ನಮ್ಮ ಹೋರಾಟ ಸರ್ವಾಧಿಕಾರಿ ಆಡಳಿತ ಹಾಗೂ ಭ್ರಷ್ಟ ಕೇಂದ್ರ ಸರ್ಕಾರದ ವಿರುದ್ಧ ಎಂದು ವಿಜಯಪುರ ಲೋಕಸಭಾ ಕಾಂಗ್ರೆಸ್ ಅಭ್ಯರ್ಥಿ ಪ್ರೊ ರಾಜು ಆಲಗೂರ ಹೇಳಿದರು.
ದೇವರಹಿಪ್ಪರಗಿ ಮತಕ್ಷೇತ್ರದ ಹುಣಶ್ಯಾಳದಲ್ಲಿ ನಡೆದ ಬೃಹತ್ ಚುನಾವಣಾ ಪ್ರಚಾರ ಸಭೆಯಲ್ಲಿ ಮಾತನಾಡಿದರು.
“ರೈತರ ಹಿತ ಕಾಪಾಡದ ಪ್ರಧಾನಿ ಮೋದಿಯವರು ಮೊದಲ ಬಾರಿ ಆರಿಸಿ ಬಂದ ಬಳಿಕ ಹೇಳಿದ್ದ ಯಾವುದೇ ಮಾತನ್ನೂ ಉಳಿಸಿಕೊಂಡಿಲ್ಲ. ಅದರ ಬದಲು ಅವರು ಜನರ ಜೀವನ ಕಸಿದುಕೊಂಡಿದ್ದಾರೆ. ಇದು ಯಾರಿಗೂ ಅವರು ಕೊಟ್ಟ ‘ಅಚ್ಛೇ ದಿನ್’ ಅಲ್ಲ. ಬದಲಿಗೆ ಹಿಂದಿನ ನಮ್ಮ ಕೆಟ್ಟ ದಿನಗಳೇ ಒಳ್ಳೆಯದಾಗಿದ್ದವು. ಅವುಗಳನ್ನೇ ನಮಗೆ ಕೊಡಿ” ಎಂದು ಹೇಳಿದರು.
“ರಾಜ್ಯ ಸರ್ಕಾರದಂತೆ ಕೇಂದ್ರದಲ್ಲೂ ಗ್ಯಾರಂಟಿಗಳ ಪರ್ವ ಆರಂಭವಾಗಲಿದೆ. ಕಾಂಗ್ರೆಸ್ ಅಧಿಕಾರಕ್ಕೆ ಬಂದರೆ ಪ್ರತಿ ಮನೆಗೆ ವರ್ಷಕ್ಕೆ ಒಂದೂವರೆ ಲಕ್ಷ ರೂಪಾಯಿ ಮೇಲ್ಪಟ್ಟು ಹಣ ಬರಲಿದೆ. ಈ ಬೆಲೆ ಏರಿಕೆ ದಿನಗಳ ಕಡು ಕಷ್ಟ ಮರೆಯಾಗಬೇಕಾದರೆ ಕಾಂಗ್ರೆಸ್ಗೆ ವೋಟು ಹಾಕಿ, ದೇಶವನ್ನು ಉಳಿಸಿ. ಅದಾಗದೇ ಈ ಬಾರಿಯೂ ಮೋದಿ ಗೆದ್ದರೆ ದೇಶದ ಪ್ರಜಾಪ್ರಭುತ್ವವೇ ನಾಶವಾಗಿ, ನ್ಯಾಯಯುತ ಚುನಾವಣೆಗಳೇ ನಡೆಯದಿರುವ ಸ್ಥಿತಿ ಬರಲಿದೆ” ಎಂದು ಹೇಳಿದರು.
ಮಾಜಿ ಶಾಸಕ ಶರಣಪ್ಪ ಸುಣಗಾರ ಮಾತನಾಡಿ, “ಕೇಂದ್ರ ಸರ್ಕಾರ ಹಾಗೂ ಪ್ರಧಾನಿ ಮೋದಿಯವರ ವೈಫಲ್ಯಗಳನ್ನು ಎಳೆ ಎಳೆಯಾಗಿ ಬಿಚ್ಚಿಟ್ಟರು. ಬಿಜೆಪಿಯವರಿಗೆ ಕೇಳುವ ನೈತಿಕ ಹಕ್ಕಿಲ್ಲ. ಕೊಟ್ಟಿರುವ ಯಾವ ಭರವಸೆಯನ್ನೂ ಅವರು ಈಡೇರಿಸಿಲ್ಲ. ಬರೀ ರಾಮ ಮಂದಿರ ಕಟ್ಟಿದರೆ ಮುಗಿಯಲಿಲ್ಲ. ಜನ ಸಾಮಾನ್ಯರ ಬದಕನ್ನು ಕಟ್ಟಬೇಕಿದೆ. ಬೆಲೆ ಏರಿಕೆಯಿಂದ ದೇಶದ ಜನ ತತ್ತರಿಸಿದ್ದಾರೆ. ಕಾಂಗ್ರೆಸ್ ಕಟ್ಟಿದ ದೇಶದ ಎಲ್ಲ ಸಂಸ್ಥೆಗಳನ್ನು ಮಾರುವುದೇ ಇವರ ಕೆಲಸವಾಗಿದೆ. ಅದಾನಿ, ಅಂಬಾನಿಗಳು ಇವರ ಖರೀದಿದಾರರಾಗಿದ್ದಾರೆ. ಕಾಂಗ್ರೆಸ್ಗೆ ಇತಿಹಾಸವಿದೆ. ಹಾಗಾಗಿ ಬದಲಾವಣೆ ಮತ್ತು ನಿಮ್ಮ ನೆಮ್ಮದಿಯ ಜೀವನಕ್ಕಾಗಿ ಕಾಂಗ್ರೆಸ್ ಅಭ್ಯರ್ಥಿಗೆ ಮತ ನೀಡಿ” ಎಂದು ಮನವಿ ಮಾಡಿದರು.
ಈ ಸುದ್ದಿ ಓದಿದ್ದೀರಾ? ಬೆಳಗಾವಿ | ಎಸ್ಯುಸಿಐ(ಕಮ್ಯುನಿಸ್ಟ್) ಪಕ್ಷದಿಂದ ಲಕ್ಷ್ಮಣ ಜಡಗನ್ನವರ ಸ್ಪರ್ಧೆ
ಮುಖಂಡರುಗಳಾದ ಬಿ ಎಸ್ ಪಾಟೀಲ ಯಾಳಗಿ, ಸುಭಾಷ್ ಛಾಯಾಗೋಳ, ಆನಂದಗೌಡ ದೊಡ್ಡಮನಿ, ಪ್ರಭುಗೌಡ ಪಾಟೀಲ, ಬ್ಲಾಕ್ ಅಧ್ಯಕ್ಷ ಬಶೀರ ಬೇಪಾರಿ, ಸಂಗನಗೌಡ ಹರನಾಳ, ಬಾಪುಗೌಡ ಪಾಟೀಲ, ಸಾಯಿಕುಮಾರ ಬಿಸನಾಳ, ತಾಪಂ ಮಾಜಿ ಅಧ್ಯಕ್ಷೆ ಲಲಿತಾ ದೊಡ್ಡಮನಿ, ರಾಜಶೇಖರ ಕುಚಬಾಳ, ದೇವರಹಿಪ್ಪರಗಿ ಬ್ಲಾಕ್ ಅಧ್ಯಕ್ಷೆ ಸರಿತಾ ನಾಯಕ, ಹೂವಿನ ಹಿಪ್ಪರಗಿ ಬ್ಲಾಕ್ ಅಧ್ಯಕ್ಷೆ ರಮೀಜಾ ನದಾಫ್, ಸಯ್ಯದ, ಲಿಂಗದಳ್ಳಿ, ಮಡಿವಾಳಪ್ಪ, ಜಗದೀಶ್ ಪಾಟೀಲ, ಹಯ್ಯಾಳಪ್ಪ ವಾಲೀಕಾರ, ರಮೇಶ ಕುಂಬಾರ, ಸಾಹೇಬಗೌಡ ಬಿರಾದಾರ ಇದ್ದರು.
