ವಿವಿಧತೆಯಲ್ಲಿ ಏಕತೆಯೇ ಈ ದೇಶದ ನಿಜ ಸಂಸ್ಕೃತಿ. ಹಲವು ಧರ್ಮಗಳನ್ನು ಪಾಲಿಸುವ ಜನರು ಸಾವಿರಾರು ವರ್ಷಗಳಿಂದ ಪ್ರೀತಿಯಿಂದ ಕೂಡಿಬಾಳುತ್ತಿರುವ ನೆಲ ಇದು ಎಂದು ಜಮಾಅತೆ ಇಸ್ಲಾಮಿ ಹಿಂದ್ ವಿಜಯಪುರ ಘಟಕದ ಮುಖಂಡ, ನಿವೃತ್ತ ಉಪನ್ಯಾಸಕ ನಜೀರ್ ಅಹಮದ್ ಕಾಜಿ ಹೇಳಿದರು.
ನಗರದ ಆನೌಪಚಾರಿಕ ಶಿಕ್ಷಣ ಸಂಸ್ಥೆಯ ಕಚೇರಿಯಲ್ಲಿ ಜಮಾಅತೆ ಇಸ್ಲಾಮಿ ಹಿಂದ್ ಆಯೋಜಿಸಿದ್ದ “ನೆರೆಹೊರೆಯವರ ಹಕ್ಕುಗಳು” ವಿಷಯದ ಕುರಿತು ವಿಶೇಷ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ಈ ನಾಡಿನಲ್ಲಿ ಒಂದು ಕಾಲದಲ್ಲಿ ನೆರೆಹೊರೆಯವರು ಮನೆಯವರಂತಿದ್ದರು. ಆದರೆ ಇಂದು ಬಹಳ ಮಂದಿಯ ಬದುಕು ನನ್ನ ಮನೆ ನನ್ನ ಜೀವನ ಎಂಬುದಕ್ಕೆ ಮಾತ್ರ ಸೀಮಿತವಾಗಿದೆ. ಜಗತ್ತಿನ ಪ್ರಮುಖ ಧರ್ಮಗಳ ಗ್ರಂಥಗಳಲ್ಲಿ, ಬಸವಣ್ಣನವರ ವಚನಗಳಲ್ಲಿ, ಡಾ ಬಾಬಾಸಾಹೇಬ ಅಂಬೇಡ್ಕರ್ ಅವರ ಹಿತನುಡಿಗಳಲ್ಲಿ ನೆರೆಹೊರೆಯವರ ಹಕ್ಕುಗಳನ್ನು ಸರಿಯಾಗಿ ಪಾಲಿಸಿರಿ ಅಂತಾ ಹೇಳಲಾಗಿದೆ. ಕರ್ನಾಟಕ ಶಾಂತಿಯ ತೋಟ ಅಂತಾ ರಾಷ್ಟ್ರಕವಿ ಕುವೆಂಪು ಹೇಳಿದ್ದಾರೆ. ಆದರೆ ವಿಜಯಪುರ ನಗರದಲ್ಲಿ ಕೆಲವು ಕೋಮುವಾದಿ ಶಕ್ತಿಗಳು ಅಶಾಂತಿ ಹರಡುತ್ತಿದ್ದಾರೆ” ಎಂದು ಅಸಮಾಧಾನ ವ್ಯಕ್ತಪಡಿಸಿದರು.
ಫಾದರ್ ಎಮ್ ಕೆ ಸಿಕ್ಕೇರಾ ಮಾತನಾಡಿ, “ಇಸ್ಲಾಮಿನ ಪ್ರಕಾರ ಯಾವುದೇ ವ್ಯಕ್ತಿ ಒಳ್ಳೆಯ ಕೆಲಸ ಮಾಡಿ ಅದರ ಪ್ರತಿಫಲ ಬಯಸಬಾರದು. ಕಷ್ಟದಲ್ಲಿರುವ ನಮ್ಮ ನೆರೆಹೊರೆಯವರ ಕಷ್ಟಗಳನ್ನು ದೂರ ಮಾಡಲು ಪ್ರಯತ್ನಿಸಬೇಕು” ಎಂದರು.
ಹಿರಿಯ ನ್ಯಾಯವಾದಿ ಮಹಮುದ್ ಕಾಜಿ ಮಾತನಾಡಿ, “ಇಂದು ಜಗತ್ತು ತಂತ್ರಜ್ಞಾನದಲ್ಲಿ ಮುಂದುವರೆಯತ್ತಿದೆ. ಆದರೆ ಮನುಷ್ಯರ ಸಂಬಂಧಗಳು ದೂರವಾಗುತ್ತಿವೆ. ಡಾ ಬಾಬಾಸಾಹೇಬ ಅಂಬೇಡ್ಕರ್ ಅವರು ದಲಿತರು, ಹಿಂದುಳಿದವರು, ಮಹಿಳೆಯರ ಏಳಿಗೆಗಾಗಿ ಬಹಳ ಶ್ರಮ ಪಟ್ಟರು. ಅದನ್ನು ಇಂದಿನ ಪೀಳಿಗೆ ಸಾರ್ಥಕಗೊಳಿಸಬೇಕಿದೆ” ಎಂದರು.
ಇದನ್ನೂ ಓದಿ: ವಿಜಯಪುರ | ನಾವು ಬೇಡ ಅಂದ್ರೂ ಸರ್ಕಾರ ಉಳಿಯುತ್ತೆ: ಸಚಿವ ಶಿವನಾಂದ ಪಾಟೀಲ
ಸಿ ಎನ್ ಎಫ್ ಇ ಮುಖಂಡರಾದ ರೇಣುಕಾ ಮಾತನಾಡಿ, “ಧರ್ಮದ ಹೆಸರಿನಲ್ಲಿ ಕಚ್ಚಾಡುವುದನ್ನು ಬಿಟ್ಟು ಎಲ್ಲರೂ ಕೂಡಿ ಬಾಳೋಣ. ಇಂದಿನ ವಾತಾವರಣದಲ್ಲಿ ಒಂದು ಮಾದರಿಯ ಸಮಾಜದ ಆವಶ್ಯಕತೆ ಇದೆ. ಮಾನವರ ಬದುಕಿನ ಅಡಿಪಾಯ ಸಂಬಂಧ, ಈಸಂಬಂಧಗಳಲ್ಲಿ ಅತ್ಯಂತ ಮಹತ್ವದ ಸಂಬಂಧ ನೆರೆಹೊರೆಯವರ ಸಂಬಂಧವಾಗಿದೆ. ಅದನ್ನು ಗಟ್ಟಿಗೊಳಿಸಿಕೊಳ್ಳೋಣ” ಎಂದರು.
ಅಬ್ದುಲ್ ಕಾದಿರ್, ಕಾರ್ಯಕ್ರಮ ಸಂಚಾಲಕ ಜ ಸಮದಾನಿ ಕಾಜಿ ಹಾಗೂ ಇತರರು ಉಪಸ್ಥಿತರಿದ್ದರು.
