ದಲಿತರ ಹಕ್ಕುಗಳ ಪ್ರತಿಪಾದನೆಯನ್ನು “ಸಂತ್ರಸ್ತ ಮನೋಭಾವದ ನಶೆ” (Drugged by victimhood) ಎಂದು ಜವಾಹರಲಾಲ್ ನೆಹರೂ ವಿಶ್ವವಿದ್ಯಾಲಯದ (ಜೆಎನ್ಯು) ಕುಲಪತಿ ಶಾಂತಿಶ್ರೀ ಧೂಳಿಪುಡಿ ಪಂಡಿತ್ ಅವರು ಹೇಳಿರುವುದನ್ನು ತೀವ್ರವಾಗಿ ಖಂಡಿಸಿರುವ ಜೆಎನ್ಯು ವಿದ್ಯಾರ್ಥಿ ಸಂಘಟನೆಯು ದೇಶವ್ಯಾಪಿ ಪ್ರತಿಭಟನೆಗೆ ಕರೆ ನೀಡಿದೆ. ಅಲ್ಲದೆ, “ಬಹಿರಂಗ ಜಾತಿವಾದಿ” ಹೇಳಿಕೆ ನೀಡಿರುವ ಕುಲಪತಿಯವರು ಕೂಡಲೇ ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಬೇಕೆಂದು ಆಗ್ರಹಿಸಿದೆ.
ಫೆಬ್ರವರಿ 16 ರಂದು ಬಿಡುಗಡೆಯಾದ ಪಾಡ್ಕಾಸ್ಟ್ವೊಂದರಲ್ಲಿ ಮೀಸಲಾತಿ ಮತ್ತು ಸಾಮಾಜಿಕ ನ್ಯಾಯದ ಕುರಿತು ಮಾತನಾಡುವಾಗ ಕುಲಪತಿಗಳು ಈ ವಿವಾದಾತ್ಮಕ ಹೇಳಿಕೆ ನೀಡಿದ್ದಾರೆ. ಇದನ್ನು ಕೇಳಿ ತಾವು “ಆಘಾತಕ್ಕೊಳಗಾಗಿದ್ದೇವೆ ಮತ್ತು ನಾಚಿಕೆಪಡುತ್ತೇವೆ” ಎಂದು ವಿದ್ಯಾರ್ಥಿ ಸಂಘಟನೆ ಶುಕ್ರವಾರ ಬಿಡುಗಡೆ ಮಾಡಿದ ಹೇಳಿಕೆಯಲ್ಲಿ ತಿಳಿಸಿದೆ.
ಜೆಎನ್ಯುಎಸ್ಯು ಹೇಳಿಕೆಯ ಪ್ರಕಾರ, ಕುಲಪತಿಯವರು ಮೊದಲು ಆರ್ಎಸ್ಎಸ್ನ ಮಹಿಳಾ ವಿಭಾಗವಾದ ‘ರಾಷ್ಟ್ರೀಯ ಸೇವಿಕಾ ಸಮಿತಿ’ಯೊಂದಿಗಿನ ತಮ್ಮ ಒಡನಾಟವನ್ನು ಸ್ಮರಿಸಿಕೊಂಡಿದ್ದು, ಆ ಸಂಘಟನೆಯೇ ತಮ್ಮ ಪ್ರಪಂಚದ ದೃಷ್ಟಿಕೋನವನ್ನು ರೂಪಿಸಿದೆ ಎಂದು ಹೇಳಿದ್ದಾರೆ. ತದನಂತರ, ಹೊಸದಾಗಿ ಪರಿಚಯಿಸಲಾದ ಯುಜಿಸಿ ನಿಯಮಾವಳಿಗಳನ್ನು “ಅನಗತ್ಯ” ಮತ್ತು “ತರ್ಕಹೀನ” ಎಂದು ಜರೆದಿರುವ ಅವರು, ಐತಿಹಾಸಿಕವಾಗಿ ನಡೆದುಬಂದಿರುವ ಜಾತಿ ಆಧಾರಿತ ತಾರತಮ್ಯವನ್ನು ಸರಿಪಡಿಸುವ ನೀತಿಗಳನ್ನು “ಒಂದು ರೀತಿಯ ಮಾದಕವಸ್ತು (ಡ್ರಗ್ಸ್)” ಎಂದು ಕರೆದಿದ್ದಾರೆ.
ಇದನ್ನು ಓದಿದ್ದೀರಾ? 2026 ಅಸ್ಸಾಂ ಮಹಾಸಮರ: ಕಾಗದದಲ್ಲೇ ಉಳಿದ ಬಿಜೆಪಿ ಸರ್ಕಾರದ ಕಲ್ಯಾಣ
“ನೀವು ಶಾಶ್ವತವಾಗಿ ಸಂತ್ರಸ್ತರಾಗಿ ಅಥವಾ ಬಲಿಪಶು ಕಾರ್ಡ್ (Victim card) ಬಳಸಿಕೊಂಡು ಪ್ರಗತಿ ಹೊಂದಲು ಸಾಧ್ಯವಿಲ್ಲ. ಕರಿಯರಿಗಾಗಿ ಈ ವ್ಯವಸ್ಥೆಯನ್ನು ಮಾಡಲಾಗಿತ್ತು; ಇಲ್ಲಿ ದಲಿತರಿಗೂ ಅದೇ ವ್ಯವಸ್ಥೆಯನ್ನು ತರಲಾಯಿತು” ಎಂದು ಕುಲಪತಿ ಶಾಂತಿಶ್ರೀ ಅವರು ಹೇಳಿದ್ದಾರೆ ಎಂದು ಜೆಎನ್ಯುಎಸ್ಯು ತನ್ನ ಹೇಳಿಕೆಯಲ್ಲಿ ಉಲ್ಲೇಖಿಸಿದೆ.
ಕುಲಪತಿಯವರ ಮಾತುಗಳನ್ನು “ಅಸಹ್ಯಕರ” ಎಂದು ಕರೆದಿರುವ ಜೆಎನ್ಯುಎಸ್ಯು, ಇಂತಹ ದೃಷ್ಟಿಕೋನವು ವಿಶ್ವವಿದ್ಯಾಲಯಗಳು ಮತ್ತು ಸಾರ್ವಜನಿಕ ಸಂಸ್ಥೆಗಳಲ್ಲಿರುವ ಜಾತಿ ಆಧಾರಿತ ತಾರತಮ್ಯ ಮತ್ತು ರಚನಾತ್ಮಕ ಅನ್ಯಾಯದ ಇತಿಹಾಸದ ಕಡೆಗಿನ ತೀವ್ರ ಸಂವೇದನಾಶೂನ್ಯತೆಯನ್ನು ಪ್ರತಿಫಲಿಸುತ್ತದೆ ಎಂದು ಆಕ್ರೋಶ ವ್ಯಕ್ತಪಡಿಸಿದೆ.
”ಇದು ಕೇವಲ ವೈಯಕ್ತಿಕ ಅಭಿಪ್ರಾಯವಲ್ಲ, ಬದಲಾಗಿ ದಲಿತರು ಮತ್ತು ಇತರ ಶೋಷಿತ ಸಮುದಾಯಗಳ ನೈಜ ಬದುಕಿನ ವಾಸ್ತವಗಳನ್ನು ನಿರಾಕರಿಸುವ ಮನಸ್ಥಿತಿಯಾಗಿದೆ. ಈ ಹೇಳಿಕೆಗಳು ತಲೆಮಾರುಗಳಿಂದ ಸಮುದಾಯಗಳು ಎದುರಿಸುತ್ತಿರುವ ತಾರತಮ್ಯವನ್ನು ಅತ್ಯಂತ ಲಘುವಾಗಿ ಪರಿಗಣಿಸುತ್ತವೆ,” ಎಂದು ಯೂನಿಯನ್ ಹೇಳಿದೆ.
