ಕೇಂದ್ರದಲ್ಲಿ ಮೋದಿ ಸರ್ಕಾರ ಅಧಿಕಾರಕ್ಕೆ ಬಂದಮೇಲೆ, ಅದರಲ್ಲೂ ಜಿಎಸ್ಟಿ ವ್ಯವಸ್ಥೆ ಜಾರಿಯಾದ ನಂತರ ತೆರಿಗೆ ಹಂಚಿಕೆ ವಿಚಾರ ಮತ್ತೆ-ಮತ್ತೆ ಚರ್ಚೆಗೆ ಬರುತ್ತಿದೆ. ಕರ್ನಾಟಕಕ್ಕೆ ಮೋದಿ ಸರ್ಕಾರ ನಿರಂತರವಾಗಿ ಅನ್ಯಾಯ ಮಾಡುತ್ತಿದೆ ಎಂಬ ಆರೋಪಗಳು ಬಲಗೊಳ್ಳುತ್ತಲೇ ಇವೆ. ಈ ನಡುವೆ, ಹಣಕಾಸು ತಜ್ಞ ಅಜಯ್ ರೊಟ್ಟಿ ಅವರು ಕರ್ನಾಟಕಕ್ಕೆ ಕೇಂದ್ರದಿಂದ ಭರಪೂರ ತೆರಿಗೆ ಹಂಚಿಕೆಯಾಗುತ್ತಿದೆ ಎಂದು ವಾದಿಸಿದ್ದರು. ಅವರಿಗೆ ಕನ್ನಡ ಹೋರಾಟಗಾರ ಅರುಣ್ ಜಾವಗಲ್ ಅವರು ಆರ್ಥಿಕತೆ ಮತ್ತು ಲೆಕ್ಕಾಚಾರದ ಪಾಠ ಮಾಡಿದ್ದಾರೆ.
ಇತ್ತೀಚೆಗೆ, ಬೆಂಗಳೂರಿನ ರಸ್ತೆಗುಂಡಿಗಳು ಸೇರಿದಂತೆ ಮೂಲಸೌಕರ್ಯಗಳ ಕುರಿತು ‘ಬಯೋಕಾನ್ ಲಿಮಿಟೆಡ್’ನ ಕಾರ್ಯನಿರ್ವಾಹಕ ಅಧ್ಯಕ್ಷೆ ಕಿರುಣ್ ಮಜುಂದಾರ್ ಶಾ ಮತ್ತು ಇನ್ಫೋಸಿಸ್ನ ಮಾಜಿ ಸಿಎಫ್ಒ ಟಿ.ವಿ. ಮೋಹನ್ದಾಸ್ ಪೈ ಟೀಕಿಸಿದ್ದರು. ‘ತಮಗೆ ತೆರಿಗೆ ಅನ್ಯಾಯ ಆಗುತ್ತಿದೆ ಎಂದು ಕರ್ನಾಟಕದವರು ನಿರಂತರವಾಗಿ ಆರೋಪಿಸುತ್ತಾರೆ. ಬೆಂಗಳೂರಿನಲ್ಲಿ ನಾವು ತೆರಿಗೆ ಕಟ್ಟುತ್ತೇವೆ. ಆದರೆ, ಮೂಲಸೌಕರ್ಯಗಳನ್ನು ಪಡೆಯಲಾಗುತ್ತಿಲ್ಲ’ ಎಂದು ಇಬ್ಬರೂ ಟೀಕಿಸಿದ್ದರು.
ಅವರ ಟೀಕೆಗೆ ಪ್ರಕ್ರಿಯಿಸಿದ್ದ ಅರುಣ್ ಜಾವಗಲ್, ”ದೆಹಲಿ ಏಜೆಂಟರಾದ ಗುಜರಾತಿ ಕಿರಣ್ ಶಾ ಮತ್ತು ಕೊಂಕಣಿ ಮೋಹನದಾಸ್ ಪೈ ಅವರು ಕರ್ನಾಟಕದಲ್ಲಿನ ‘ಜವಾಬ್ದಾರಿ’ಯ ಬಗ್ಗೆ ಬೋಧಿಸಲು ಮುಂದಾಗಿದ್ದಾರೆ. ಆದರೆ, ಸತ್ಯಗಳನ್ನು ಪರಿಶೀಲಿಸೋಣ. ಕಾರ್ಪೊರೇಟ್ ಮತ್ತು ಆದಾಯ ತೆರಿಗೆಯಾಗಿ ಸಂಗ್ರಹಿಸಲಾದ ಪ್ರತಿ 100 ರೂ.ಗಳಲ್ಲಿ ಕೇಂದ್ರ ಸರ್ಕಾರಕ್ಕೆ 59 ರೂ. ಹೋಗುತ್ತದೆ. ಉಳಿದ 41 ರೂ.ಗಳನ್ನು ಎಲ್ಲ ರಾಜ್ಯಗಳಿಗೆ ಹಂಚಲಾಗುತ್ತದೆ. ಈ ಪೈಕಿ ಕರ್ನಾಟಕಕ್ಕೆ ದೊರೆಯುವುದು 3.64% ಅಂದರೆ, 1.5 ರೂ. ಮಾತ್ರ. ಅಲ್ಲದೆ, ಕೆಲವು ರಫ್ತು ಮಾರಾಟ ಮತ್ತು ಸೇವೆಗಳು GST ವಿನಾಯಿತಿ ಪಡೆದಿವೆ. ಅಂತಹ ಉದ್ದಿಮೆಗಳಿಂದ ಕರ್ನಾಟಕವು ಪಡೆಯುವುದು 0 ರೂ. ಅಂದರೆ, ಶೂನ್ಯ. ಆದರೂ, ಶಾ ಮತ್ತು ಪೈ ರೀತಿಯ ಜನರು ಕೈಗಾರಿಕೆಗಳನ್ನು ತೆರೆಯಲು ಕರ್ನಾಟಕದಿಂದ ತೆರಿಗೆ ವಿನಾಯಿತಿ ಮತ್ತು ಪ್ರೋತ್ಸಾಹಕಗಳನ್ನು ಕೇಳುತ್ತಾರೆ. ಅವರು ತೆರಿಗೆ ಬಗ್ಗೆ ಮಾತನಾಡುವ ಮೊದಲು, ತಾವು ನಿಜವಾಗಿಯೂ ಯಾರ ಹಿತಾಸಕ್ತಿಗಳನ್ನು ರಕ್ಷಿಸುತ್ತಿದ್ದಾರೆ – ಕರ್ನಾಟಕದ್ದಾ ಅಥವಾ ಅವರ ಸ್ವಂತ ವ್ಯವಹಾರ ಲಾಭದ್ದಾ?” ಎಂದು ಪ್ರಶ್ನಿಸಬೇಕು ತಿರುಗೇಟು ನೀಡಿದ್ದರು.
ಅರುಣ್ ಅವರ ಪೋಸ್ಟ್ ವಿರುದ್ಧ, ಶಾ ಮತ್ತು ಪೈ ಅವರನ್ನು ಸಮರ್ಥಿಸಿಕೊಂಡು ಪೋಸ್ಟ್ ಹಂಚಿಕೊಂಡಿರುವ ಆರ್ಥಿಕ ತಜ್ಞ ಅಜಯ್ ರೊಟ್ಟಿ, ”ಕರ್ನಾಟಕದಲ್ಲಿ ಉತ್ಪಾದನೆಯಾಗುವ ಎಲ್ಲ ರಫ್ತುಗಳು, ಉದ್ಯೋಗಗಳು ಹಾಗೂ ಉದ್ಯೋಗಿಗಳು ಸ್ಥಳೀಯ ತೆರಿಗೆಗಳನ್ನು ಪಾವತಿಸುತ್ತಾರೆ. ಅವರು ಇಲ್ಲಿ ಖರ್ಚು ಮಾಡಿದಾಗ, ಕರ್ನಾಟಕಕ್ಕೆ GST ಪಾವತಿಸುತ್ತಾರೆ. ಇಲ್ಲಿರುವ ಪ್ರತಿಯೊಬ್ಬ ವಲಸಿಗ ಅಥವಾ ಇತರ ವ್ಯಕ್ತಿಗಳು ಬಳಸುವ ಇಂಧನಕ್ಕೆ ವಿಧಿಸುವ ವ್ಯಾಟ್ ನೇರವಾಗಿ ರಾಜ್ಯ ಸರ್ಕಾರಕ್ಕೆ ಹೋಗುತ್ತದೆ. ಆರ್ಥಿಕ ಚಟುವಟಿಕೆ ಇರುವಲ್ಲಿ ತೆರಿಗೆ ಸಂಗ್ರಹವಿದೆ. ಕೇವಲ ಒಂದು ಕೇಂದ್ರ ಲೆವಿಯನ್ನು ತೆಗೆದುಕೊಂಡು ಈ ತೀರ್ಮಾನಗಳನ್ನು ತೆಗೆದುಕೊಳ್ಳುವುದು ತಪ್ಪು” ಎಂದಿದ್ದಾರೆ.
ಅವರ ಪೋಸ್ಟ್ಗೆ ತೀಕ್ಷ್ಣವಾಗಿ ಉತ್ತರಿಸಿರುವ ಅರುಣ್, ”ತೆರಿಗೆ ಗುರು ಅಜಯ್ ರೊಟ್ಟಿ, ‘ಇತರರು ಮೂರ್ಖರು, ನೀವು ಮಾತ್ರ ಬುದ್ಧಿವಂತರು’ ಎಂದು ಭಾವಿಸಬೇಡಿ. ಬೆಂಗಳೂರಿನಲ್ಲಿ ಸಂಗ್ರಹವಾಗುವ ತೆರಿಗೆಗಳಲ್ಲಿ ನಿಜವಾಗಿಯೂ ಸಿಂಹಪಾಲು ಯಾರಿಗೆ ಸಿಗುತ್ತದೆ ಮತ್ತು ನಗರದ ಮೂಲಸೌಕರ್ಯಕ್ಕೆ ಯಾರು ಜವಾಬ್ದಾರರಾಗಿರುತ್ತಾರೆ ಎಂಬುದನ್ನು ಸಂಖ್ಯೆಗಳ ಆಧಾರದಲ್ಲಿ ನೋಡೋಣ. ವಿವಿಧ ತೆರಿಗೆಗಳಲ್ಲಿ ರಾಜ್ಯ ಸರ್ಕಾರದ ಪಾಲು ಹೀಗಿದೆ: ನೇರ ತೆರಿಗೆ – 1.5%, GST – 50%, ಸೆಸ್ – 0%, ಆಸ್ತಿ ತೆರಿಗೆ – 100%, ಪೆಟ್ರೋಲ್ ಮತ್ತು ಅಬಕಾರಿ ಸುಂಕ. ಇದರಲ್ಲಿ, ಕರ್ನಾಟಕದಲ್ಲಿ GST ಎಷ್ಟು ಸಂಗ್ರಹವಾಗುತ್ತದೆ? ಸೆಸ್ ಎಷ್ಟು ಬರುತ್ತದೆ? ಸಿಂಹಪಾಲು ಕೇಂದ್ರ ಸರ್ಕಾರಕ್ಕೆ ಹೋಗುತ್ತದೆ ಎಂಬುದು ವಾಸ್ತವ. ದೆಹಲಿ ಏಜೆಂಟ್ಗಳು (ಕಿರಣ್ ಷಾ, ಮೋಹನ್ದಾಸ್ ಪೈ) ಅನ್ಯಾಯವನ್ನು ಮರೆಮಾಚುತ್ತಿದ್ದಾರೆ. ಕೇಂದ್ರ ಸರ್ಕಾರವು ಸ್ಥಳೀಯ ಸಂಸ್ಥೆಗಳಿಗೆ ನಿಜವಾಗಿಯೂ ಎಷ್ಟು ಹಣವನ್ನು ನೀಡುತ್ತಿದೆ? ನನ್ನ ಎಲ್ಲ ವಾದಗಳು ಹಣಕಾಸಿನ ಒಕ್ಕೂಟದ ತತ್ವಗಳನ್ನು ಆಧರಿಸಿವೆ. ಕರ್ನಾಟಕಕ್ಕೆ ಕೇಂದ್ರ ಕೊಡುವ ಹಣ ತೀರಾ ಅನ್ಯಾಯ” ಎಂದಿದ್ದಾರೆ.
Tax guru Ajay Rotti, don’t think you are the only intelligent one while others are dumb. Let’s go by the numbers to see who actually gets the lion’s share of taxes collected in Bengaluru and who is being held accountable for the city’s infrastructure.
— ಅರುಣ್ ಜಾವಗಲ್ | Arun Javgal (@ajavgal) October 20, 2025
Here is the share of the… https://t.co/W46QgNSxl9
ಈ ಚರ್ಚೆಗಳ ನಡುವೆ, ಅರುಣ್ ಅವರಿಗೆ ಕೆಲವರು ಬೆದರಿಕೆಯ ಕರೆ ಮಾಡಿದ್ದಾರೆ ಎಂದು ಕೇಳಿಬಂದಿದೆ. ಈ ಬಗ್ಗೆ ‘ಎಕ್ಸ್’ನಲ್ಲಿ ಬರೆದಿಕೊಂಡಿರುವ ಅರುಣ್ ಜಾವಗಲ್, ”ತೆರಿಗೆ ಹಂಚಿಕೆ ಅನ್ಯಾಯದ ಬಗ್ಗೆ ಮಾತನಾಡಿದ್ದಕ್ಕೆ ನನಗೆ ಬೆದರಿಕೆ ಕರೆಗಳು ಬರುತ್ತಿವೆ” ಎಂದು ತಿಳಿಸಿದ್ದಾರೆ.
ಅರುಣ್ ಅವರ ದಾಖಲೆ, ದತ್ತಾಂಶಸಹಿತ ವಿಷಯ ಮಂಡನೆ ಮತ್ತು ವಾದವನ್ನು ಅಂಕಿಸಂಖ್ಯೆಗಳೊಂದಿಗೆ ಎದುರಿಸಲಾಗದ ಮೂರ್ಖರು ಅವರಿಗೆ ಬೆದರಿಕೆ ಹಾಕುತ್ತಿದ್ದಾರೆ. ನಿಂದನೆಗೆ ಇಳಿದಿದ್ದಾರೆ ಎಂದು ಹಲವಾರು ನೆಟ್ಟಿಗರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಅರುಣ್ ಅವರ ಪರವಾಗಿ ನಿಂತಿದ್ದಾರೆ.
