ತಾಯಿ ಮತ್ತು ಶಿಶು ಮರಣ ಪ್ರಮಾಣವನ್ನು ಕಡಿಮೆ ಮಾಡಲು ನಾನಾ ಪ್ರಯತ್ನಗಳು ನಡೆಯುತ್ತಿವೆ. ಸರ್ಕಾರಗಳು ಹಲವು ಕ್ರಮಗಳನ್ನು ಕೈಗೊಳ್ಳುತ್ತಿದೆ. ಉತ್ತಮ ಪೌಷ್ಟಿಕಾಂಶ ಪೂರೈಕೆ, ಯಂತ್ರೋಪಕರಣಗಳನ್ನು ಒದಗಿಸುತ್ತಿವೆ. ಆದರೂ, ತಾಯಿ-ಮಕ್ಕಳ ಮರಣ ಸಂಖ್ಯೆಗೆ ಪೂರ್ಣಪ್ರಮಾಣದಲ್ಲಿ ಕಡಿವಾಣ ಬಿದ್ದಿಲ್ಲ. ಹೀಗಾಗಿಯೇ, ನಾಲ್ಕು ತಿಂಗಳ ಮಗುವೊಂದು ತೀವ್ರ ಅಪೌಷ್ಟಿಕತೆಯಿಂದಾಗಿ ಸಾವನ್ನಪ್ಪಿದೆ. ಘಟನೆ ಮಧ್ಯಪ್ರದೇಶದ ಸತ್ನಾ ಜಿಲ್ಲೆಯಲ್ಲಿ ನಡೆದಿದೆ.
ಸತ್ನಾದ ಮಾರ್ವಾ ಗ್ರಾಮದಲ್ಲಿ ಹುಸೇನ್ ರಜಾ ಎಂಬ ನಾಲ್ಕು ತಿಂಗಳ ಮಗು ಅಪೌಷ್ಟಿಕತೆಗೆ ಬಲಿಯಾಗಿದೆ. ಮಗುವಿನ ಆರೋಗ್ಯದಲ್ಲಿ ತೀವ್ರ ಸಮಸ್ಯೆಗಳು ಕಾಣಿಸಿಕೊಂಡ ಪರಿಣಾಮ, ಮಗುವನ್ನು ಆಸ್ಪತ್ರೆಗೆ ಕರೆದೊಯ್ಯಲಾಗಿತ್ತು. ಪಿಐಸಿಯುನಲ್ಲಿ ದಾಖಲಿಸಿ, ಚಿಕಿತ್ಸೆ ನೀಡಲಾಗುತ್ತಿತ್ತು. ಆದರೂ, ಚಿಕಿತ್ಸೆ ಫಲಿಸದೆ ಮಗು ಮೃತಪಟ್ಟಿದೆ.
ದುರ್ಬಲವಾದ ದೇಹ, ಮೂಳೆಗಳಿಗೆ ಅಂಚಿಕೊಂಡಂತಿದ್ದ ಚರ್ಮ, ಆಳವಾಗಿ ಗುಳಿಬಿದ್ದ ಕಣ್ಣುಗಳು ಹಾಗೂ ಬಣ್ಣ ಕಳೆದುಕೊಂಡಿದ್ದ ತುಟಿಗಳು ಮಗು ತೀವ್ರ ಅಪೌಷ್ಟಿಕತೆಗೆ ತುತ್ತಾಗಿತ್ತು ಎಂಬುದನ್ನು ಸೂಚಿಸುತ್ತವೆ. ಆ ಮಗು ಕೇವಲ 2.5 ಕೆ.ಜಿಯಷ್ಟು ಮಾತ್ರವೇ ತೂಕವಿತ್ತು. ತನ್ನ ವಯಸ್ಸಿಗೆ ಮಗು ಕನಿಷ್ಠ 5 ಕೆ.ಜಿ ತೂಕ ಇರಬೇಕಿತ್ತು ಎಂದು ವೈದ್ಯರು ಹೇಳಿದ್ದಾರೆ.
ಶನಿವಾರ ಮಗುವನ್ನು ಆಸ್ಪತ್ರೆಗೆ ಕರೆದೊಯ್ಯಲಾಗಿತ್ತು. ಮಗುವನ್ನು ಪರಿಕ್ಷಿಸಿದ ಮಕ್ಕಳ ತಜ್ಞ ಸಂದೀಪ್ ದ್ವಿವೇದಿ ಅವರು ಮಗುವಿನ ಸ್ಥಿತಿ ಕಂಡು ಬೆಚ್ಚಿಬಿದ್ದಿದ್ದಾರೆ. ಮಗುವನ್ನು ತಕ್ಷಣವೇ ಪರೀಕ್ಷಿಸಲಾಗಿದ್ದು, ‘ತೀವ್ರ ಅಪೌಷ್ಟಿಕತೆ’ಯಿಂದ ಮಗು ಬಳಲುತ್ತಿದೆ ಎಂದು ಗುರುತಿಸಿದ್ದಾರೆ. PICUಗೆ ದಾಖಲಿಸಿದ್ದಾರೆ. ನಾಲ್ಕು ದಿನಗಳ ಕಾಲ ನಿರಂತರ ಚಿಕಿತ್ಸೆ ನೀಡಿದ ವೈದ್ಯರು ಮಗುವಿನ ಆರೋಗ್ಯವನ್ನು ಸ್ಥಿರಗೊಳಿಸಲು ಯತ್ನಿಸಿದ್ದರು. ಆದರೆ, ಮಗುವಿನ ಪರಿಸ್ಥಿತಿ ಸುಧಾರಿಸಲಿಲ್ಲ ಎಂದು ವರದಿಯಾಗಿದೆ.
ಈ ಲೇಖನ ಓದಿದ್ದೀರಾ?: ಬರ-ನೆರೆ ಪರಿಹಾರ | ಹತ್ತು ವರ್ಷಗಳಲ್ಲಿ ಕರ್ನಾಟಕಕ್ಕೆ ಆದ ನಷ್ಟವೆಷ್ಟು? ಕೇಂದ್ರ ಸರ್ಕಾರ ಕೊಟ್ಟಿದ್ದೆಷ್ಟು?
ಮಗು ಜನಿಸಿದಾಗ 3 ಕೆ.ಜೆ ತೂಕವಿತ್ತು. ಆದರೆ, ನಂತರದ ದಿನಗಳಲ್ಲಿ ಆತನ ತೂಕ ಹೆಚ್ಚಾಗುವ ಬದಲು ಕಡಿಮೆಯಾಯಿತು. ಆಘಾತಕಾರಿ ವಿಷಯವೆಂದರೆ, ಮಗು ಹುಟ್ಟಿದಾಗಿನಿಂದ ಈವರೆಗೆ ಮಗುವಿಗೆ ಒಂದೇ ಒಂದು ಲಸಿಕೆ ಕೊಡಿಸಲಾಗಿಲ್ಲ. ಇದರಿಂದಾಗಿ, ಮಗುವಿನ ದೇಹ ಮತ್ತಷ್ಟು ದುರ್ಬಲಗೊಳಿಸಿದೆ ಎಂದು ಹೇಳಲಾಗಿದೆ.
ಮಗು ಮೃತಪಟ್ಟ ಬಳಿಕ, ವೈದ್ಯಕೀಯ ಅಧಿಕಾರಿ ಎಸ್.ಪಿ ಶ್ರೀವಾಸ್ತವ, ಆರೋಗ್ಯ ಕಾರ್ಯಕರ್ತೆ ಲಕ್ಷ್ಮಿ ರಾವತ್ ಹಾಗೂ ಆಶಾ ಕಾರ್ಯಕರ್ತೆ ಊರ್ಮಿಳಾ ಸತ್ನಾಮಿ ಅವರಿಗೆ ಆರೋಗ್ಯ ಇಲಾಖೆ ನೋಟಿಸ್ ನೀಡಿದೆ. ಈ ಮೂವರೂ ತೀವ್ರ ಅಪೌಷ್ಟಿಕತೆ ಪ್ರಕರಣವನ್ನು ಗುರುತಿಸಲು ಮತ್ತು ಅಗತ್ಯ ಕ್ರಮ ಕೈಗೊಳ್ಳುವಲ್ಲಿ ವಿಫಲರಾಗಿದ್ದಾರೆ ಎಂದು ಆರೋಪಿಸಲಾಗಿದೆ.
2023ರ ಎನ್ಸಿಆರ್ಬಿ ವರದಿಯ ಪ್ರಕಾರ, ಭಾರತದಲ್ಲಿ ಒಟ್ಟು 4 ಲಕ್ಷ ನವಜಾತ ಶಿಶುಗಳು ಸಾವನ್ನಪ್ಪಿವೆ. ಈ ಪೈಕಿ, 83% ಅಂದರೆ, ಸುಮಾರು 3,32,000 ಶಿಶುಗಳು ಅಪೌಷ್ಟಿಕತೆಯಿಂದ ಸಾವನ್ನಪ್ಪಿವೆ. ಅಂತೆಯೇ, ಮಧ್ಯಪ್ರದೇಶದಲ್ಲಿ ಒಟ್ಟು 42,000 ಶಿಶುಗಳು ಮೃಪಟ್ಟಿದ್ದು, ಅಪೌಷ್ಟಿಕತೆಯ ಕಾರಣದಿಂದಾಗಿ 35,000 ಶಿಶುಗಳು ಸಾವನ್ನಪ್ಪಿವೆ.
