ಮಹಿಳೆಯರ ವಿರುದ್ಧದ ಸೈಬರ್ ಕ್ರೈಮ್ ಪ್ರಕರಣಗಳು ಕಳೆದ ಐದು ವರ್ಷಗಳಲ್ಲಿ ದುಪಟ್ಟಾಗಿದೆ. 2025ರಲ್ಲಿ ಪ್ರಕರಣಗಳ ಸಂಖ್ಯೆ 2.5 ಲಕ್ಷ ದಾಟಿದೆ. ಈ ಸಂಬಂಧ ಕನಿಮೋಳಿ ಸೋಮು ಅವರು ರಾಜ್ಯಸಭೆಯಲ್ಲಿ ಕೇಳಿದ ಪ್ರಶ್ನೆಗೆ ಉತ್ತರಿಸುತ್ತಾ ಗೃಹ ಸಚಿವಾಲಯವು ಮಾಹಿತಿಯನ್ನು ನೀಡಿದೆ.
ಕೇಂದ್ರದ ದತ್ತಾಂಶದ ಪ್ರಕಾರ ಆನ್ಲೈನ್ ಮತ್ತು ಸಾಮಾಜಿಕ ಮಾಧ್ಯಮ ಅಪರಾಧಗಳು ಅಂದರೆ ಸೈಬರ್ ಸ್ಟಾಕಿಂಗ್, ಗುರುತಿನ ಕಳ್ಳತನ ಮತ್ತು ಕಿರುಕುಳ ಮೊದಲಾದವುಗಳಿಗೆ ಸಂಬಂಧಿಸಿ 2021ರಲ್ಲಿ 72,301 ಪ್ರಕರಣಗಳು ದಾಖಲಾಗಿದ್ದವು. ಆದರೆ 2025ರಲ್ಲಿ 1,73,766ಕ್ಕೆ ಅಂದರೆ 140% ರಷ್ಟು ಹೆಚ್ಚಾಗಿದೆ. ಅದೇ ಅವಧಿಯಲ್ಲಿ ಆನ್ಲೈನ್ ಲೈಂಗಿಕ ಕಿರುಕುಳವು 47% ರಷ್ಟು ಏರಿಕೆಯಾಗಿವೆ. ಒಟ್ಟಾರೆಯಾಗಿ, ದೂರುಗಳು 1,24,349 ರಿಂದ 2,50,423ಕ್ಕೆ ಏರಿವೆ. ಅಂದರೆ ಐದು ವರ್ಷಗಳಲ್ಲಿ ದ್ವಿಗುಣಗೊಂಡಿದೆ.
ಇದನ್ನು ಓದಿದ್ದೀರಾ? ಈ ದಿನ ಸಂಪಾದಕೀಯ | ಪೊಲೀಸರಿಗೆ-ಸರ್ಕಾರಕ್ಕೆ ಸವಾಲಾಗಿರುವ ಸೈಬರ್ ಕ್ರೈಮ್
ಮಕ್ಕಳ ಮೇಲಿನ ಲೈಂಗಿಕ ದೌರ್ಜನ್ಯದ ದೂರುಗಳು (CSAM) ಸುಮಾರು ಐದು ಪಟ್ಟು ಹೆಚ್ಚಾಗಿದ್ದು, 2021ರಲ್ಲಿ 2,109ರಷ್ಟಿದ್ದ ಪ್ರಕರಣಗಳ ಸಂಖ್ಯೆ 2025ರಲ್ಲಿ 10,431ಕ್ಕೆ ತಲುಪಿದೆ. ನಕಲಿ ಪ್ರೊಫೈಲ್ ಮತ್ತು ಇನ್ನೊಬ್ಬರ ಸೋಗಿನಲ್ಲಿ ಮಾಡುವ ವಂಚನೆ ಪ್ರಕರಣಗಳು ಸುಮಾರು 200% ಹೆಚ್ಚಾಗಿ, 46,784ಕ್ಕೆ ತಲುಪಿವೆ.
ಲೈಂಗಿಕವಾಗಿ ಅಶ್ಲೀಲ ವಿಷಯ ದೂರುಗಳು ಮೂರು ಪಟ್ಟು ಹೆಚ್ಚಾಗಿ 37,743ಕ್ಕೆ ತಲುಪಿವೆ. ಗುರುತಿನ ಕಳ್ಳತನವು 224% ರಷ್ಟು ಹೆಚ್ಚಾಗಿ, 34,533 ಪ್ರಕರಣಗಳಿಗೆ ಏರಿದೆ. ಸೈಬರ್ಬುಲ್ಲಿಂಗ್, ಸ್ಟಾಕಿಂಗ್ ಮತ್ತು ಸೆಕ್ಸ್ಟಿಂಗ್ ದೂರುಗಳು 45,832ಕ್ಕೆ ಏರಿದ್ದು, ದ್ವಿಗುಣಗೊಂಡಿವೆ. ಇವೆಲ್ಲವೂ ಸಾಮಾಜಿಕ ಮಾಧ್ಯಮದ ಮೂಲಕ ಹೆಚ್ಚುತ್ತಿರುವ ಮಹಿಳಾ ದೌರ್ಜನ್ಯವನ್ನು ಎತ್ತಿ ತೋರಿಸುತ್ತಿದೆ.
ಆದರೆ ಅತ್ಯಾಚಾರ ಸಂಬಂಧಿತ ದೂರುಗಳು 2022ರಲ್ಲಿ 30,574ರಿಂದ 2024ರಲ್ಲಿ 4,261ಕ್ಕೆ ಕುಸಿದು 2025ರಲ್ಲಿ 8,780ಕ್ಕೆ ತಲುಪಿದೆ. ಅದರೆ ಇದು ನೈಜವಾಗಿ ಪ್ರಕರಣಗಳ ಕುಸಿತವಲ್ಲ. ಅಪರಾಧಗಳನ್ನು ಮರುವರ್ಗೀಕರಣ ಮಾಡಿರುವುದೇ ಇದಕ್ಕೆ ಕಾರಣ. ಇನ್ನೊಂದೆಡೆ 2023ರಲ್ಲಿ ಎಲ್ಲಾ ವಿಭಾಗಗಳಲ್ಲಿ ಪ್ರಕರಣಗಳ ಕುಸಿತ, ನಂತರ ಮತ್ತೆ ತೀಕ್ಷ್ಣವಾದ ಏರಿಕೆಯು ದತ್ತಾಂಶ ವರ್ಗೀಕರಣದಲ್ಲಿನ ಸ್ಥಿರತೆಯ ಬಗ್ಗೆ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ.
