ಸ್ತನಗಳನ್ನು ಹಿಡಿಯುವುದು, ಪೈಜಾಮಾ ದಾರ ಎಳೆಯುವುದು ‘ಅತ್ಯಾಚಾರಕ್ಕೆ ಯತ್ನ’ವಲ್ಲ. ಅದು ಅತ್ಯಾಚಾರ ಮಾಡಲು ಸಿದ್ದತೆ ಎಂದು ಅಲಹಾಬಾದ್ ಹೈಕೋರ್ಟ್ ನೀಡಿದ್ದ ವಿವಾದಾತ್ಮಕ ತೀರ್ಪನ್ನು ಸುಪ್ರೀಂ ಕೋರ್ಟ್ ರದ್ದುಗೊಳಿಸಿದೆ. ಕೃತ್ಯವು ಅತ್ಯಾಚಾರಕ್ಕೆ ಯತ್ನವೇ ಆಗಿದೆ ಎಂದು ಸುರ್ವೋಚ್ಛ ನ್ಯಾಯಾಲಯ ಹೇಳಿದೆ.
ಮುಖ್ಯ ನ್ಯಾಯಮೂರ್ತಿ ಸೂರ್ಯ ಕಾಂತ್, ನ್ಯಾಯಮೂರ್ತಿಗಳಾದ ಜೋಯ್ಮಲ್ಯ ಬಾಗ್ಚಿ ಮತ್ತು ಎನ್.ವಿ ಅಂಜಾರಿಯಾ ಅವರಿದ್ದ ಪೀಠವು ಅಲಹಾಬಾದ್ ಹೈಕೋರ್ಟ್ ಆಕ್ಷೇಪಾರ್ಹ ಆದೇಶವನ್ನು ರದ್ದುಗೊಳಿಸಿದೆ. “ಲೈಂಗಿಕ ಅಪರಾಧಗಳಿಂದ ಮಕ್ಕಳ ರಕ್ಷಣೆ (POCSO) ಕಾಯ್ದೆಯಡಿ ಇಬ್ಬರು ಆರೋಪಿಗಳ ವಿರುದ್ಧ ಅತ್ಯಾಚಾರ ಯತ್ನಕ್ಕೆ ಸಂಬಂಧಿಸಿದ ಕಾನೂನಿನ ಅಡಿಯಲ್ಲಿ ಪ್ರಕರಣವನ್ನು ಮರುಸ್ಥಾಪಿಸಬೇಕು” ಎಂದು ಆದೇಶಿಸಿದೆ.
2021ರ ನವೆಂಬರ್ನಲ್ಲಿ 14 ವರ್ಷದ ಬಾಲಕಿಯನ್ನು ಆರೋಪಿಗಳಾದ ಪವನ್, ಆಕಾಶ್ ಹಾಗೂ ಅಶೋಕ್ ಎಂಬವರು ಲಿಫ್ಟ್ ನೀಡುವ ನೆಪದಲ್ಲಿ ಮೋಟಾರ್ ಸೈಕಲ್ನಲ್ಲಿ ಕರೆದೊಯ್ದು, ಆಕೆಗೆ ಲೈಂಗಿಕ ಕಿರುಕುಳ ನೀಡಿದ್ದರು. ಆಕಾಶ್ ಎಂಬಾತ ಬಾಲಕಿಯ ಪೈಜಾಮದ ದಾರವನ್ನು ಎಳೆದಿದ್ದನು. ಬಾಲಕಿ ಕೂಗಿಕೊಂಡಿದ್ದರಿಂದ, ಆರೋಪಿಗಳು ಪರಾರಿಯಾಗಿದ್ದರು. ಬಳಿಕ, ಬಾಲಕಿಯ ತಾಯಿ ನೀಡಿದ ದೂರಿನ ಆಧಾರದ ಮೇಲೆ ಆರೋಪಿಗಳ ವಿರುದ್ಧ ಕಾಸ್ಗಂಜ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು. ಪ್ರಕರಣದ ವಿಚಾರಣೆ ನಡೆಸಿದ್ದ ಕಾಸ್ಗಂಜ್ ವಿಶೇಷ ನ್ಯಾಯಾಲಯವು ಐಪಿಸಿ ಸೆಕ್ಷನ್ 376ರ ಅಡಿಯಲ್ಲಿಯೂ ಪ್ರಕರಣ ದಾಖಲಿಸಲು ಆದೇಶಿಸಿತ್ತು. ಇದನ್ನು, ಪ್ರಶ್ನಿಸಿ ಆರೋಪಿಗಳು ಹೈಕೋರ್ಟ್ ಮೆಟ್ಟಿಲೇರಿದ್ದರು.
ಆರೋಪಿಗಳ ಅರ್ಜಿಯನ್ನು ಆಲಿಸಿದ್ದ ಹೈಕೋರ್ಟ್, 2025ರ ಮಾರ್ಚ್ 17ರಂದು ಹೊರಡಿಸಿದ ಆದೇಶದಲ್ಲಿ, “ಎದೆಯನ್ನು ಹಿಡಿಯುವುದು ಮತ್ತು ಪೈಜಾಮಾ ದಾರವನ್ನು ಎಳೆಯುವುದು ಅತ್ಯಾಚಾರದ ಅಪರಾಧವಲ್ಲ. ಆದರೆ, ಅದು ಮಹಿಳೆಯ ಮೇಲೆ ಹಲ್ಲೆ ಅಥವಾ ಕ್ರಿಮಿನಲ್ ಬಲಪ್ರಯೋಗದ ವ್ಯಾಪ್ತಿಗೆ ಬರುತ್ತದೆ” ಎಂದು ಹೇಳಿತ್ತು.
ಅಲಹಾಬಾದ್ ಹೈಕೋರ್ಟ್ನ ಆದೇಶದ ಕುರಿತು ಸ್ವಯಂಪ್ರೇರಿತ ಪ್ರಕರಣ ದಾಖಲಿಸಿಕೊಂಡಿದ್ದ ಸುಪ್ರೀಂ ಕೋರ್ಟ್, ಹೈಕೋರ್ಟ್ನ ಅದೇಶವನ್ನು ರದ್ದುಗೊಳಿಸಿದೆ. “ಆರೋಪಿಸಲಾದ ಸಂಗತಿಗಳಲ್ಲಿ ಆರೋಪಗಳು ಎಸಗಿರುವ ಕೃತ್ಯವು ಕೇವಲ ಸಿದ್ಧತೆಯಾಗಿದೆ. ಅತ್ಯಾಚಾರದ ಅಪರಾಧವನ್ನು ಮಾಡುವ ಪ್ರಯತ್ನವಲ್ಲ ಎಂಬ ಹೈಕೋರ್ಟ್ನ ತೀರ್ಮಾನವನ್ನು ನಾವು ಒಪ್ಪಲು ಸಾಧ್ಯವಿಲ್ಲ” ಎಂದು ಸುಪ್ರೀಂ ಕೋರ್ಟ್ ಹೇಳಿದೆ.
“ಆರೋಪಿಗಳು ಮಾಡಿದ ಪ್ರಯತ್ನವು ಸ್ಪಷ್ಟವಾಗಿ ಾತ್ಯಾಚಾರ ಪ್ರಯತ್ನವೇ ಆಗಿದೆ. ಹೀಗಾಗಿ, ಅತ್ಯಾಚಾರಕ್ಕೆ ಯತ್ನದ ನಿಬಂಧನೆಗಳನ್ನು ಅನ್ವಯಿಸುವ ಪ್ರಕರಣವನ್ನು ಮರುಸ್ಥಾಪಿಸಬೇಕು. ಆದ್ದರಿಂದ, ಹೈಕೋರ್ಟ್ನ ಆಕ್ಷೇಪಾರ್ಹ ತೀರ್ಪನ್ನು ರದ್ದುಗೊಳಿಸಲು ಅರ್ಹವಾಗಿದೆ” ಎಂದು ಪೀಠ ಹೇಳಿದ
