ದಕ್ಷಿಣ ಭಾರತ ಚಿತ್ರರಂಗಗಳಲ್ಲಿ ಭಾರೀ ನಿರೀಕ್ಷೆ ಹುಟ್ಟುಹಾಕಿರುವ ಸಿನಿಮಾಗಳಾದ ‘ಕಲ್ಕಿ’ ಮತ್ತು ‘ಸ್ಪಿರಿಟ್’ ಸಿನಿಮಾಗಳಿಂದ ತಮ್ಮನ್ನು ಹೊರಹಾಕಲಾಗಿರುವ ಬಗ್ಗೆ ಬಾಲಿವುಡ್ ನಟಿ ದೀಪಿಕಾ ಪಡುಕೋಣೆ ಮೌನ ಮುರಿದಿದ್ದಾರೆ. ‘ಸೂಪರ್ ಸ್ಟಾರ್ಗಳು 8 ಗಂಟೆ ಮಾತ್ರವೇ ಕೆಲಸ ಮಾಡುತ್ತಾರೆ. ಆದರೆ, ಅದರ ಬಗ್ಗೆ ಯಾವುದೇ ಸುದ್ದಿಯಿಲ್ಲ. ನಾನು ನನ್ನ ಮಗಳಿಗೆ ಹೆಚ್ಚಿನ ಸಮಯ ನೀಡಬೇಕೆಂಬ ಷರತ್ತು ಹಾಕಿದ್ದೇ ತಪ್ಪಾಯಿತು ಎಂಬಂತೆ ಟೀಕೆ ಮಾಡಲಾಗುತ್ತಿದೆ’ ಎಂದಿದ್ದಾರೆ.
ದೀಪಿಕಾ ಪಡುಕೋಣೆ ಅವರು ನಿರ್ದೇಶಕ ಸಂದೀಪ್ ರೆಡ್ಡಿ ವಂಗಾ ನಿರ್ದೇಶನದ ಪ್ರಭಾಸ್ ಅಭಿನಯದ ಸ್ಪಿರಿಟ್ ಚಿತ್ರಕ್ಕೆ ಆಯ್ಕೆಯಾಗಿದ್ದರು. ನಂತರದಲ್ಲಿ ಅವರನ್ನು ಚಿತ್ರದಿಂದ ಕೈಬಿಡಲಾಯಿತು. ಆ ನಂತರ, ನಾಗ್ ಅಶ್ವಿನ್ ನಿರ್ದೇಶನದ ‘ಕಲ್ಕಿ 2898 ಎಡಿ’ ಸಿನಿಮಾದ ಭಾಗ-1ರಲ್ಲಿ ಅವರು ನಟಿಸಿದ್ದರೂ, ಸಿನಿಮಾದ ಮುಂದುವರಿಕೆಯಾದ ಭಾಗ-2ರಿಂದಲೂ ಅವರನ್ನು ಹೊರಗಿಡಲಾಯಿತು. ಎರಡೂ ಸಿನಿಮಾಗಳಿಂದ ಅವರನ್ನು ಕೈಬಿಡಲು ದೀಪಿಕಾ ಅವರು ನಿರ್ದೇಶಕರ ಎದುರು ಇಟ್ಟಿದ್ದ ಕೆಲವು ಷರತ್ತುಗಳು ಮತ್ತು ಆದಾಯದಲ್ಲಿ ತಮಗೂ ಭಾಗ ಕೊಡುವಂತೆ ಕೇಳಿದ್ದದ್ದು ಕಾರಣವೆಂದು ಹೇಳಲಾಗಿತ್ತು. ಅಲ್ಲದೆ, ಸಿನಿಮಾ ಕತೆಯನ್ನು ಸೋರಿಕೆ ಮಾಡಿದ್ದಾರೆ ಎಂದು ಆರೋಪಿಸಲಾಗಿತ್ತು.
ಆದಾಗ್ಯೂ, ಸಿನಿಮಾಗಳಿಂದ ಹೊರ ಉಳಿದಿದ್ದ ದೀಪಿಕಾ, ಸಿನಿಮಾಗಳ ವಿಚಾರವಾಗಿ ಯಾವುದೇ ಪ್ರತಿಕ್ರಿಯೆ ನೀಡಿರಲಿಲ್ಲ. ಮೌನವಾಗಿದ್ದರು. ಇದೀಗ, ಮೌನ ಮುರಿದಿದ್ದು, ಸಿನಿಮಾಗಳಿಂದ ತಮ್ಮನ್ನು ಕೈಬಿಡಲು ಕಾರಣವಾದ ಅಂಶಗಳನ್ನು ಬಹಿರಂಗಪಡಿಸಿದ್ದಾರೆ.
“ನಾನು ಚಿತ್ರೀಕರಣದ ವೇಳೆ 8 ಗಂಟೆ ಕೆಲಸ ಮಾಡುವುದು, ಪ್ರಾಫಿಟ್ ಶೇರ್ ಮಾಡಿಕೊಳ್ಳುವ ಬಗ್ಗೆ ಪ್ರಸ್ತಾಪಿಸಿದ್ದೆ. ನನಗೆ ನನ್ನ ಮಗಳಿಗೆ ಹೆಚ್ಚಿನ ಸಮಯ ಕೊಡುವುದು ಆದ್ಯತೆಯಾಗಿತ್ತು. ಆ ಕಾರಣಕ್ಕಾಗಿ 8 ಗಂಟೆ ಕೆಲಸ ಮಾಡುವ ಷರತ್ತು ಮುಂದಿಟ್ಟಿದ್ದೆ” ಎಂದು ದೀಪಿಕಾ ಹೇಳಿದ್ದಾರೆ.
ಈ ಲೇಖನ ಓದಿದ್ದೀರಾ?: ಎಸ್ಟಿ ಒಳಮೀಸಲಾತಿ ಮುನ್ನಲೆಗೆ; ‘ನಾಯಕ- ಕುರುಬ’ರ ನಡುವೆ ಬಿಕ್ಕಟ್ಟು ಮೂಡುವುದೇ?
“ನಾನು ಈವರೆಗೆ ಮೌನವಾಗಿಯೇ ಹಲವು ಹಂತಗಳಲ್ಲಿ ಹೋರಾಡಿದ್ದೇನೆ. ಹೋರಾಟ ನನಗೆ ಹೊಸದಲ್ಲ. ವೇತನದ ವಿಷಯದ ಜೊತೆಗೆ, ಇನ್ನಿತರ ಎಲ್ಲ ಸಮಸ್ಯೆ ಎದುರಿಸಬೇಕಾಗಿತ್ತು. ಕೆಲವೊಮ್ಮೆ ಕೆಲ ವಿಷಯಗಳು ಸರಿಯಾದ ಅಥವಾ ತಪ್ಪಾದ ರೀತಿಯಲ್ಲಿ ಸಾರ್ವಜನಿಕವಾಗುತ್ತವೆ. ಅದೇನೇ ಆದರೂ, ಗೌರವಯುತ ರೀತಿಯಲ್ಲಿ ಹೋರಾಡುವುದೊಂದೇ ನನಗೆ ತಿಳಿದಿರುವ ದಾರಿ” ಎಂದು ಅವರು ಹೇಳಿಕೊಂಡಿದ್ದಾರೆ.
“ಭಾರತೀಯ ಚಿತ್ರರಂಗದಲ್ಲಿ ಹಲವಾರು ಸೂಪರ್ಸ್ಟಾರ್ಗಳು, ಅದರಲ್ಲೂ ಸ್ಟಾರ್ ನಟರು ಹಲವು ವರ್ಷಗಳಿಂದ 8 ಗಂಟೆಗಳ ಕಾಲ ಮಾತ್ರವೇ ಕೆಲಸ ಮಾಡುತ್ತಿದ್ದಾರೆ. ಅದರಲ್ಲೂ, ಸೋಮವಾರದಿಂದ ಶುಕ್ರವಾರದವರೆಗೆ ಮಾತ್ರವೇ ಕೆಲಸ ಮಾಡುತ್ತಾರೆ. ಆದರೂ, ಆ ವಿಚಾರ ಎಂದಿಗೂ ಸುದ್ದಿಯಾಗಿಲ್ಲ. ಸುದ್ದಿ ಆಗುವುದೂ ಇಲ್ಲ. ಅವರು ಚಿತ್ರರಂಗದಲ್ಲಿ ಬೇರುಬಿಟ್ಟಿರುವ ‘ಚಲ್ತಾ ಹೈ’ (ನಡೀತದೆ ಬಿಡು) ಸಂಸ್ಕೃತಿಯನ್ನು ಮುನ್ನಡೆಸಿಕೊಂಡು ಬರುತ್ತಿದ್ದಾರೆ” ಎಂದು ವಿವರಿಸಿದ್ದಾರೆ.
“ಚಿತ್ರರಂಗವನ್ನು ಒಂದು ಉದ್ಯಮ ಎನ್ನಲಾಗಿದ್ದರೂ, ನಾವು ಎಂದಿಗೂ ಒಂದೇ ರೀತಿಯಲ್ಲಿ ಕೆಲಸ ಮಾಡಲು ಸಾಧ್ಯವಾಗಿಲ್ಲ. ಹಲವು ಸಮಯದಲ್ಲಿ ಹೆಚ್ಚು ಗಂಟೆಗಳ ಕಾಲ, ಕಳಪೆ ಪರಿಸ್ಥಿತಿ ಹಾಗೂ ಆಹಾರ ಕೊರತೆ ಸೇರಿದಂತೆ ಮೂಲಭೂತ ಸಮಸ್ಯೆಗಳನ್ನು ಎದುರಿಸಿ ಕೆಲಸ ಮಾಡಿದ್ದೇವೆ” ಎಂದು ದೀಪಿಕಾ ಹೇಳಿಕೊಂಡಿದ್ದಾರೆ.
