ಮಂಗಳವಾರ ದೆಹಲಿಯ ಕೆಲವು ಭಾಗಗಳಲ್ಲಿ ಮೋಡ ಬಿತ್ತನೆ ಮಾಡಲಾಗಿತ್ತು. ಆದರೂ, ಮಳೆ ಬರಿಸುವ ಪ್ರಯತ್ನಗಳು ‘ಸಂಪೂರ್ಣವಾಗಿ ಯಶಸ್ವಿಯಾಗಲಿಲ್ಲ’. ಏಕೆಂದರೆ ಮೋಡಗಳಲ್ಲಿನ ತೇವಾಂಶ ಕಡಿಮೆಯಾಗಿತ್ತು. ಈ ಪ್ರಕ್ರಿಯೆಯು ಮಾಲಿನ್ಯದ ಸಮಸ್ಯೆಗೆ ‘ಅಲ್ಟಿಮೇಟ್’ ಪರಿಹಾರವಲ್ಲ. ಆದರೆ, SOS (Save Our Souls) ಪರಿಹಾರವಾಗಿದೆ ಎಂದು ಐಐಟಿ ಕಾನ್ಪುರ ನಿರ್ದೇಶಕ ಮಣೀಂದ್ರ ಅಗರ್ವಾಲ್ ಹೇಳಿದ್ದಾರೆ.
ದೆಹಲಿಯಲ್ಲಿ ಮಾಲಿನ್ಯದ ಪ್ರಮಾಣವನ್ನು ತಗ್ಗಿಸುವ ಉದ್ದೇಶದಿಂದ ದೆಹಲಿ ಸರ್ಕಾರವು ಮೋಡ ಬಿತ್ತನೆಯ ಮೊರೆ ಹೋಗಿತ್ತು. ಈ ಪ್ರಯೋಗದಲ್ಲಿ ದೆಹಲಿ ಸರ್ಕಾರದೊಂದಿಗೆ ಐಐಟಿ ಕಾನ್ಪುರ ಕೈಜೋಡಿಸಿದೆ. ಮೋಡ ಬಿತ್ತನೆಯಿಂದ ಮಳೆ ಬರಿಸುವುದು ಮಂಗಳವಾರ ಕೈಗೂಡದಿದ್ದರೂ, ಬುಧವಾರ ಮತ್ತೆ ಪ್ರಯತ್ನಗಳನ್ನು ಮುಂದುವರೆಸಲು ಸರ್ಕಾರ ಮತ್ತು ಐಐಟಿ ಕಾನ್ಪುರ ನಿರ್ಧರಿಸಿವೆ. ಬುಧವಾರದ ಪ್ರಯತ್ನವು ಉತ್ತಮ ಫಲಿತಾಂಶ ನೀಡುವ ನಿರೀಕ್ಷೆ ಇದೆ ಎಂದು ಮಣೀಂದ್ರ ಅಗರ್ವಾಲ್ ತಿಳಿಸಿದ್ದಾರೆ.
ಮಂಗಳವಾರ, ಮೋಡ ಬಿತ್ತಲೆ ಪ್ರಕ್ರಿಯೆಯಲ್ಲಿ ಬಳಸಲಾದ ಮಿಶ್ರಣದಲ್ಲಿ ಕೇವಲ 20% ಸಿಲ್ವರ್ ಅಯೋಡೈಡ್ ಇತ್ತು. ಉಳಿದಂತೆ, ಕಲ್ಲು ಉಪ್ಪು ಮತ್ತು ಇತರ ಉಪ್ಪಿನ ಅಂಶದ ಉತ್ಪನ್ನಗಳು ಇದ್ದವು. 14 ಭಾಗಗಳಲ್ಲಿ ಮೋಡ ಬಿತ್ತನೆ ಪ್ರಕ್ರಿಯೆ ನಡೆದಿದೆ ಎಂದು ಅವರು ವಿವರಿಸಿದ್ದಾರೆ.
“ಮೋಡ ಬಿತ್ತನೆಯಾದ ಬಳಿಕ ಇಲ್ಲಿಯವರೆಗೆ ಮಳೆಯಾಗಿಲ್ಲ. ದುರದೃಷ್ಟವಶಾತ್, ಈ ಮೋಡಗಳು ಇಂದು ಹೆಚ್ಚಿನ ತೇವಾಂಶವನ್ನು ಹೊಂದಿರುವುದಿಲ್ಲ. ಕಡಿಮೆ ತೇವಾಂಶವಿದ್ದರೆ, ಮಳೆಯಾಗುವ ಸಾಧ್ಯತೆ ತುಂಬಾ ಕಡಿಮೆ.ಆದರೆ ಈ ಪ್ರಯೋಗವು ನಮ್ಮ ತಂಡಕ್ಕೆ ಈ ಪ್ರಯೋಗವನ್ನು ನಾವು ಮುಂದುವರಿಸಬಹುದು ಎಂಬ ವಿಶ್ವಾಸವನ್ನು ನೀಡಿದೆ” ಎಂದು ಅವರು ಹೇಳಿರುವುದಾಗಿ ಎನ್ಡಿಟಿವಿ ವರದಿ ಮಾಡಿದೆ.
ಈ ಲೇಖನ ಓದಿದ್ದೀರಾ?: ಬಿಹಾರ ಚುನಾವಣೆ | ನಿತೀಶ್ ಕುಮಾರ್ ಮತ್ತು ಬಿಜೆಪಿಯ ಸ್ವಯಂ ಸೋಲು
“ಬುಧವಾರ ಮಳೆಯಾಗುವ ಬಗ್ಗೆ ದ್ವಂದ್ವವಿದೆ. ಕೆಲವರು ಮಳೆಯಾಗುತ್ತದೆ ಎನ್ನುತ್ತಿದ್ದಾರೆ. ಕೆಲವರು ಮಳೆಯಾಗುವ ಬಗ್ಗೆ ಸಂದೇಹ ವ್ಯಕ್ತಪಡಿಸಿದ್ದಾರೆ. ಆದರೆ, ನಮ್ಮ ತಂಡವು ‘ಮೋಡದ ಹೊದಿಕೆಯು ತುಂಬಾ ಕಡಿಮೆ ತೇವಾಂಶ ಹೊಂದಿತ್ತು’ ಎಂಬುದನ್ನು ಕಂಡುಕೊಂಡಿದೆ. ಆದ್ದರಿಂದ ಬುಧವಾರ ಮಳೆಯಾಗುವ ಬಗ್ಗೆ ನಮಗೆ ಯಾವುದೇ ನಿರೀಕ್ಷೆಯಿಲ್ಲ” ಎಂದು ಅಗರ್ವಾಲ್ ಹೇಳಿದ್ದಾರೆ.
ದೆಹಲಿಯಲ್ಲಿ ನಿರಂತರ ಮಾಲಿನ್ಯದ ಸಮಸ್ಯೆಗೆ ಮೋಡ ಬಿತ್ತನೆ ದೀರ್ಘಾವಧಿಯ ಪರಿಹಾರವಾಗಬಹುದೇ ಎಂಬ ‘ಎನ್ಡಿಟಿವಿ’ ಪ್ರಶ್ನೆಗೆ ಉತ್ತರಿಸಿರುವ ಅವರು, ‘ಸಾಧ್ಯವಿಲ್ಲ’ ಎಂದು ಸ್ಪಷ್ಟಪಡಿಸಿದ್ದಾರೆ.
“ಇದು ಒಂದು SOS ಪರಿಹಾರ. ನಿಮಗೆ ಬಿಕ್ಕಟ್ಟಿನ ಪರಿಸ್ಥಿತಿ ಇದ್ದಾಗ, ಅಂದರೆ ಅತಿ ಹೆಚ್ಚು ಮಾಲಿನ್ಯ ಉಂಟಾದಾಗ, ಮಾಲಿನ್ಯವನ್ನು ಕಡಿಮೆ ಮಾಡಲು ಪ್ರಯತ್ನಿಸಬಹುದಾದ ವಿಧಾನಗಳಲ್ಲಿ ಇದೂ ಒಂದು. ಇದು ಶಾಶ್ವತ ಪರಿಹಾರವಲ್ಲ. ಮಾಲಿನ್ಯದ ಮೂಲಗಳನ್ನು ನಿಯಂತ್ರಿಸುವುದೇ ಶಾಶ್ವತ ಪರಿಹಾರವಾಗಿದೆ. ಆದರ್ಶಪ್ರಾಯವಾಗಿ, ಮೋಡ ಬಿತ್ತನೆಯ ಅಗತ್ಯವಿಲ್ಲದ ಹಂತವನ್ನು ನಾವು ತಲುಪಬೇಕು. ಆದರೆ, ಅಂತಹ ಪರಿಸ್ಥಿತಿ ಸಾಧ್ಯವಾಗುವವರೆಗೆ ಮಾಲಿನ್ಯವನ್ನು ಸ್ವಲ್ಪ ಮಟ್ಟಿಗೆ ಕಡಿಮೆ ಮಾಡಲು ಮೋಡ ಬಿತ್ತನೆ ನೆರವಾಗುತ್ತದೆ” ಎಂದು ಅವರು ತಿಳಿಸಿದ್ದಾರೆ.
