ಇಂಧೋರ್ ರೈಲ್ವೇ ನಿಲ್ಧಾಣದ ಬಳಿ 90° ತಿರುವುವುಳ್ಳ ರಸ್ತೆ ನಿರ್ಮಾಣದಿಂದ ಭಾರೀ ಟ್ರೋಲ್ಗೆ ಗುರಿಯಾಗಿದ್ದ ಬಿಜೆಪಿ ಆಡಳಿತ ಇರುವ ಮಧ್ಯಪ್ರದೇಶ, ಇದೀಗ ಮತ್ತೊಮ್ಮೆ ವಿವಾದಕ್ಕೆ ಸಿಲುಕಿದೆ. ಮಧ್ಯಪ್ರದೇಶದ ಹಳ್ಳಿಯೊಂದರಲ್ಲಿ ನಡುರಸ್ತೆಯಲ್ಲೇ ನೀರೆತ್ತುವ ‘ಕೈ ಪಂಪ್’ ಇದ್ದು, ಅದರ ಸುತ್ತಲೂ ರಸ್ತೆ ನಿರ್ಮಿಸಿರುವುದು ವರದಿಯಾಗಿದೆ.
ಮಧ್ಯಪ್ರದೇಶದ ಸಿಧಿ ಜಿಲ್ಲೆಯ ಡೋಲ್ ಕೊಥಾರ್ ಹಳ್ಳಿಯಲ್ಲಿ ಹೊಸದಾಗಿ ರಸ್ತೆ ನಿರ್ಮಾಣ ಮಾಡಲಾಗಿದೆ. ಗ್ರಾಮಸ್ಥರಿಗೆ ಕುಡಿಯುವ ನೀರಿನ ಸೌಕರ್ಯಕ್ಕಾಗಿ ನಿರ್ಮಿಸಲಾಗಿದ್ದ ಕೈ ಪಂಪ್ಅನ್ನು ಮಧ್ಯ ಭಾಗದಲ್ಲಿ ಬಿಟ್ಟು ರಸ್ತೆ ನಿರ್ಮಿಸಲಾಗಿದೆ. ನಡುರಸ್ತೆಯಲ್ಲಿ ಕೈ ಪಂಪ್ ಇರುವ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ವಿಡಿಯೋದಲ್ಲಿ; ರಸ್ತೆಯ ಮಧ್ಯ ಭಾಗದಲ್ಲಿ ಕೈ ಪಂಪ್ ಇದೆ. ಅದರ ಸುತ್ತಲು ಒಂದೆರಡು ಅಡಿಗಳಷ್ಟು ಆಳದ ಜಾಗ ಬಿಡಲಾಗಿದೆ. ಬದಿಯಲ್ಲಿ ಸಿಮೆಂಟ್ ಕಂಬಗಳನ್ನು ನಿಲ್ಲಿಸಲಾಗಿದೆ. ಸುತ್ತಲೂ ರಸ್ತೆ ಇದೆ. ರಸ್ತೆಗೂ ಕೈ ಪಂಪ್ಗೆ ಮೂರು ಅಡಿ ಆಳವಿದೆ. ಆ ವಿಡಿಯೋವನ್ನು ಹಂಚಿಕೊಳ್ಳುತ್ತಿರುವ ನೆಟ್ಟಿಗರು, ಇದು ‘ರಸ್ತೆ ಕೈ ಪಂಪ್’ ಎಂದು ಟ್ರೋಲ್ ಮಾಡುತ್ತಿದ್ದಾರೆ.
Madhya Pradesh: A road was built around a hand pump. This shows their level of dedication to work. pic.twitter.com/9BEk1eXS39
— Брат (@1vinci6le) October 28, 2025
ಪ್ರಧಾನ ಮಂತ್ರಿ ಜನ್ಮನ್ ಯೋಜನೆಯಡಿ ಕೈ ಪಂಪ್ ನಿರ್ಮಿಸಲಾಗಿತ್ತು. ಇದು ರಸ್ತೆ ನಿರ್ಮಾಣಕ್ಕೂ ಮುನ್ನವೇ ಅಸ್ತಿತ್ವದಲ್ಲಿತ್ತು. ಆದರೆ ರಸ್ತೆ ನಿರ್ಮಿಸುವಾಗ ಅಧಿಕಾರಿಗಳು ಕೈಪಂಪ್ ಸ್ಥಳಾಂತರಿಸದೆ ಅಥವಾ ರಸ್ತೆಯ ಮಾರ್ಗವನ್ನು ಬದಲಿಸದೆ, ಕೈ ಪಂಪ್ ಸುತ್ತಲೂ ರಸ್ತೆ ನಿರ್ಮಾಣ ಮಾಡಿದ್ದಾರೆ. ಇದು, ಆಡಳಿತದ ನಿರ್ಲಕ್ಷ್ಯವೆಂದು ಕೆಲವರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
“ರಸ್ತೆ ಕಾಮಗಾರಿನಡೆಯುತ್ತಿದ್ದ ಸಮಯದಲ್ಲಿಯೇ ಕೈ ಪಂಪ್ ಸ್ಥಳಾಂತರಿಸಲು ಹಲವು ಬಾರಿ ಮನವಿ ಮಾಡಿದರೂ ಅಧಿಕಾರಿಗಳು ಕ್ರಮ ಕೈಗೊಂಡಿಲ್ಲ” ಎಂದು ಗ್ರಾಮಸ್ಥರು ಆರೋಪಿಸಿದ್ದಾರೆ.
ಘಟನೆ ಬಗ್ಗೆ ಪ್ರಕ್ರಿಯಿಸಿರುವ ಸ್ಥಳೀಯ ಪಂಚಾಯತ್ ಕಾರ್ಯದರ್ಶಿ ಮೋತಿಲಾಲ್ ಸಾಕೇತ್, “ಕೈಪಂಪ್ಅನ್ನು ಸ್ಥಳಾಂತರಿಸುವ ಅಧಿಕಾರ ಪಂಚಾಯತಿಗೆ ಇಲ್ಲ. ಹೀಗಾಗಿ, ರಸ್ತೆ ಕಾಮಗಾರಿ ವೇಳೆ ಅದನ್ನು ಸ್ಥಳಾಂತರಿಸಲು ಸಾಧ್ಯವಾಗಲಿಲ್ಲ” ಎಂದು ಹೇಳಿದ್ದಾರೆ.
“ಕೈ ಪಂಪ್ ಸುತ್ತಲೂ ರಸ್ತೆ ನಿರ್ಮಿಸಿರುವುದು ನಮ್ಮ ಗಮನಕ್ಕೆ ಬಂದಿದೆ. ಸಂಬಂಧಪಟ್ಟ ಅಧಿಕಾರಿಗಳ ವಿರುದ್ಧ ಕ್ರಮ ಕೈಗೊಳ್ಳಲಾಗುತ್ತದೆ. ತನಿಖೆಗೆ ಆದೇಶಿಸಲಾಗಿದೆ” ಎಂದು ಸಿಧಿ ಜಿಲ್ಲೆಯ ಉಪವಿಭಾಗೀಯ ಮ್ಯಾಜಿಸ್ಟ್ರೇಟ್ (SDM) ರಾಕೇಶ್ ಶುಕ್ಲಾ ಹೇಳಿದ್ದಾರೆ.
