ಮೂರು ವರ್ಷಗಳಲ್ಲಿ ಮೂವರು ಮಹಿಳೆಯರನ್ನು ವಿವಾಹವಾಗಿದ್ದ ವ್ಯಕ್ತಿಯನ್ನು ವರದಕ್ಷಿಣೆ ಕಿರುಕುಳದ ಆರೋಪದಲ್ಲಿ ಬಂಧಿಸಿರುವ ಘಟನೆ ಬಿಹಾರದ ಗೋಪಾಲ್ಗಂಜ್ ಜಿಲ್ಲೆಯಲ್ಲಿ ನಡೆದಿದೆ.
ಜಿಲ್ಲೆಯ ಪಿಂಟು ಬರ್ನ್ವಾಲ್ ಎಂಬಾತನ್ನು ಪೊಲೀಸರು ಬಂಧಿಸಿದ್ದಾರೆ. ಆತ, ತನ್ನ ಮೊದಲ ಇಬ್ಬರು ಪತ್ನಿಯರಿಗೆ ವಿಚ್ಛೇದನ ನೀಡದೆಯೇ, ಮೂರನೆ ವಿವಾಹವಾಗಿದ್ದಾರೆ ಎಂದು ಆರೋಪಿಸಲಾಗಿದೆ.
ಇದನ್ನು ಓದಿದ್ದೀರಾ? ವರದಕ್ಷಿಣೆ ಕಿರುಕುಳ | ಮಗು ಕೊಂದು ಗ್ರಾಮ ಪಂಚಾಯತಿ ಅಧ್ಯಕ್ಷೆ ಆತ್ಮಹತ್ಯೆ
ಮೊದಲ ಮತ್ತು 2ನೇ ಪತ್ನಿಯರು ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದಾರೆ. ಅವರ ದೂರಿನ ಆಧಾರದ ಮೇಲೆ ಪಿಂಟು ವಿರುದ್ಧ ಕೌಟುಂಬಿಕ ಹಿಂಸೆ ಮತ್ತು ವರದಕ್ಷಿಣೆ ಕಿರುಕುಳ ಆರೋಪದಡಿ ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ. ಪಿಂಟುನನ್ನು ಬಂಧಿಸಿದ್ದಾರೆ. ಆತನಿಗೆ ನ್ಯಾಯಾಂಗ ಬಂಧನ ವಿಧಿಸಲಾಗಿದೆ.
ಆದಾಗ್ಯೂ, ತನ್ನ ವಿರುದ್ಧದ ಆರೋಪಗಳನ್ನು ಪಿಂಟು ನಿರಾಕರಿಸಿದ್ದಾರೆ. ಮೂವರು ಪತ್ನಿಯರಲ್ಲಿ ಯಾರೊಬ್ಬರಿಂದಲೂ ಒಂದು ರೂಪಾಯಿಯನ್ನೂ ಪಡೆದಿಲ್ಲವೆಂದು ಆತ ಹೇಳಿಕೊಂಡಿದ್ದಾರೆ ಎಂದು ವರದಿಯಾಗಿದೆ.
ತಾವು ಮೂವರು ಮಹಿಳೆಯರನ್ನು ಮದುವೆಯಾಗಿರುವುದಾಗಿ ಪಿಂಟು ಒಪ್ಪಿಕೊಂಡಿದ್ದಾರೆ. ಕೆಲವು ಸಂದರ್ಭಗಳ ಕಾರಣದಿಂದಾಗಿ, ತಾನು ಮೂರು ಮದುವೆಯಾಗುವ ಪರಿಸ್ಥಿತಿ ಬಂದಿತು. ತನ್ನ ಮನೆಯ ಪರಿಸ್ಥಿತಿ ಹದಗೆಟ್ಟಿದ್ದ ಕಾರಣ, ತನ್ನ ಹಿಂದಿನ ಇಬ್ಬರು ಪತ್ನಿಯರೊಂದಿಗೆ ಜೀವನ ಮುಂದುವರಿಸಲು ಅಸಾಧ್ಯವಾಗಿತ್ತು. ಅವರಿಬ್ಬರೂ ತನ್ನ 60 ವರ್ಷದ ತಾಯಿಗೆ ಅಡುಗೆ ಮಾಡಿಕೊಡುತ್ತಿರಲಿಲ್ಲ. ತನ್ನ ತಾಯಿಯೇ ಅವರಿಗೆ ಅಡುಗೆ ಮಾಡಿಕೊಡಬೇಕಿತ್ತು ಎಂದು ಪಿಂಟು ಹೇಳಿರುವುದಾಗಿ ವರದಿಯಾಗಿದೆ.
ಇದನ್ನು ಓದಿದ್ದೀರಾ? ಬೆಂಗಳೂರು | ಪತ್ನಿಗೆ ಐಎಎಸ್ ಅಧಿಕಾರಿಯಿಂದ ವರದಕ್ಷಿಣೆ ಕಿರುಕುಳ; ದೂರು ದಾಖಲು
“ನನ್ನ ಮೊದಲ ಪತ್ನಿ ಖುಷ್ಬೂ, ನನ್ನನ್ನು ಮತ್ತು ನನ್ನ ತಾಯಿಯನ್ನು ಚಾಕುವಿನಿಂದ ಕೊಲ್ಲಲು ಯತ್ನಿಸಿದ್ದರು. ಇ ಬಗ್ಗೆ ನಮ್ಮ ಗ್ರಾಮಸ್ಥರಿಗೂ ತಿಳಿದಿದೆ. ಆಕೆಗೂ-ನನಗೂ 10 ವರ್ಷ ವಯಸ್ಸಿನ ಅಂತರವಿತ್ತು. ನಮ್ಮಿಬ್ಬರ ನಡುವೆ ಯಾವುದೇ ದೈಹಿಕ ಸಂಬಂಧ ಇರಲಿಲ್ಲ. ಆಕೆ ನನ್ನ ಮೇಲೆ ಮಾಡಿರುವ ಅತ್ಯಾಚಾರ ಆರೋಪಗಳು ಸುಳ್ಳು” ಎಂದು ಪಿಂಟು ಹೇಳಿಕೊಂಡಿದ್ದಾರೆ.
ಮೂರನೇ ಮದುವೆಗೆ ತನ್ನ ತಾಯಿಯ ಅನಾರೋಗ್ಯ ಪ್ರಮುಖ ಕಾರಣವೆಂದು ಆತ ಹೇಳಿಕೊಂಡಿದ್ದಾರೆ. “ವಯಸ್ಸಾದ ತಾಯಿಗೆ ಅಸ್ವಸ್ಥತೆ, ಹೃದಯ ಕಾಯಿಲೆ ಹಾಗೂ ಮಧುಮೇಹ ಬಾಧಿಸುತ್ತಿದ್ದವು. ಅವರನ್ನು ನೋಡಿಕೊಳ್ಳಲು ಮನೆಯಲ್ಲಿ ಯಾರೂ ಇರಲಿಲ್ಲ. ನನಗೆ ಅಡುಗೆ ಮಾಡಲು ಸಹ ಯಾರೂ ನೆರವಾಗಲಿಲ್ಲ. ಹೀಗಾಗಿ, ನಾನು 3ನೇ ಮದುವೆಯಾಗಬೇಕಾಯಿತು” ಎಂದು ಆತ ಹೇಳಿಕೊಂಡಿದ್ದಾರೆ.
ಪಿಂಟು ವಿರುದ್ಧ ದೂರು ದಾಖಲಿಸಿರುವ ಮೊದಲ ಪತ್ನಿ ಖುಷ್ಬೂ, “ನಾವು 2022ರ ಡಿಸೆಂಬರ್ 2ರಂದು ಗೌರಿ ಶಂಕರ್ ಲೌಂಜ್ನಲ್ಲಿ ವಿವಾಹವಾದೆವು. ಡಿಸೆಂಬರ್ 3 ರಂದು ನಾನು ಅವರ ಮನೆಗೆ ಹೋಗಿದ್ದೆ. ಆತ ನನಗೆ ಕಿರುಕುಳ ನೀಡಲು ಆರಂಭಿಸಿದ್ದರಿಂದ, ನನ್ನ ತಂದೆ ಅವರಿಗೆ 3 ಲಕ್ಷ ರೂ.ಗಳನ್ನು ಕೊಟ್ಟರು. ಜೊತೆಗೆ 20 ಗ್ರಾಂ ಚಿನ್ನದ ಸರ, 15 ಗ್ರಾಂ ಉಂಗುರ, ಇತರ ಆಭರಣಗಳು ಮತ್ತು ಗೃಹೋಪಯೋಗಿ ವಸ್ತುಗಳನ್ನು ಕೊಟ್ಟಿದ್ದಾರೆ. ಆದರೂ, ಆತ ನನಗೆ ನಿರಂತರವಾಗಿ ಚಿತ್ರಹಿಂಸೆ ನೀಡುತ್ತಿದ್ದರು. ಕಡೆಗೊಂದು ದಿನ ನನ್ನನ್ನು ಮನೆಯಿಂದ ಹೊರಗೆ ಹಾಕಿದರು” ಎಂದು ಆರೋಪಿಸಿದ್ದಾರೆ. ಅವರು ಹೇಳಿದರು.
“ಆದರೆ, ನನಗೆ ವಿಚ್ಛೇದನ ನೀಡದೆಯೇ, ಪಿಂಟು 2024ರ ಏಪ್ರಿಲ್ 18ರಂದು ಎರಡನೇ ಮದುವೆಯಾದರು. ಎರಡನೇ ಹೆಂಡತಿಗೆ 10 ತಿಂಗಳ ಮಗುವಿದೆ. ಆಕೆ ಗರ್ಭಿಣಿಯಾಗಿದ್ದಾಗಲೇ, ಆತ ಮೂರನೇ ವಿವಾಹವಾಗಿದ್ದಾನೆ. ಮೂರನೇ ಪತ್ನಿಗೆ ಒಂದು ತಿಂಗಳ ಮಗುವಿದೆ” ಎಂದು ಖುಷ್ಬೂ ಹೇಳಿದ್ದಾರೆ.
“ಎರಡನೇ ಪತ್ನಿ ಗುಡಿಯಾ ಕುಮಾರಿ ಅವರ ಬಗ್ಗೆ ವಿಚಾರಿಸಿದಾಗ, ಆಕೆಗೂ ಪಿಂಟು ಮತ್ತು ಆತನ ತಾಯಿ ಚಿಂತ್ರಹಿಂಸೆ ನೀಡಿ, ಹೊರಹಾಕಿದ್ದಾರೆ. ಅವರು ಪದೇ ಪದೇ ಹೆಚ್ಚಿನ ವರದಕ್ಷಿಣೆಗಾಗಿ ಬೇಡಿಕೆ ಇಟ್ಟಿದ್ದಾರೆ” ಎಂದು ಆರೋಪಿಸಿದ್ದಾರೆ.
ಗುಡಿಯಾ ಕುಮಾರಿ ಕೂಡ ದೂರು ದಾಖಲಿಸಿದ್ದು, “ನಾನು ಪಿಂಟು ಅವರ ಎರಡನೇ ಹೆಂಡತಿ. ನನ್ನನ್ನು ಮದುವೆಯಾದ ನಂತರ, ಅವರು ನನಗೆ ಹೇಳದೆಯೇ, ವಿಚ್ಛೇದನವನ್ನೂ ನೀಡದೆ ಇನ್ನೊಬ್ಬ ಮಹಿಳೆಯನ್ನು ಮದುವೆಯಾಗಿದ್ದಾರೆ. ನನಗೂ ಚಿತ್ರಹಿಂಸೆ ನೀಡಿದ್ದಾರೆ. ಹಣದ ಆಸೆಯಿಂದ ಆತ ಪದೇ ಪದೇ ಮದುವೆಯಾಗಿದ್ದಾನೆ. ಅವನು ಅನೇಕ ಹುಡುಗಿಯರ ಜೀವನವನ್ನು ಹಾಳು ಮಾಡಿದ್ದಾನೆ. ಅವನು ಇನ್ನೂ ಎಷ್ಟು ಹುಡುಗಿಯರಿಗೆ ತೊಂದರೆ ಕೊಡುತ್ತಾನೆ?” ಎಂದಿದ್ದಾರೆ.
