10 ಬಾರಿ ಬಿಹಾರದ ಮುಖ್ಯಮಂತ್ರಿಯಾಗಿದ್ದ ನಿತೀಶ್ ಕುಮಾರ್ ಅವರು ಶುಕ್ರವಾರ ರಾಜ್ಯಸಭಾ ಚುನಾವಣೆಗೆ ನಾಮಪತ್ರ ಸಲ್ಲಿಸಿದ್ದಾರೆ. ಬಿಜೆಪಿ ನಿತೀಶ್ ಅವರ ಮೇಲೆ ಒತ್ತಡ ಹಾಕಿ, ಅವರನ್ನು ರಾಜ್ಯಸಭೆಗೆ ಕಳಿಸುತ್ತಿದೆ. ಬಿಹಾರದ ಆಡಳಿತ ಚುಕ್ಕಾಣಿಯನ್ನು ತನ್ನ ವಶಕ್ಕೆ ತೆಗೆದುಕೊಳ್ಳುತ್ತಿದೆ ಎಂಬ ಚರ್ಚೆಗಳು ನಡೆಯುತ್ತಿವೆ. ಇದೇ ಸಮಯದಲ್ಲಿ, ನಿತೀಶ್ ರಾಜೀನಾಮೆಯಿಂದ ತೆರವಾಗುವ ಮುಖ್ಯಮಂತ್ರಿ ಹುದ್ದೆಯನ್ನು ಅಲಂಕರಿಸುವವರು ಯಾರು ಎಂಬ ಪ್ರಶ್ನೆಯೂ ಉದ್ಭವಿಸಿದೆ. ಆದಾಗ್ಯೂ, ಮುಂದಿನ ಮುಖ್ಯಮಂತ್ರಿ ಬಿಜೆಪಿಯವರೇ ಆಗಿರುತ್ತಾರೆ ಎಂಬುದು ಈಗಾಗಲೇ ಸ್ಪಷ್ಟವೂ ಆಗಿದೆ. ಊಹಾಪೋಹಗಳ ನಡುವೆ ಆರು ಹೆಸರುಗಳು ಬಿಜೆಪಿ ಪಾಳಯದಲ್ಲಿ ಚರ್ಚೆಯಾಗುತ್ತಿವೆ.
ಸಾಮ್ರಾಟ್ ಚೌಧರಿ
ಬಿಹಾರ ಮುಖ್ಯಮಂತ್ರಿ ಹುದ್ದೆಯ ರೇಸ್ನಲ್ಲಿ ಮುಂಚೂಣಿಯಲ್ಲಿರುವವರು ಹಾಲಿ ಉಪಮುಖ್ಯಮಂತ್ರಿ ಸಾಮ್ರಾಟ್ ಚೌಧರಿ. ಇವರನ್ನು ನಿತೀಶ್ ಅವರ ನೆರಳು ಎಂದೇ ನೋಡಲಾಗುತ್ತದೆ. ಚೌಧರಿ ಅವರಿಗೆ ಜಾತಿ ಅಂಶವೂ ಪೂರಕವಾಗಿದೆ. ಅವರು ಕೋಯಿರಿ ಜಾತಿಗೆ ಸೇರಿದವರಾಗಿದ್ದು, ಈ ಸಮುದಾಯವು ನಿತೀಶ್ ಅವರ ಕುರ್ಮಿ ಸಮುದಾಯದೊಂದಿಗೆ ನಿಕಟ ಸಂಬಂಧ ಹೊಂದಿದೆ. ಕೋಯಿರಿ ಸಮುದಾಯದವರು ಮುಖ್ಯಮಂತ್ರಿಯಾದರೆ ಅವರು ನಿತೀಶ್ ಕುಮಾರ್ಗೆ ಉತ್ತಮ ಬದಲಿಯಾಗುತ್ತಾರೆ. ಅಧಿಕಾರದ ಸಮತೋಲನವನ್ನು ಕಾಯ್ದುಕೊಳ್ಳುತ್ತಾರೆ ಎಂದು ಅನೇಕರು ಭಾವಿಸುತ್ತಾರೆ.
ನಕಾರಾತ್ಮಕ ಅಂಶವೆಂದರೆ, ಸಾಮ್ರಾಟ್ ಚೌಧರಿ ಅವರು ಮೂಲ ಬಿಜೆಪಿಗರಲ್ಲ. ಅವರು ತಮ್ಮ ರಾಜಕೀಯ ಜೀವನವನ್ನು ಲಾಲು ಪ್ರಸಾದ್ ಯಾದವ್ ಅವರ ರಾಷ್ಟ್ರೀಯ ಜನತಾ ದಳದೊಂದಿಗೆ (RJD) ಪ್ರಾರಂಭಿಸಿದ್ದರು. ಕೆಲ ವರ್ಷಗಳ ಕಾಲ ಅವರು ಆರ್ಜೆಡಿಯ ಶಾಸಕರೂ ಆಗಿದ್ದರು ಎಂಬುದನ್ನು ಅನೇಕರು ಬೆಟ್ಟು ಮಾಡುತ್ತಾರೆ.
ನಿತ್ಯಾನಂದ ರೈ
ಕೇಂದ್ರ ಗೃಹ ಖಾತೆ ರಾಜ್ಯ ಸಚಿವರಾಗಿರುವ ನಿತ್ಯಾನಂದ ರೈ, ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರ ಆಪ್ತರೂ ಆಗಿದ್ದಾರೆ. ರೈ ಅವರು ಯಾದವ ಸಮುದಾಯದವರು. ಅವರಿಗೆ ಪ್ರಮುಖ ಜವಾಬ್ದಾರಿಯನ್ನು ನೀಡಲಾಗುವುದು ಎಂದು ಅಮಿತ್ ಶಾ ಸಾರ್ವಜನಿಕವಾಗಿ ಹಲವು ಬಾರಿ ಹೇಳಿದ್ದಾರೆ. ಒಂದು ವೇಳೆ, ರೈ ಅವರು ನಿತೀಶ್ ಕುಮಾರ್ ಅವರ ಸ್ಥಾನಕ್ಕೆ ಬಂದರೆ, ಅದು ಆರ್ಜೆಡಿಯ ಯಾದವ ಮತಬ್ಯಾಂಕ್ಅನ್ನು ಅಲುಗಾಡಿಸಬಹುದು. ಆದರೆ, ಬಿಜೆಪಿ ಈಗಾಗಲೇ ಮಧ್ಯಪ್ರದೇಶದಲ್ಲಿ ಮೋಹನ್ ಯಾದವ್ ಅವರನ್ನು ಮುಖ್ಯಮಂತ್ರಿಯನ್ನಾಗಿ ಮಾಡಿದೆ. ಹೀಗಾಗಿ, ಬಿಹಾರದಲ್ಲಿಯೂ ಅದೇ ಸಮುದಾಯದವರಿಗೆ ಮಣೆ ಹಾಕುವುದಿಲ್ಲ ಎಂಬ ವಾದವೂ ಕೇಳಿಬರುತ್ತಿದೆ.
ಸಂಜೀವ್ ಚೌರಾಸಿಯಾ
ಪಾಟ್ನಾದ ದಿಘಾ ಕ್ಷೇತ್ರದ ಶಾಸಕರಾದ ಸಂಜೀವ್ ಚೌರಾಸಿಯಾ ರಾಜಕೀಯ ಕುಟುಂಬದ ಹಿನ್ನೆಲೆ ಉಳ್ಳುವರು. ಅವರ ತಂದೆ ಗಂಗಾ ಪಿ. ಚೌರಾಸಿಯಾ ಕೂಡ ಶಾಸಕರಾಗಿದ್ದರು. ಅಲ್ಲದೆ, ಬಿಹಾರದಲ್ಲಿ ಬಿಜೆಪಿಯ ಸಂಸ್ಥಾಪಕರಲ್ಲಿ ಒಬ್ಬರಾಗಿದ್ದರು. ನಂತರ ಅವರನ್ನು ಸಿಕ್ಕಿಂ ರಾಜ್ಯಪಾಲರನ್ನಾಗಿ ನೇಮಿಸಲಾಗಿತ್ತು. ಚೌರಾಸಿಯಾ ಹಿಂದುಳಿದ ವರ್ಗಕ್ಕೆ ಸೇರಿದವರಾಗಿದ್ದು, ಉನ್ನತ ಹುದ್ದೆಗೆ ಪರಿಗಣಿಸಬಹುದಾದ ಬಿಜೆಪಿ ಪಟ್ಟಿಯಲ್ಲಿ ಸಂಜೀವ್ ಕೂಡ ಸ್ಥಾನ ಪಡೆಯುತ್ತಾರೆ. ಆದರೆ, ಇವರನ್ನು ಆರಿಸಿದರೆ ಮುಖ್ಯಮಂತ್ರಿ ಮತ್ತು ಪಕ್ಷದ ರಾಷ್ಟ್ರೀಯ ಅಧ್ಯಕ್ಷರು ಇಬ್ಬರೂ ಒಂದೇ ನಗರದಿಂದ (ಪಾಟ್ನಾ) ಬಂದವರೇ ಆಗುತ್ತಾರೆ. ಇದು ಆ ನಗರಕ್ಕೆ ಅತಿಯಾದ ಪ್ರಾಮುಖ್ಯತೆ ನೀಡಿದಂತಾಗುತ್ತದೆ ಎಂಬ ಅಭಿಪ್ರಾಯವಿದೆ.
ಈ ಲೇಖನ ಓದಿದ್ದೀರಾ?: ಬಂಗಾಳದಲ್ಲಿ ಬದಲಾಯ್ತು SIR ವರಸೆ; ದೇಶದ ಉಳಿದ ರಾಜ್ಯಗಳ ಮೇಲಿನ ಪ್ರಭಾವವೇನು?
ಜನಕ್ ರಾಮ್
ಬಿಹಾರ ರಾಜಕೀಯದಲ್ಲಿ ಭಾರೀ ಚರ್ಚೆಯಾಗುತ್ತಿರುವ ಮತ್ತೊಂದು ಹೆಸರು ರವಿದಾಸ್ ಸಮುದಾಯಕ್ಕೆ ಸೇರಿದ ಜನಕ್ ರಾಮ್. ಬಿಜೆಪಿ ದಲಿತ ಸಮುದಾಯದವರಿಗೆ ಉನ್ನತ ಹುದ್ದೆ ನೀಡುವಷ್ಟು ವೈಶಾಲ್ಯತೆ ಹೊಂದಿದ್ದರೆ, ಜನಕ್ ರಾಮ್ ಅಗ್ರಸ್ಥಾನದಲ್ಲಿರುತ್ತಾರೆ. ಆದಾಗ್ಯೂ, ದಲಿತ ಸಮುದಾಯಕ್ಕೆ ರಾಜ್ಯದ ಮುಖ್ಯ ಹುದ್ದೆಯನ್ನು ಬಿಜೆಪಿ ನೀಡುವುದಿಲ್ಲ ಎಂಬ ವಿಚಾರ ಜಗ್ಗಜ್ಜಾಹೀರಾಗಿದೆ. ಜೊತೆಗೆ, ಜನಕ್ ಅವರ ರವಿದಾಸ್ ಸಮುದಾಯದವರೇ ಆದ ಶಿವೇಶ್ ಕುಮಾರ್ ಅವರನ್ನು ರಾಜ್ಯಸಭೆಗೆ ಬಿಜೆಪಿ ನಾಮನಿರ್ದೇಶನ ಮಾಡಿದೆ. ಇದೇ ಕಾರಣವನ್ನು ಮುಂದಿಟ್ಟು ಜನಕ್ ರಾಮ್ ಅವರನ್ನು ಕಡೆಗಣಿಸಬಹುದು ಎಂದೂ ಹೇಳಲಾಗುತ್ತಿದೆ.
ದಿಲೀಪ್ ಜೈಸ್ವಾಲ್
ರಾಜ್ಯದ ಮಾಜಿ ಸಚಿವರಾದ ದಿಲೀಪ್ ಜೈಸ್ವಾಲ್ ಅವರು ವೈಶ್ಯ ಸಮುದಾಯಕ್ಕೆ ಸೇರಿದವರು. ಒಂದು ವೇಳೆ ಬಿಜೆಪಿ ವೈಶ್ಯ ಸಮುದಾಯದವರನ್ನು ಮುಖ್ಯಮಂತ್ರಿ ಹುದ್ದೆಗೆ ಆಯ್ಕೆ ಮಾಡುವುದಾದರೆ ದಿಲೀಪ್ ಜೈಸ್ವಾಲ್ ಅವರನ್ನು ಪರಿಗಣಿಸುವ ಸಾಧ್ಯತೆ ಹೆಚ್ಚು.
ಗಾಯತ್ರಿ ದೇವಿ
ಬಿಹಾರದ ಸೀತಾಮರ್ಹಿಯ ಪರಿಹಾರ್ ಕ್ಷೇತ್ರದ ಶಾಸಕಿ ಹಾಗೂ ಯಾದವ ಸಮುದಾಯಕ್ಕೆ ಸೇರಿದ ಗಾಯತ್ರಿ ದೇವಿ ಅವರ ಹೆಸರೂ ಚರ್ಚೆಯಲ್ಲಿದೆ. ಇವರು ಆಯ್ಕೆಯಾದರೆ, ರಾಬ್ರಿ ದೇವಿ ನಂತರ ಬಿಹಾರದ ಎರಡನೇ ಮಹಿಳಾ ಮುಖ್ಯಮಂತ್ರಿಯಾಗಲಿದ್ದಾರೆ.
