2026ರ ದ್ವಿತೀಯಾರ್ಧದಲ್ಲಿ ‘ಎಲ್ ನಿನೋ’ ಪರಿಚಲನೆ ಉಂಟಾಗುವ ಸಾಧ್ಯತೆಗಳು ಹೆಚ್ಚುತ್ತಿವೆ ಎಂದು ಜಾಗತಿಕ ಹವಾಮಾನ ಮಾದರಿಗಳು ತಿಳಿಸಿವೆ. ಅಮೆರಿಕ ಮೂಲದ ‘ನ್ಯಾಷನಲ್ ಓಷಿಯಾನಿಕ್ ಅಂಡ್ ಅಟ್ಮಾಸ್ಫಿಯರಿಕ್ ಅಡ್ಮಿನಿಸ್ಟ್ರೇಷನ್’ (NOAA) ಸಂಸ್ಥೆಯು ತನ್ನ ಇತ್ತೀಚಿನ ‘ಎಲ್ ನಿನೋ ಸದರ್ನ್ ಆಸಿಲೇಷನ್’ (ENSO) ಬುಲೆಟಿನ್ನಲ್ಲಿ ಇದನ್ನು ದೃಢಪಡಿಸಿದೆ.
“2026ರ ಜೂನ್ನಿಂದ ಆಗಸ್ಟ್ ಅವಧಿಯಲ್ಲಿ ಎಲ್ ನಿನೋ ಉದ್ಭವಿಸುವ ಸಾಧ್ಯತೆ ಇದೆ. ಇದು ಕನಿಷ್ಠ 2026ರ ಅಂತ್ಯದವರೆಗೆ ಮುಂದುವರಿಯಲಿದೆ” ಎಂದು NOAA ತಿಳಿಸಿದೆ.
ಈ ಹಿಂದೆ, ಎಲ್ ನಿನೋ ಸಂಭವಿಸಿದ್ದ ವರ್ಷಗಳಲ್ಲಿ ಭಾರತವೂ ಸೇರಿದಂತೆ ಪ್ರಪಂಚದ ಹಲವು ಭಾಗಗಳಲ್ಲಿ ಅಸಹಜವಾಗಿ ಹೆಚ್ಚಿನ ತಾಪಮಾನ, ಸುದೀರ್ಘ ಶಾಖದ ಅಲೆಗಳು ಹಾಗೂ ಸರಾಸರಿಗಿಂತ ಕಡಿಮೆ ಮಳೆಯಾಗಿರುವುದು ದಾಖಲಾಗಿತ್ತು. ಈ ವರ್ಷವೂ ಅಂತಹದ್ದೇ ಪರಿಸ್ಥಿತಿ ನಿರ್ಮಾಣವಾಗುವ ಸಾಧ್ಯತೆ ಇದೆ ಎಂದು ಅಂದಾಜಿಸಲಾಗಿದೆ.
ಎಲ್ ನಿನೋ ಮತ್ತು ಲಾ ನಿನಾ ಈ ಎರಡೂ ಸಮುದ್ರದಲ್ಲಿ ಉದ್ಭವಿಸುವ ಎರಡು ಪರಿಚಲನೆಗಳಾಗಿವೆ. ಇವು ಜಾಗತಿಕ ಹವಾಮಾನದ ಮೇಲೆ ಗಂಭೀರ ಪ್ರಭಾವ ಬೀರುವ ವಿದ್ಯಮಾನವಾಗಿವೆ.
ENSO ಪ್ರಕಾರ, ಎಲ್ ನಿನೋ ತಾಪಮಾನವನ್ನು ಹೆಚ್ಚಿಸಿದರೆ, ಲಾ ನಿನಾ ವಾತಾವರಣದಲ್ಲಿ ತಂಪಿನ ಪ್ರಮಾಣವನ್ನು ಹೆಚ್ಚಿಸುತ್ತದೆ. ಜುಲೈ ನಂತರ ಎಲ್ ನಿನೋ ಪರಿಚಲನೆ ಆರಂಭವಾದರೆ, ಅದು ಭಾರತದ ನೈಋತ್ಯ ಮಾನ್ಸೂನ್ ಮಳೆಯ ಮೇಲೆ ಭಾರೀ ಪರಿಣಾಮ ಬೀರಲಿದೆ.
