ಭಾರತದ ಜಿಡಿಪಿ 7.4%ಗೆ ಜಿಗಿದಿದೆ ಎಂದು ಮೋದಿ ಸರ್ಕಾರವು ಸಂಭ್ರಮಿಸುತ್ತಿದೆ. ಕೇಂದ್ರ ಸರ್ಕಾರದ ಸಂಭ್ರಮಕ್ಕೆ ಆರ್ಥಿಕ ತಜ್ಞ ಅರವಿಂದ್ ಸುಬ್ರಹ್ಮಣಂ ಮಂಜು ಎರಚಿದ್ದಾರೆ. “ಭಾರತದ ಆರ್ಥಿಕತೆಯು ಬಲವಾದ ಚೇತರಿಕೆಯ ಲಕ್ಷಣಗಳನ್ನು ತೋರಿಸುತ್ತಿಲ್ಲ. ಅಮೆರಿಕದ ಭಾರೀ ಸುಂಕಗಳ ಅಪಾಯ ಮತ್ತು ಕಡಿಮೆ ಬೆಲೆಯ ಚೀನೀ ಸರಕುಗಳ ಡಂಪಿಂಗ್ನಿಂದ ಭಾರತದ ಅರ್ಥಿಕ ಭವಿಷ್ಯವು ದುರ್ಬಲಗೊಳ್ಳಬಹುದು ಎಂದು ಮಾಜಿ ಮುಖ್ಯ ಆರ್ಥಿಕ ಸಲಹೆಗಾರ ಅರವಿಂದ್ ಸುಬ್ರಮಣಿಯನ್ ಹೇಳಿದ್ದಾರೆ.
ಈ ವರ್ಷ (2026) ಮಾರ್ಚ್ನಲ್ಲಿ ಕೊನೆಗೊಳ್ಳಲಿರುವ 2025-2026ರ ಆರ್ಥಿಕ ವರ್ಷದ ಅಂದಾಜು ದತ್ತಾಂಶವನ್ನು ಕೇಂದ್ರ ಸರ್ಕಾರ ಬಿಡುಗಡೆ ಮಾಡಿದೆ. ಅದರಲ್ಲಿ, ಭಾರತದ ಆರ್ಥಿಕತೆಯು 7.4%ಗೆ ಏರಿಕೆಯಾಗಿದೆ. ಭಾರತವು ತನ್ನ ಬೆಳವಣಿಗೆಯ ಹಾದಿಯನ್ನು ವಿಸ್ತರಿಸಿದೆ ಎಂದು ಹೇಳಿಕೊಂಡಿದೆ.
ಆದರೆ, ಕೇಂದ್ರ ಸರ್ಕಾರದ ಈ ದತ್ತಾಂಶವನ್ನು ಸುಬ್ರಮಣಿಯನ್ ಅವರು ಅಲ್ಲಗಳೆದಿದ್ದಾರೆ. “ನಾವು ಆ ಅಂಕಿಅಂಶವನ್ನು ಎಚ್ಚರಿಕೆಯಿಂದ ಗಮನಿಸಬೇಕು. ಒಟ್ಟು ದೇಶೀಯ ಉತ್ಪನ್ನ ಲೆಕ್ಕಾಚಾರದಿಂದ ಹಣದುಬ್ಬರವನ್ನು ತೆಗೆದುಹಾಕಿದರೆ, ಭಾರತದ ಆರ್ಥಿಕತೆ ಚೆನ್ನಾಗಿದೆಯೆಂದು ಅಳೆಯಲು ಸಾಧ್ಯವೇ?” ಎಂದಿದ್ದಾರೆ.
“ಪ್ರಗತಿಯ ದಿಕ್ಕು ಮತ್ತು ದೃಷ್ಟಿಯಿಂದಲೂ ಸಹ, ದೇಶದ ಆರ್ಥಿಕತೆ ಚೇತರಿಸಿಕೊಳ್ಳುತ್ತಿದೆ ಎಂಬುದು ಸ್ಪಷ್ಟವಾಗಿಲ್ಲ. ಅಮೆರಿಕದ ವ್ಯಾಪಾರ ನೀತಿಯಿಂದ ಅಪಾಯಗಳು ಸಹ ಹೆಚ್ಚಿವೆ. ಟ್ರಂಪ್ ಅವರು ಭಾರತೀಯ ಸರಕುಗಳ ಮೇಲಿನ ದಂಡನಾತ್ಮಕ 50% ಸುಂಕಗಳನ್ನು ಹೇರಿದ್ದಾರೆ. ಇದು ಅನಿಶ್ಚಿತತೆಗೆ ಕಾರಣವಾಗಿದೆ. ಸುಂಕ ದರ ಇನ್ನೂ ಹೆಚ್ಚಾಗಬಹುದು. ಇದೆಲ್ಲವೂ, ಅಮೆರಿಕ-ಭಾರತ ನಡುವಿನ ವ್ಯಾಪಾರ ಒಪ್ಪಂದದ ಸಾಧ್ಯತೆಯು ಕಡಿಮೆ ಇರುವಂತೆ ಕಾಣುತ್ತಿದೆ” ಎಂದು ಸುಬ್ರಮಣಿಯನ್ ಹೇಳಿದ್ದಾರೆ.
“ಭಾರತವು ‘ಚೀನೀ ವ್ಯಾಪಾರೀಕರಣ’ದ ಒತ್ತಡವನ್ನು ಎದುರಿಸುತ್ತಿದೆ. ಏಕೆಂದರೆ, ಚೀನಾ ತನ್ನ ಸರಕುಗಳನ್ನು ಭಾರತ ಸೇರಿದಂತೆ ಅಭಿವೃದ್ಧಿಶೀಲ ರಾಷ್ಟ್ರಗಳಿಗೆ ವೇಗವಾಗಿ ರಫ್ತು ಮಾಡುತ್ತಿದೆ. ಇದು ದೇಶೀಯ ಆರ್ಥಿಕತೆಯ ಮೇಲೆ ಪರಿಣಾಮ ಬೀರುತ್ತದೆ” ಎಂದು ಅವರು ಹೇಳಿದ್ದಾರೆ.
“ಜಗತ್ತಿನ ಆರ್ಥಿಕತೆಯಲ್ಲಿ ಭಾರತದ ಸ್ಥಾನವು ಗಟ್ಟಿಯಾಗಿದ್ದರೂ, ಆಂತರಿಕವಾಗಿ, ಸರಕು ಮತ್ತು ಸೇವಾ ತೆರಿಗೆ (ಜಿಎಸ್ಟಿ) ಕಡಿತದಿಂದಾಗಿ ಹಣಕಾಸಿನ ಪರಿಸ್ಥಿತಿಯು ಪ್ರಬಲವಾಗಿಲ್ಲ” ಎಂದಿದ್ದಾರೆ.
