ಇದೇ ವಾರ ನಡೆಯಲಿರುವ ಬಿಹಾರ ಚುನಾವಣೆಯಲ್ಲಿ ಜನ್ ಸುರಾಜ್ ಪಕ್ಷವು (ಜೆಎಸ್ಪಿ) 150ಕ್ಕೂ ಹೆಚ್ಚು ಸ್ಥಾನಗಳನ್ನು ಗೆಲ್ಲುತ್ತದೆ ಅಥವಾ 10 ಕ್ಕಿಂತ ಕಡಿಮೆ ಸ್ಥಾನಗಳನ್ನು ಪಡೆಯುತ್ತದೆ ಎಂದು ಚುನಾವಣಾ ತಂತ್ರಜ್ಞ, ಜೆಎಸ್ಪಿ ನಾಯಕ ಪ್ರಶಾಂತ್ ಕಿಶೋರ್ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಇತ್ತೀಚೆಗೆ, ಖಾಸಗಿ ಸುದ್ದಿವಾಹಿನಿ ‘ಎನ್ಡಿಟಿವಿ’ ಕಾರ್ಯಕ್ರಮದಲ್ಲಿ ಭಾಗಿ ಅವರು ತಮ್ಮ ಪಕ್ಷದ ಚುನಾವಣಾ ಸ್ಪರ್ಧೆಯ ಬಗ್ಗೆ ವಿವರಿಸಿದ್ದಾರೆ. “ಜೆಎಸ್ಪಿ ತನ್ನ ಚೊಚ್ಚಲ ಚುನಾವಣೆಯಲ್ಲಿ ಹೋರಾಟ ನಡೆಸುತ್ತಿದೆ. ನನಗೆ ಎರಡು ಸಂಭವನೀಯತೆಗಳು ಕಾಣುತ್ತಿವೆ. ಜೆಎಸ್ಪಿಯನ್ನು ರಾಜ್ಯದ ಜನರು ಪರ್ಯಾಯವಾಗಿ ನೋಡುತ್ತಿದ್ದಾರೆ. ಆದರೆ, ಜನರ ವಿಶ್ವಾಸವು ಮತದಾನದಲ್ಲಿಯೂ ಪ್ರತಿಧ್ವನಿಸಬೇಕಿದೆ. ಪಕ್ಷವು 10 ಕ್ಕಿಂತ ಕಡಿಮೆ ಅಥವಾ 150ಕ್ಕೂ ಹೆಚ್ಚು ಸ್ಥಾನಗಳನ್ನು ಗೆಲ್ಲುತ್ತದೆ” ಎಂದು ಹೇಳಿಕೊಂಡಿದ್ದಾರೆ.
ತಾವು ಚುನಾವಣೆಯಲ್ಲಿ ಅಭ್ಯರ್ಥಿಯಾಗಿ ಸ್ಪರ್ಧಿಸದೇ ಇರುವ ಬಗ್ಗೆ ವಿವರಿಸಿದ ಕಿಶೋರ್, “ನಾನು ಚುನಾವಣೆಯಲ್ಲಿ ನಿರ್ದಿಷ್ಟ ಸ್ಥಾನದಿಂದ ಸ್ಪರ್ಧಿಸುತ್ತೇನೆ ಎಂದು ಎಂದಿಗೂ ಘೋಷಿಸಿಲ್ಲ. ನಾನು ಒಂದು ವೇಳೆ ಸ್ಪರ್ಧಿಸಿದರೆ, ಕಾರ್ಗಹಾರ್ನಿಂದ ಸ್ಪರ್ಧಿಸುವುದಾಗಿ ಹೇಳಿದ್ದೆ. ಆದರೆ, ನಾನು ಸ್ಪರ್ಧಿಸಿದರೆ, ನನ್ನ ಕ್ಷೇತ್ರದ ಮೇಲೆ ಹೆಚ್ಚು ಗಮನ ಹರಿಸಬೇಕಾಗುತ್ತದೆ. ಆದ್ದರಿಂದ, ಪಕ್ಷದ ಅಭ್ಯರ್ಥಿಗಳ ಗೆಲುವಿಗಾಗಿ ರಾಜ್ಯಾದ್ಯಂತ ಪ್ರಚಾರ ಮಾಡುವ ಉದ್ದೇಶದಿಂದ ನಾನು ಸ್ಪರ್ಧಿಸಲಿಲ್ಲ” ಎಂದು ಹೇಳಿದ್ದಾರೆ.
ಈ ಲೇಖನ ಓದಿದ್ದೀರಾ?: ಬಿಹಾರ ಚುನಾವಣೆ | ಬಿಜೆಪಿ 1 ಕೋಟಿ ಉದ್ಯೋಗದ ಭರವಸೆ; 20 ವರ್ಷದಲ್ಲಿ ಆಗದ್ದು ಈಗ ಸಾಧ್ಯವೇ?
“ನವೆಂಬರ್ 14 ರಂದು ಫಲಿತಾಂಶ ಬಂದಾಗ, ಜೆಎಸ್ಪಿ ಗೆಲ್ಲುವ ಸ್ಥಾನಗಳ ಮೇಲೆ ನಾನು ಸ್ಪರ್ಧಿಸದೇ ಉಳಿದಿದ್ದರ ಯಶಸ್ಸನ್ನು ಅಳೆಯಬಹುದು. ಬಿಹಾರದ 1/3ನೇ ಭಾಗದಷ್ಟು ಜನರು ಮಹಾಘಟಬಂಧನ್ ಮತ್ತು ಎನ್ಡಿಎಗೆ ಮತ ಹಾಕಲು ಬಯಸುವುದಿಲ್ಲ. ಪಕ್ಷವು ಕನಿಷ್ಠ 160-170 ಸ್ಥಾನಗಳಲ್ಲಿ ತ್ರಿಕೋನ ಸ್ಪರ್ಧೆ ಉಂಟುಮಾಡಲಿದೆ” ಎಂದು ಹೇಳಿದ್ದಾರೆ.
