ಪಹಲ್ಗಾಮ್ ಭಯೋತ್ಪಾದಕ ದಾಳಿಯ ನಂತರ, ಏಪ್ರಿಲ್ 11 ರಿಂದ ಮೇ 8 ರವರೆಗೆ ದೇಶದಲ್ಲಿ ಒಟ್ಟು 184 ಮುಸ್ಲಿಮ್ ದ್ವೇಷ ಘಟನೆಗಳು ನಡೆದಿವೆ. ಅಸೋಸಿಯೇಷನ್ ಫಾರ್ ಪ್ರೊಟೆಕ್ಷನ್ ಆಫ್ ಸಿವಿಲ್ ರೈಟ್ಸ್ (APCR) ವರದಿಯು ಈ ನಂಜಿನ ಅಂಶವನ್ನು ಹೊರಹಾಕಿದೆ.
ಈ ಘಟನೆಗಳ ಪೈಕಿ ಕನಿಷ್ಠ 106ರಲ್ಲಿ ಪಹಲಗಾಮ್ ದಾಳಿಯು ಪ್ರಚೋದನಕಾರಿಯಾಗಿ ಪರಿಣಮಿಸಿದೆ. ಈ ಘಟನೆಗಳಲ್ಲಿ 316 ಜನರು ದೈಹಿಕವಾಗಿ- ಮಾನಸಿಕವಾಗಿ ಬಾಧಿತರಾಗಿದ್ದಾರೆ.
ಒಗ್ಗಟ್ಟು ಮತ್ತು ಸಾಮರಸ್ಯದ ಅಗತ್ಯವಿರುವ ಸಮಯದಲ್ಲಿ, ದೇಶವು ತೀವ್ರ ಕೋಮುವಾದಿ ಧ್ರುವೀಕರಣಕ್ಕೆ ಸಾಕ್ಷಿಯಾಗಿದೆ.
ಈ ದ್ವೇಷದ ಘಟನೆಗಳು ಉತ್ತರ ಪ್ರದೇಶದಿಂದ ಅತಿ ಹೆಚ್ಚಿನ ಸಂಖ್ಯೆಯಲ್ಲಿ (43) ವರದಿಯಾಗಿವೆ. ಮಹಾರಾಷ್ಟ್ರ, ಉತ್ತರಾಖಂಡ್, ಮತ್ತು ಮಧ್ಯಪ್ರದೇಶಲ್ಲೂ ಈ ದ್ವೇಷದ ನಂಜು ಹರಿದಿದೆ.
ಉತ್ತರ ಪ್ರದೇಶದ ಅಲಿಘರ್ನಲ್ಲಿ, 15 ವರ್ಷದ ಮುಸ್ಲಿಂ ಬಾಲಕನ ಮೇಲೆ ಶಾಲೆಯಿಂದ ಮನೆಗೆ ಹಿಂದಿರುಗುವಾಗ ಗುಂಪೊಂದು ದಾಳಿ ಮಾಡಿದೆ. ಪಾಕಿಸ್ತಾನದ ಧ್ವಜದ ಮೇಲೆ ಮೂತ್ರ ವಿಸರ್ಜನೆ ಮಾಡುವಂತೆ ಅವನನ್ನು ಒತ್ತಾಯಿಸಲಾಗಿದೆ.
ಭೋಪಾಲ್ನಲ್ಲಿ, ರೈಲ್ವೆ ಹೆಡ್ ಕಾನ್ಸ್ಟೇಬಲ್ ನಜರ್ ದೌಲತ್ ಖಾನ್ ಅವರನ್ನು ಕುಡಿದ ಯುವಕರ ಗುಂಪೊಂದು ಏಪ್ರಿಲ್ 26 ರಂದು ಕ್ರೂರವಾಗಿ ಥಳಿಸಿದೆ. ಖಾನ್ ಅವರು ರಾತ್ರಿ 2 ಗಂಟೆ ಸುಮಾರಿಗೆ ಗಸ್ತು ತಿರುಗುತ್ತಿದ್ದಾಗ, ರೈಲ್ವೆ ನಿಲ್ದಾಣದ ಒಳಗೆ ಪಾರ್ಕ್ ಮಾಡಿದ ಕಾರಿನಲ್ಲಿ ಕುಡಿಯುತ್ತಿದ್ದ ಯುವಕರ ಗುಂಪನ್ನು ಗಮನಿಸಿದ್ದಾರೆ. ಖಾನ್ ಆಕ್ಷೇಪಿಸಿದಾಗ, ಪರಿಸ್ಥಿತಿ ಹಿಂಸೆಗೆ ತಿರುಗುತ್ತದೆ. ಖಾನ್ರ ಮುಸ್ಲಿಂ ಹೆಸರನ್ನು ಗಮನಿಸಿದ ದಾಳಿಕೋರರು, ಅವರ ಧಾರ್ಮಿಕ ಗುರುತನ್ನು ಗುರಿಯಾಗಿಸಿ ನಿಂದಿಸಿದ್ದಾರೆ. ನಂತರ ದೈಹಿಕ ದಾಳಿ ನಡೆಸಿ, ಗುದ್ದಾಡಿ, ಅವರ ಸಮವಸ್ತ್ರವನ್ನು ಹರಿದಿದ್ದಾರೆ.
ಚಂಡೀಗಢ, ಉತ್ತರಾಖಂಡ್, ಹಾಗೂ ಹಿಮಾಚಲ ಪ್ರದೇಶದ ಹಾಸ್ಟೆಲ್ಗಳಲ್ಲಿ ಹಲವಾರು ಕಾಶ್ಮೀರಿ ವಿದ್ಯಾರ್ಥಿಗಳ ಮೇಲೆ ಹಲ್ಲೆ ನಡೆಸಲಾಗಿದೆ. ಡೆಹರಾಡೂನ್ನಲ್ಲಿ, ಹಿಂದೂ ರಕ್ಷಾ ದಳ ಮತ್ತು ಇತರ ಬಲಪಂಥೀಯ ಗುಂಪುಗಳು ಹಲವಾರು ಕಾಲೇಜುಗಳಿಗೆ ಕಾಶ್ಮೀರಿ ಮುಸ್ಲಿಂ ವಿದ್ಯಾರ್ಥಿಗಳನ್ನು ಖಾಲಿ ಮಾಡಿಸುವಂತೆ ಬೆದರಿಕೆ ಪತ್ರಗಳನ್ನು ಬರೆದಿವೆ.
ಕಾಶ್ಮೀರಿ ಮುಸ್ಲಿಂ ವ್ಯಾಪಾರಿಗಳ ಮೇಲೆ ದಾಳಿ ನಡೆಸಿರುವ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿವೆ. ಬಜರಂಗದಳದ ಕಾರ್ಯಕರ್ತರು ಮಸ್ಸೂರಿಯಲ್ಲಿ, ಇಬ್ಬರು ಕಾಶ್ಮೀರಿ ಶಾಲು ವ್ಯಾಪಾರಿಗಳನ್ನು ಬೆದರಿಸಿದ್ದಾರೆ. 12 ಲಕ್ಷ ರುಪಾಯಿಯ ಸರಕನ್ನು ತೊರೆದು ತೆರಳುವಂತೆ ಬೆದರಿಕೆ ಹಾಕಲಾಗಿದೆ.
ಮುಸ್ಲಿಮರಿಗೆ ಸೇರಿದ ಆಸ್ತಿಪಾಸ್ತಿಗಳನ್ನು ಗುರಿಯಾಗಿಸಿ ಹಲವು ವಿಧ್ವಂಸಕ ಕೃತ್ಯಗಳು ವರದಿಯಾಗಿವೆ. ಇವುಗಳಲ್ಲಿ ಮದರಸಗಳು, ಮುಸ್ಲಿಂ ಒಡೆತನದ ಅಂಗಡಿಗಳು, ತಳ್ಳು ಬಂಡಿಗಳು, ಮತ್ತು ಸ್ಟಾಲ್ಗಳನ್ನು ಧ್ವಂಸಗೊಳಿಸಲಾಗಿದೆ. ರಾಜಸ್ಥಾನದಲ್ಲಿ ಭಾರತೀಯ ಜನತಾ ಪಕ್ಷದ ಶಾಸಕ ಬಾಲಮುಕುಂದ್ ಆಚಾರ್ಯ ಮುಂದಾಳುತನದಲ್ಲಿ ಮಸೀದಿಯೊಂದನ್ನು ಧ್ವಂಸಗೊಳಿಸಲಾಗಿದೆ. ಉತ್ತರಾಖಂಡ್ನಲ್ಲಿ ಮತ್ತೊಂದು ಮಸೀದಿಯ ಮೇಲೆ ಹಿಂದುತ್ವ ಗುಂಪುಗಳು ಕಲ್ಲೆಸೆದಿವೆ.
ಸರ್ವೋಚ್ಚ ನ್ಯಾಯಾಲಯದ ಮಾರ್ಗಸೂಚಿಗಳನ್ನು ಉಲ್ಲಂಘಿಸಿ ಕಾಶ್ಮೀರದಲ್ಲಿ, ಶಂಕಿತ ಉಗ್ರರ ಮನೆಗಳನ್ನು ನೆಲಸಮಗೊಳಿಸಲಾಗಿದೆ ಎಂದು ಎಪಿಸಿಆರ್ ವರದಿ ತಿಳಿಸಿದೆ.
