ತನ್ನ ಪಾರ್ಶ್ವವಾಯು ಪೀಡಿತ ಅಸ್ವಸ್ಥ ಪತ್ನಿಯನ್ನು 75ರ ವೃದ್ಧ ಆಸ್ಪತ್ರೆಗೆ 300 ಕಿ.ಮೀ. ಸೈಕಲ್ ರಿಕ್ಷಾದಲ್ಲೇ ಕರೆದೊಯ್ದ ಘಟನೆ ಒಡಿಶಾದಲ್ಲಿ ನಡೆದಿದೆ. ಸಂಬಲ್ಪುರದ ಮೋದಿಪಾದ ನಿವಾಸಿ ಬಾಬು ಲೋಹರ್ ಅವರ 70 ವರ್ಷ ಪತ್ನಿ ಜ್ಯೋತಿ ಅವರನ್ನು ಎಸ್ಸಿಬಿ ವೈದ್ಯಕೀಯ ಕಾಲೇಜು ಮತ್ತು ಆಸ್ಪತ್ರೆಗೆ ಕರೆದೊಯ್ಯುವಂತೆ ಸಂಬಲ್ಪುರದ ಸ್ಥಳೀಯ ವೈದ್ಯರು ಸಲಹೆ ನೀಡಿದ್ದರು. ಆದರೆ ಖಾಸಗಿ ಆಂಬ್ಯುಲೆನ್ಸ್ ಪಡೆಯಲು ಸಾಧ್ಯವಾಗದ ಕಾರಣ ಲೋಹರ್ ಸೈಕಲ್ ರಿಕ್ಷಾದಲ್ಲೇ ತನ್ನ ಪತ್ನಿಯನ್ನು ಆಸ್ಪತ್ರೆಗೆ ಕರೆದೊಯ್ದಿದ್ದಾರೆ.
“ನಮಗೆ ಬೇರೆ ಯಾರೂ ಇಲ್ಲ. ನನಗೆ ಅವಳು, ಅವಳಿಗೆ ನಾನು ಅಷ್ಟೇ” ಎಂದು ಲೋಹರ್ ಮಾಧ್ಯಮಗಳಿಗೆ ಹೇಳಿದ್ದಾರೆ. ಸಂಬಲ್ಪುರದಿಂದ ಕಟಕ್ಗೆ ಲೋಹರ್ ಸೈಕಲ್ ರಿಕ್ಷಾ ತುಳಿದಿದ್ದಾರೆ. ಲೋಹರ್ ಹಗಲು ಪೂರ್ತಿ ಸೈಕಲ್ ತುಳಿದು ರಾತ್ರಿ ರಸ್ತೆ ಬದಿಯ ಅಂಗಡಿಗಳ ಬಳಿ ಆಶ್ರಯ ಪಡೆದಿದ್ದರು. ಸುಮಾರು ಒಂಬತ್ತು ದಿನಗಳ ಕಾಲ ಸಾಗಿ ಆಸ್ಪತ್ರೆಗೆ ತಲುಪಿದ್ದಾರೆ. ಅಲ್ಲಿ ಜ್ಯೋತಿ ಎರಡು ತಿಂಗಳ ತೀವ್ರ ಚಿಕಿತ್ಸೆ ಪಡೆದಿದ್ದಾರೆ.
ಇದನ್ನು ಓದಿದ್ದೀರಾ? ಅಧಿಕಾರಸ್ಥರಿಗೆ ಸುಡು ಬೆಂಕಿಯಾಗಿ, ಆದಿವಾಸಿಗಳ ಹಾದಿಯ ಬೆಳಕಾಗಿ ಬದುಕಿದ್ದಳು ಆಕೆ!
ಚಿಕಿತ್ಸೆಯ ಬಳಿಕ ದಂಪತಿಗಳು ಜನವರಿ 19ರಂದು ಮತ್ತೆ ತಮ್ಮ ಊರಿಗೆ ಪ್ರಯಾಣ ಆರಂಭಿಸಿದ್ದಾರೆ. ಆದರೆ ಚೌದ್ವಾರ ಬಳಿ ವಾಹನವೊಂದು ಅವರ ರಿಕ್ಷಾಕ್ಕೆ ಡಿಕ್ಕಿ ಹೊಡೆದಿದ್ದು, ಅಪಘಾತದಲ್ಲಿ ವೃದ್ಧ ಮಹಿಳೆ ಗಂಭೀರವಾಗಿ ಗಾಯಗೊಂಡು ಹತ್ತಿರದ ಆರೋಗ್ಯ ಕೇಂದ್ರದಲ್ಲಿ ತಾತ್ಕಾಲಿಕವಾಗಿ ಚಿಕಿತ್ಸೆ ಪಡೆಯಬೇಕಾಯಿತು ಎಂದು ವರದಿಯಾಗಿದೆ.
ಈ ವೇಳೆ ಚೌದ್ವಾರದ ಆರೋಗ್ಯ ಕೇಂದ್ರದ ಡಾ. ವಿಕಾಸ್, ಈ ವೃದ್ದೆಗೆ ವೈದ್ಯಕೀಯ ಚಿಕಿತ್ಸೆಯನ್ನು ನೀಡಿದ್ದು, ಮಾತ್ರವಲ್ಲದೆ ದಂಪತಿ ತಮ್ಮ ಊರಿಗೆ ಮರಳಲು ವೈಯಕ್ತಿಕವಾಗಿ ಆರ್ಥಿಕ ಸಹಾಯವನ್ನೂ ಮಾಡಿದ್ದಾರೆ.
