ನವದೆಹಲಿಯಲ್ಲಿ ನಡೆಯುತ್ತಿರುವ ‘ಇಂಡಿಯಾ ಎಐ ಇಂಪ್ಯಾಕ್ಟ್ ಶೃಂಗಸಭೆ’ಯಲ್ಲಿ ಚೀನಾ ಮೂಲದ ರೋಬೊಡಾಗ್ ಒಂದನ್ನು ತಮ್ಮದೇ ಸ್ವಂತ ಆವಿಷ್ಕಾರ ಎಂದು ಬಿಂಬಿಸಿ ತೀವ್ರ ಮುಖಭಂಗ ಅನುಭವಿಸಿದ ನೋಯ್ಡಾ ಮೂಲದ ಗಲ್ಗೋಟಿಯಾಸ್ ವಿಶ್ವವಿದ್ಯಾಲಯಕ್ಕೆ ಎಕ್ಸ್ಪೋ ಮಳಿಗೆಯನ್ನು ತಕ್ಷಣವೇ ತೆರವುಗೊಳಿಸುವಂತೆ ಸೂಚಿಸಲಾಗಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ಈ ಕುರಿತು ವ್ಯಾಪಕ ಟೀಕೆಗಳು ವ್ಯಕ್ತವಾದ ಬೆನ್ನಲ್ಲೇ ಈ ಕಠಿಣ ಕ್ರಮ ಕೈಗೊಳ್ಳಲಾಗಿದೆ ಎಂದು ಸರ್ಕಾರಿ ಮೂಲಗಳು ತಿಳಿಸಿವೆ.
ಶೃಂಗಸಭೆಯಲ್ಲಿ ವಿಶ್ವವಿದ್ಯಾಲಯದ ‘ಸೆಂಟರ್ ಆಫ್ ಎಕ್ಸಲೆನ್ಸ್’ ಪ್ರತಿನಿಧಿಯೊಬ್ಬರು ‘ಓರಿಯನ್’ ಹೆಸರಿನ ರೋಬೊಡಾಗ್ ಅನ್ನು ಪ್ರದರ್ಶಿಸುತ್ತಾ, ಇದು ತಮ್ಮ ತಂಡದ ಆಂತರಿಕ ಆವಿಷ್ಕಾರ ಎಂದು ವಿವರಿಸುವ ವಿಡಿಯೊವೊಂದು ವೈರಲ್ ಆದ ಬಳಿಕ ಈ ವಿವಾದ ಭುಗಿಲೆದ್ದಿತು. ವಿಡಿಯೊ ಹರಿದಾಡುತ್ತಿದ್ದಂತೆ ಎಚ್ಚೆತ್ತ ಆನ್ಲೈನ್ ತಜ್ಞರು, ಇದು ವಾಸ್ತವವಾಗಿ ಚೀನಾದ ‘ಯೂನಿಟ್ರೀ’ ಕಂಪನಿಯು ತಯಾರಿಸಿದ ‘Go2’ ಮಾದರಿಯ ರೋಬೊಡಾಗ್ ಎಂಬುದನ್ನು ಪತ್ತೆಹಚ್ಚಿದರು. ಈ ಯಂತ್ರವು ಮಾರುಕಟ್ಟೆಯಲ್ಲಿ ಸುಮಾರು 2.3 ಲಕ್ಷದಿಂದ 3 ಲಕ್ಷ ರೂ. ಗಳಿಗೆ ವಾಣಿಜ್ಯ ಉಪಯೋಗಕ್ಕಾಗಿ ಸುಲಭವಾಗಿ ಲಭ್ಯವಿದೆ ಎನ್ನುವ ಸತ್ಯವನ್ನು ಬಯಲು ಮಾಡಿದರು.
ವಿವಾದ ತಾರಕಕ್ಕೇರುತ್ತಿದ್ದಂತೆ ಎಕ್ಸ್ ಖಾತೆಯಲ್ಲಿ ಸ್ಪಷ್ಟನೆ ನೀಡಿದ ವಿಶ್ವವಿದ್ಯಾಲಯವು, ತಾನು ಈ ರೋಬೊಡಾಗ್ ಅನ್ನು ಸ್ವತಃ ತಯಾರಿಸಿದ್ದಾಗಿ ಎಲ್ಲಿಯೂ ಹೇಳಿಕೊಂಡಿಲ್ಲ ಎಂದು ಸಮರ್ಥಿಸಿಕೊಂಡಿತು. ವಿದ್ಯಾರ್ಥಿಗಳ ಕಲಿಕೆ, ಪ್ರಯೋಗ ಮತ್ತು ಎಐ ತಂತ್ರಜ್ಞಾನದ ಅಧ್ಯಯನಕ್ಕಾಗಿ ಇದನ್ನು ತರಿಸಲಾಗಿದ್ದು, ಇದೊಂದು ‘ಚಲಿಸುವ ತರಗತಿ’ ಆಗಿದೆಯೇ ಹೊರತು ತಮ್ಮ ಎಂಜಿನಿಯರಿಂಗ್ ಪ್ರದರ್ಶನವಲ್ಲ ಎಂದು ವಿವಿ ಹೇಳಿತು. ಆದರೆ, ವಿವಿಯ ಈ ಸಮರ್ಥನೆಯನ್ನು ಎಕ್ಸ್ ವೇದಿಕೆಯ ‘ಕಮ್ಯುನಿಟಿ ನೋಟ್’ ಸುಳ್ಳು ಎಂದು ಸಾಬೀತುಪಡಿಸಿತು.
ಆಮದು ಮಾಡಿಕೊಂಡ ಯಂತ್ರಾಂಶವನ್ನು ತಮ್ಮದೇ ಸ್ವದೇಶಿ ತಂತ್ರಜ್ಞಾನ ಎಂದು ಬಿಂಬಿಸಿದ ಆರೋಪ ಸಾಬೀತಾದ ಹಿನ್ನೆಲೆಯಲ್ಲಿ ಗಲ್ಗೋಟಿಯಾಸ್ ವಿಶ್ವವಿದ್ಯಾಲಯವನ್ನು ಎಐ ಶೃಂಗಸಭೆಯಿಂದ ಹೊರನಡೆಯುವಂತೆ ಸೂಚಿಸಿ ಮಳಿಗೆಯನ್ನು ಕಡ್ಡಾಯವಾಗಿ ತೆರವುಗೊಳಿಸಲಾಗಿದೆ.
