ಬುರ್ಖಾ ಧರಿಸದ ಕಾರಣಕ್ಕೆ ವ್ಯಕ್ತಿಯೋರ್ವ ತನ್ನ ಪತ್ನಿ ಮತ್ತು ಇಬ್ಬರು ಹೆಣ್ಣುಮಕ್ಕಳನ್ನು ಕೊಂದು ಅವರ ಮೃತದೇಹವನ್ನು ಮನೆಯೊಳಗೆ ಗುಂಡಿ ಅಗೆದು ಹೂತುಹಾಕಿದ ಘಟನೆ ಉತ್ತರ ಪ್ರದೇಶದ ಶಾಮ್ಲಿಯಲ್ಲಿ ನಡೆದಿದೆ.
ಫಾರೂಕ್ ಎಂಬಾತ ಆರೋಪಿ. ಆತನ ಪತ್ನಿ ತಾಹಿರಾ (35) ಮತ್ತು ಅವರ ಇಬ್ಬರು ಹೆಣ್ಣುಮಕ್ಕಳಾದ ಶರೀನ್ (14) ಮತ್ತು ಅಫ್ರೀನ್ (6) ಒಂದು ವಾರದಿಂದ ನಾಪತ್ತೆಯಾಗಿದ್ದರು. ಮಂಗಳವಾರ ಗ್ರಾಮದ ಮುಖ್ಯಸ್ಥರು ಪೊಲೀಸರಿಗೆ ದೂರು ನೀಡಿದ್ದು, ಪೊಲೀಸರು ತನಿಖೆ ನಡೆಸಿದಾಗ ಈ ಕೃತ್ಯ ಬೆಳಕಿಗೆ ಬಂದಿದೆ.
ಇದನ್ನು ಓದಿದ್ದೀರಾ? ತಮಿಳುನಾಡು | ಬುರ್ಖಾ ಧರಿಸಿದ್ದ ಮಹಿಳೆಗೆ ಬಸ್ ಪ್ರವೇಶ ನಿರಾಕರಣೆ; ನಿರ್ವಾಹಕರ ಪರವಾನಗಿ ರದ್ದು
ಗ್ರಾಮದ ಮುಖ್ಯಸ್ಥರ ದೂರಿನಂತೆ ತನಿಖೆ ಆರಂಭಿಸಿದ ಪೊಲೀಸರಿಗೆ ಫಾರೂಕ್ ಮೇಲೆ ಅನುಮಾನ ಬಂದು ವಶಕ್ಕೆ ಪಡೆದಿದ್ದರು. ವಿಚಾರಣೆಯ ಸಮಯದಲ್ಲಿ ಫಾರೂಕ್ ಅಪರಾಧವನ್ನು ಒಪ್ಪಿಕೊಂಡು, ಶವಗಳನ್ನು ಮನೆಯಲ್ಲಿಯೇ ಹೂತಿರುವುದಾಗಿ ಹೇಳಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಪೊಲೀಸ್ ವರಿಷ್ಠಾಧಿಕಾರಿ ಎನ್.ಪಿ. ಸಿಂಗ್ ಸೇರಿದಂತೆ ಪೊಲೀಸರ ತಂಡ ಫಾರೂಕ್ ಮನೆಗೆ ತೆರಳಿ ಮೂವರ ಮೃತದೇಹಗಳನ್ನು ಗುಂಡಿಯಿಂದ ಹೊರತೆಗೆದಿದೆ. ತಾಹಿರಾ ತನ್ನ ಗಂಡ ಫಾರೂಕ್ ಬಳಿ ಹಣ ಕೇಳಿದ್ದು, ಈ ವಿಚಾರದಲ್ಲಿ ಜಗಳವಾಗಿತ್ತು. ಕೋಪಗೊಂಡ ತಾಹಿರಾ ಬುರ್ಖಾ ಹಾಕದೆ ತನ್ನ ಹೆತ್ತವರ ಮನೆಗೆ ತೆರಳಿದ್ದರು. ಇದರಿಂದಾಗಿ ತನ್ನ ಗೌರವಕ್ಕೆ ಧಕ್ಕೆಯಾಗಿದೆ ಎಂದುಕೊಂಡ ಫಾರೂಕ್, ಒಂದು ತಿಂಗಳ ನಂತರ ಪತ್ನಿಯನ್ನು ವಾಪಸ್ ಮನೆ ಕರೆತಂದು ಆಕೆ ಮತ್ತು ಇಬ್ಬರು ಮಕ್ಕಳನ್ನೂ ಕೊಂದಿದ್ದಾನೆ. ನಂತರ ಮನೆಯಲ್ಲಿ ಗುಂಡು ತೋಡಿ ಶವಗಳನ್ನು ಹೂತುಹಾಕಿದ್ದಾನೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.
ಫಾರೂಕ್ನನ್ನು ವಶಕ್ಕೆ ಪಡೆಯಲಾಗಿದ್ದು, ಮೃತದೇಹಗಳನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಲಾಗಿದೆ. ಪೊಲೀಸರು ಆರೋಪಿಯಿಂದ ಕೊಲೆಗೆ ಬಳಸಲಾದ ಪಿಸ್ತೂಲ್ ಅನ್ನು ವಶಪಡಿಸಿಕೊಂಡಿದ್ದಾರೆ. ಪ್ರಾಥಮಿಕ ತನಿಖೆಯಲ್ಲಿ ಪ್ರಕರಣವು ಕೌಟುಂಬಿಕ ಕಲಹಕ್ಕೆ ಸಂಬಂಧಿಸಿದ್ದು ಎಂದು ತಿಳಿದುಬಂದಿದ್ದು ತನಿಖೆ ಮುಂದುವರಿದಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಫಾರೂಕ್ ಮಾನಸಿಕವಾಗಿ ಸ್ಥಿರವಾಗಿಲ್ಲ ಎಂಬ ಆರೋಪವನ್ನು ಸ್ಥಳೀಯರು ಮಾಡಿದ್ದಾರೆ. ಹಾಗೆಯೇ ಫಾರೂಕ್ ಅತ್ಯಂತ ಕಠೋರವಾಗಿ ನಡೆದುಕೊಳ್ಳುತ್ತಿದ್ದ ಎಂದು ತಾಹಿರಾ ಕುಟುಂಬಸ್ಥರು ಆರೋಪಿಸಿದ್ದಾರೆ. ಪೊಲೀಸರು ಇದು ಮರ್ಯಾದಾ ಹತ್ಯೆ ಎಂದು ಹೇಳಿದ್ದಾರೆ. ಈ ನಡುವೆ ಈ ಘಟನೆಯು ಮಹಿಳೆಯರ ಆಯ್ಕೆಗಳ ಮೇಲಿನ ತೀವ್ರ ನಿಯಂತ್ರಣ ಮತ್ತು ಸ್ವಂತ ಮನೆಗಳಲ್ಲಿ ಮಕ್ಕಳಿಗೆ ಸುರಕ್ಷತೆಯ ಕೊರತೆಯ ಬಗ್ಗೆ ವ್ಯಾಪಕ ಚರ್ಚೆಗಳನ್ನು ಹುಟ್ಟುಹಾಕಿದೆ. ಬುರ್ಖಾ ಧರಿಸುವುದು ಅಥವಾ ಧರಿಸದೆ ಇರುವುದು ಮಹಿಳೆಯ ಆಯ್ಕೆಯಾಗಬೇಕೇ ಹೊರತು ಅದು ಹೇರಿಕೆಯಾಗಬಾರದು ಎಂಬ ಚರ್ಚೆಗಳು ಸಾಮಾಜಿಕ ಜಾಲತಾಣದಲ್ಲಿ ನಡೆಯುತ್ತಿದೆ.
