ಎಐಎಡಿಎಂಕೆ ಉಚ್ಚಾಟಿತ ನಾಯಕಿ ವಿ ಕೆ ಶಶಿಕಲಾ ಸೋಮವಾರ ದಿವಂಗತ ಮುಖ್ಯಮಂತ್ರಿ ಜೆ ಜಯಲಲಿತಾ ಅವರ ಜನ್ಮ ದಿನಾಚರಣೆಯಂದು ಹೊಸ ಪಕ್ಷವನ್ನು ಸ್ಥಾಪಿಸಿದ್ದಾರೆ. ಭಾವನಾತ್ಮಕ ಮತ್ತು ರಾಜಕೀಯ ತುಂಬಿದ ಭಾಷಣ ಮಾಡಿದ ಶಶಿಕಲಾ ಅವರು ತಮ್ಮ ಪಕ್ಷ ಹೊಸ ಧ್ವಜವನ್ನು ಅನಾವರಣಗೊಳಿಸಿದ್ದು, ಅದರಲ್ಲಿ ಜಯಲಲಿತಾ ಅವರ ಭಾವಚಿತ್ರವೂ ಇದೆ. “ಜಯಲಲಿತಾ ನಿಧನರಾದ ಅದೇ ರಾತ್ರಿ, ಎಲ್ಲಾ ಸಚಿವರು ಬಂದು ನನ್ನನ್ನು ಮುಖ್ಯಮಂತ್ರಿಯಾಗುವಂತೆ ಹೇಳಿದರು. ಎಲ್ಲಾ ಶಾಸಕರು ಸಹ ನನಗೆ ಹೇಳಿದರು” ಎಂದು 2016ರ ಡಿಸೆಂಬರ್ನ ಘಟನೆಗಳನ್ನು ಶಶಿಕಲಾ ವಿವರಿಸಿದ್ದಾರೆ. “ನಮ್ಮ ಶತ್ರುಗಳು ನಾನು ಅವರನ್ನು ಕೊಂದಿದ್ದೇನೆ ಎಂದು ಹೇಳಿದರು” ಎಂದು ತಮ್ಮ ಮೇಲಿರುವ ಆರೋಪದ ಬಗ್ಗೆಯೂ ಉಲ್ಲೇಖಿಸಿದರು. ಈ ಸಂದರ್ಭದಲ್ಲೇ ದ್ರಾವಿಡ ಚಳವಳಿಯ ಪ್ರಮುಖ ನಾಯಕರಾದ ಸಿ.ಎನ್. ಅಣ್ಣಾದೊರೈ, ಎಂ.ಜಿ. ರಾಮಚಂದ್ರನ್ (ಎಂಜಿಆರ್) ಮತ್ತು ಜೆ. ಜಯಲಲಿತಾ ಅವರ ಭಾವಚಿತ್ರಗಳಿರುವ ಕೆಂಪು, ಬಿಳಿ ಮತ್ತು ಕಪ್ಪು ಪಟ್ಟಿಗಳನ್ನು ಹೊಂದಿರುವ ಧ್ವಜವನ್ನು ಶಶಿಕಲಾ ಅನಾವರಣಗೊಳಿಸಿದರು. “ಇದು ಅಣ್ಣಾ, ಎಂಜಿಆರ್ ಮತ್ತು ಜಯಲಲಿತಾ ಅವರ ಹೆಜ್ಜೆಗಳನ್ನು ಅನುಸರಿಸುವ ದ್ರಾವಿಡ ಪಕ್ಷವಾಗಿರುತ್ತದೆ. ಶತ್ರುಗಳನ್ನು ಬೇರುಸಹಿತ ಕಿತ್ತುಹಾಕಲು ಸಾಮಾನ್ಯ ಜನರಿಗೆ ಒಂದು ಪಕ್ಷ” ಎಂದು ಘೋಷಿಸಿದರು.
