ಮಾಲಿನ್ಯದಿಂದಾಗಿ 2022ದಲ್ಲಿ ಭಾರತದಲ್ಲಿ ಒಟ್ಟು 17 ಲಕ್ಷಕ್ಕೂ ಹೆಚ್ಚು ಸಾವುಗಳು ಸಂಭವಿಸಿವೆ. ಪ್ರಮುಖವಾಗಿ ಮಾನವನಿಂದ ಉಂಟಾಗುವ ಪಿಎಂ2.5 ಮಾಲಿನ್ಯವು (ಗಾಳಿಯಲ್ಲಿ ತೇಲುವ ಸೂಕ್ಷ್ಮ ಕಣಗಳು) ಈ ಸಾವುಗಳಿಗೆ ಪ್ರಮುಖ ಕಾರಣವಾಗಿದೆ ಎಂದು ‘ದಿ ಲ್ಯಾನ್ಸೆಟ್ ಜರ್ನಲ್’ ಪ್ರಕಟಿಸಿರುವ ವರದಿ ಹೇಳಿದೆ.
‘ಕೌಂಟ್ಡೌನ್ ಆನ್ ಹೆಲ್ತ್ ಅಂಡ್ ಕ್ಲೈಮೇಟ್ ಚೇಂಜ್’ ಹೆಸರಿನ ವರದಿ ಪ್ರಕಾರ, ಮಾಲಿನ್ಯದಿಂದ ಸಂಭವಿಸುವ ಸಾವುಗಳ ಸಂಖ್ಯೆ 2010ಕ್ಕೆ ಹೋಲಿಸಿದರೆ, 2022ರ ವೇಳೆಗೆ 38% ಹೆಚ್ಚಾಗಿದೆ. ಒಟ್ಟು 17 ಲಕ್ಷ ಸಾವುಗಳಲ್ಲಿ 44% ಸಾವುಗಳಿಗೆ ಪಳೆಯುಳಿಕೆ ಇಂಧನಗಳ ಬಳಕೆಯೇ ಕಾರಣವಾಗಿದೆ. ರಸ್ತೆ ಸಾರಿಗೆಗಾಗಿನ ಪೆಟ್ರೋಲ್ ಬಳಕೆಯಿಂದ 2.69 ಲಕ್ಷ ಸಾವುಗಳು ಸಂಭವಿಸಿವೆ.
ಭಾರತದಲ್ಲಿ ರಸ್ತೆ ಸಾರಿಗೆಗಳ ಪೈಕಿ ಸುಮಾರು 96% ಸಾರಿಗೆಗಳು ಶಕ್ತಿಗಾಗಿ ಪಳೆಯುಳಿಕೆ ಇಂಧನಗಳನ್ನೇ ಅವಲಂಬಿಸಿವೆ. ವಿದ್ಯುತ್ ಮೇಲಿನ ಅವಲಂಬಿಕೆ ಕೇವಲ 0.3% ಮಾತ್ರವೇ ಇದೆ. ಪಳೆಯುಳಿಕೆ ಇಂಧನಗಳ ಮೇಲಿನ ಅತಿಯಾದ ಅವಲಂಬನೆ ಮತ್ತು ಹವಾಮಾನ ಬದಲಾವಣೆಯನ್ನು ನಿಯಂತ್ರಿಸುವಲ್ಲಿನ ವಿಫಲತೆಯು ಜನರ ಜೀವನ, ಆರೋಗ್ಯ ಹಾಗೂ ಜೀವನೋಪಾಯದ ಮೇಲೆ ಪರಿಣಾಮ ಬೀರುತ್ತಿವೆ. ಮಾನವ ಜೀವ ಹಾನಿಗೂ ಕಾರಣವಾಗುತ್ತಿವೆ ಎಂದು ವರದಿ ಹೇಳಿದೆ.
