ಕೇರಳದಲ್ಲಿ ಸ್ಥಳೀಯ ಸಂಸ್ಥೆಗಳಿಗೆ ಗುರುವಾರ 2ನೇ ಹಂತದ ಮತದಾನ ನಡೆಯುತ್ತಿದೆ. ಕೇರಳದ ಉತ್ತರದ ಜಿಲ್ಲೆಗಳ ಒಟ್ಟು 604 ಸ್ಥಳೀಯ ಸಂಸ್ಥೆಗಳಿಗೆ ಮತದಾರರು ಇಂದು (ಡಿ.11) ಮತಚಲಾಯಿಸುತ್ತಿದ್ದಾರೆ. ಸಂಜೆ 4 ಗಂಟೆಯವರೆಗೆ 60% ಮತದಾನವಾಗಿದೆ ಎಂದು ಚುನಾವಣಾ ಆಯೋಗ ಹೇಳಿದೆ.
ಡಿಸೆಂಬರ್ 9ರಂದು ದಕ್ಷಿಣ ಕೇರಳದ ಜಿಲ್ಲೆಗಳಲ್ಲಿ ಮೊದಲ ಹಂತದಲ್ಲಿ 595 ಸ್ಥಳೀಯ ಸಂಸ್ಥೆಗಳಿಗೆ ಮತದಾನ ನಡೆದಿತ್ತು. ಗುರುವಾರ, ಉತ್ತರ ಕೇರಳದ ಏಳು ಜಿಲ್ಲೆಗಳಾದ ತ್ರಿಶೂರ್, ಪಾಲಕ್ಕಾಡ್, ಮಲಪ್ಪುರಂ, ಕೋಯಿಕ್ಕೋಡ್, ವಯನಾಡ್, ಕಣ್ಣೂರು ಹಾಗೂ ಕಾಸರಗೋಡುಗಳಲ್ಲಿ ಮತದಾನ ನಡೆದಿದೆ.
ಒಟ್ಟು 604 ಸ್ಥಳೀಯ ಸಂಸ್ಥೆಗಳ ಪೈಕಿ 470 ಗ್ರಾಮ ಪಂಚಾಯತಿಗಳು, 77 ಪುರ ಸಭೆಗಳು, 7 ಜಿಲ್ಲಾ ಪಂಚಾಯತಿಗಳು, 27 ನಗರಸಭೆಗಳು ಹಾಗೂ 3 ಮಹಾನಗರ ಪಾಲಿಕೆಗಳಿಗೆ ಮತದಾನವಾಗಿದೆ. 7 ಜಿಲ್ಲೆಗಳ ಒಟ್ಟು ಮತದಾರರ ಪೈಕಿ 60% ಮತದಾರರು ಈವರೆಗೆ ಮತಚಲಾಯಿಸಿದ್ದಾರೆ. ಪಾಲಕ್ಕಾಡ್ ಜಿಲ್ಲೆಯು ಅತೀ ಹೆಚ್ಚು ಮತಗಳನ್ನು ದಾಖಲಿಸಿದ್ದು, 65% ಮತದಾರರು ಮತದಾನ ಮಾಡಿದ್ದಾರೆ.
ಸಂಜೆ 6 ಗಂಟೆವರೆಗೆ ಮತದಾನ ನಡೆಯಲಿದ್ದು, ಮತದಾನವು 80% ಗಡಿದಾಟುವ ನಿರೀಕ್ಷೆ ಇದೆ.
2ನೇ ಹಂತದ ಚುನಾವಣೆ ಎದುರಿಸುತ್ತಿರುವ ಜಿಲ್ಲೆಗಳಲ್ಲಿ 2020ರಲ್ಲಿ ಕೋಯಿಕ್ಕೋಡ್ ಜಿಲ್ಲೆಯು ಅತೀ ಹೆಚ್ಚು ಮತದಾನವನ್ನು ದಾಖಲಿಸಿತ್ತು. 81.28% ಮತದಾನದಾರರು ಮತ ಚಲಾಯಿಸಿದ್ದರು. ನಂತರದ ಸ್ಥಾನದಲ್ಲಿ ಕಣ್ಣೂರು 79.5% ಮತದಾನ ದಾಖಲಿಸಿದೆ. ಉಳಿದಂತೆ,
ತ್ರಿಶೂರ್: 76.34%
ಪಾಲಕ್ಕಾಡ್: 78.82%
ಮಲಪ್ಪುರಂ: 78.87%
ಕೋಝಿಕೋಡ್: 81.28%
ವಯನಾಡ್: 79.46%
ಕಣ್ಣೂರು: 79.5%
ಕಾಸರಗೋಡು: 77.3% ಮತದಾರರು ಮತ ಚಲಾಯಿಸಿದ್ದರು.
