ್ತಿರುವ ಮಳೆಯಿಂದ ರೈತರು ಹೈರಾಣಾಗಿದ್ದಾರೆ. ಆ ಸಾಲಿನಲ್ಲಿ ರೈತರು ಅಡಕೆ ಬೆಳೆಯಿಂದ ನಷ್ಟ ಸಂಭವಿಸುವ ಭಯದಲ್ಲಿದ್ದಾರೆ. ಇನ್ನೂ 15ದಿನ ಇದೇ ರೀತಿ ಮಳೆ ಮುಂದುವರೆದರೆ ಅಡಕೆ ಸಂಪೂರ್ಣವಾಗಿ ನಾಶವಾಗುತ್ತದೆ. ಆದ್ದರಿಂದ ಸರ್ಕಾರ ರೈತರ ನೆರವಿಗೆ ಧಾವಿಸಿಬೇಕು. ನಷ್ಟ ಅನುಭವಿಸಿದ ಬೆಳೆಗಳನ್ನು ಸಮೀಕ್ಷೆ ಮಾಡಿಸಿ, ಬೆಳೆವಿಮೆ ಮಾಡಿಸಿ ಆದಷ್ಟು ಬೇಗ ರೈತರಿಗೆ ಪರಿಹಾರವನ್ನು ನೀಡುವಂತೆ ಬೆಳೆವಿಮೆ ಕಂಪನಿಗಳಿಗೆ ಸೂಚಿಸಬೇಕು” ಎಂದು ಸರ್ಕಾರಕ್ಕೆ ಮನವಿ ಮಾಡಿದರು.
ಇದನ್ನೂ ಓದಿದ್ದೀರಾ? ಉಡುಪಿ | ಸ್ಥಳ ಪರಿಶೀಲನೆ ಮಾಡದೆ ಸಾಲ ನೀಡಿದ್ದ ಬ್ಯಾಂಕ್? ಎರಡು ಕುಟುಂಬಗಳು ಬೀದಿಪಾಲು !
“ಇತ್ತಿಚಿನ ದಿನಗಳಲ್ಲಿ ಹಾರ್ಡ್ ವರ್ಕ್ ಜತೆಗೆ ಸ್ಮಾರ್ಟ್ ವರ್ಕ್ ಕೂಡಾ ಮುಖ್ಯವಾಗಿದೆ. ಈ ದಿಸೆಯಲ್ಲಿ ಹಿಡಿದ ಕೆಲಸವನ್ನು ಶ್ರದ್ದೆ, ಭಕ್ತಿ, ಪ್ರಮಾಣಿಕತೆಯಿಂದ ಮಾಡಬೇಕು. ಇದರಿಂದ ವ್ಯಕ್ತಿ ಯಶಸ್ಸು ಗಳಿಸಲು ಸಾಧ್ಯ. ಮುಂದಿನ ದಿನಗಳಲ್ಲಿ ಇನ್ನಷ್ಟು ಹೆಚ್ಚು ಕೃಷಿ ಜತೆಗೆ ಸಾಮಾಜಿಕ ಕಾರ್ಯಗಳನ್ನು ಮಾಡುವ ಇಂಗಿತವೂ ಇದೆ” ಎಂಬುದು ಆಧುನಿಕ ರೈತ ಬಸವರಾಜ ಅವರ ಅಭಿಪ್ರಾಯವಾಗಿದೆ.
ಸಾವಯವ ಕೃಷಿಯ ಜೊತೆಗೆ ಇತ್ತೀಚಿನ ಕೃಷಿ ಪದ್ಧತಿಗಳನ್ನು ಅರ್ಥಮಾಡಿಕೊಳ್ಳಲು ಮತ್ತು ಆರೋಗ್ಯಕರ ಬೆಳೆಗಳನ್ನು ಬೆಳೆಸಲು ಪುಸ್ತಕಗಳು ಮತ್ತು ಆನ್ಲೈನ್ ಮೂಲಕ ಮಾಹಿತಿ ಪಡೆದುಕೊಂಡಿದ್ದು, ಅಡಕೆಯಿಂದ ಕೈ ಸುಟ್ಟುಕೊಂಡ ಬಳಿಕ ಕೃಷಿಯಲ್ಲಿ ವೈಜ್ಞಾನಿಕ ಬೇಸಾಯ ಪದ್ದತಿಗಳನ್ನು ಅಳವಡಿಸಿಕೊಂಡು ಅರಣ್ಯ ಕೃಷಿ ಮಾಡಿ ಇಂದು ರಾಜ್ಯದ ಪ್ರಗತಿ ಪರ ಯುವ ರೈತರಾಗಿ ಹೊರ ಹೊಮ್ಮಿದ್ದಾರೆ.
