ರಿಲಯನ್ಸ್ ಕಮ್ಯುನಿಕೇಷನ್ಸ್ (ಆರ್ಕಾಮ್) ಮತ್ತು ಅದರ ಪ್ರವರ್ತಕ ಅನಿಲ್ ಅಂಬಾನಿಯನ್ನು ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (ಎಸ್ಬಿಐ) ‘ವಂಚಕ’ ಎಂದು ಘೋಷಿಸಿದ ಕೆಲವೇ ದಿನಗಳಲ್ಲಿ, ಜಾರಿ ನಿರ್ದೇಶನಾಲಯ (ಇ.ಡಿ) ಮುಂಬೈನಲ್ಲಿ ಅಂಬಾನಿಯ ಕಂಪನಿಗಳಿಗೆ ಸಂಬಂಧಿತ ಸ್ಥಳಗಳಲ್ಲಿ ಇಂದು ಶೋಧ ಕಾರ್ಯಾಚರಣೆ ನಡೆಸಿದೆ.
ಅಂಬಾನಿಯ ನಿವಾಸವನ್ನು ಶೋಧದಿಂದ ಹೊರಗಿಟ್ಟರೂ, ದೆಹಲಿ ಮತ್ತು ಮುಂಬೈನ ಇಡಿ ತಂಡಗಳು ಗುಂಪಿನ ಕಚೇರಿಗಳಿಗೆ ಭೇಟಿ ನೀಡಿವೆ. ರಾಷ್ಟ್ರೀಯ ವಸತಿ ಬ್ಯಾಂಕ್, ಸೆಬಿ, ಎನ್ಎಫ್ಆರ್ಎ, ಬ್ಯಾಂಕ್ ಆಫ್ ಬರೋಡಾ ಮತ್ತು ಸಿಬಿಐನ ಎರಡು ಎಫ್ಐಆರ್ಗಳಿಂದ ಪಡೆದ ಮಾಹಿತಿಯ ಆಧಾರದ ಮೇಲೆ ಈ ಕ್ರಮ ಕೈಗೊಳ್ಳಲಾಗಿದೆ.
ಸಾರ್ವಜನಿಕ ಹಣವನ್ನು ದುರುಪಯೋಗಪಡಿಸಿಕೊಂಡು ವರ್ಗಾಯಿಸಲಾಗಿದೆ ಎಂಬ ಪುರಾವೆಗಳನ್ನು ಇಡಿ ಪತ್ತೆಹಚ್ಚಿದೆ. ಬ್ಯಾಂಕುಗಳು, ಷೇರುದಾರರು ಮತ್ತು ಹೂಡಿಕೆದಾರರು ಮೋಸಗೊಂಡಿರಬಹುದು ಎಂದು ತನಿಖೆ ತಿಳಿಸಿದೆ.
ಇದನ್ನು ಓದಿದ್ದೀರಾ? ಈ ದಿನ ಸಂಪಾದಕೀಯ | ಮೋಶಾ ಕಂಪನಿಯ ಮತ್ತೊಂದು ನಿಗೂಢ ನಾಟಕ!
ಜೂನ್ 13, 2025 ರಂದು ಆರ್ಬಿಐ ಮಾರ್ಗಸೂಚಿಗಳ ಅಡಿಯಲ್ಲಿ ಎಸ್ಬಿಐ ಆರ್ಕಾಮ್ ಮತ್ತು ಅಂಬಾನಿಯನ್ನು ‘ವಂಚಕ’ ಎಂದು ಘೋಷಿಸಿತು. ಜೂನ್ 24 ರಂದು ಇದನ್ನು ಆರ್ಬಿಐಗೆ ವರದಿ ಮಾಡಲಾಗಿದ್ದು, ಸಿಬಿಐಗೆ ದೂರು ಸಲ್ಲಿಸಲು ಎಸ್ಬಿಐ ಸಿದ್ಧತೆ ನಡೆಸುತ್ತಿದೆ.
ಆರ್ಕಾಮ್ಗೆ ಎಸ್ಬಿಐನ 2,227.64 ಕೋಟಿ ರೂ. ಮೂಲ ಬಾಕಿ ಮತ್ತು 786.52 ಕೋಟಿ ರೂ. ಬ್ಯಾಂಕ್ ಗ್ಯಾರಂಟಿಗಳ ಸಾಲ ಇದೆ. ಆರ್ಕಾಮ್ ದಿವಾಳಿತನ ಪ್ರಕ್ರಿಯೆಯಲ್ಲಿದ್ದು, ಅನಿಲ್ ಅಂಬಾನಿಯ ವಿರುದ್ಧ ವೈಯಕ್ತಿಕ ದಿವಾಳಿತನ ಪ್ರಕ್ರಿಯೆಯೂ ನಡೆಯುತ್ತಿದೆ.
