ದೆಹಲಿ ಎಂಸಿಡಿ ಉಪಚುನಾವಣೆ: ಬಿಜೆಪಿ 7, ಎಎಪಿ 3ರಲ್ಲಿ ಗೆಲುವು; ಖಾತೆ ತೆರೆದ ಕಾಂಗ್ರೆಸ್‌

ದೆಹಲಿ ಮಹಾನಗರ ಪಾಲಿಕೆಯ (ಎಂಸಿಡಿ) 12 ಸ್ಥಾನಗಳಿಗೆ ನಡೆದ ಉಪಚುನಾವಣೆಯ ಫಲಿತಾಂಶ ಪ್ರಕಟವಾಗಿದೆ. 12 ಸ್ಥಾನಗಳ ಪೈಕಿ ಬಿಜೆಪಿ 7 ಮತ್ತು ಎಎಪಿ 3 ಸ್ಥಾನಗಳನ್ನು ಗೆದ್ದುಕೊಂಡಿವೆ. ಈ ಬಾರಿಯ ಪಾಲಿಕೆಯಲ್ಲಿ ಸದಸ್ಯರನ್ನೇ ಹೊಂದಿರದಿದ್ದ ಕಾಂಗ್ರೆಸ್‌ ಕಡೆಗೂ 1 ಸ್ಥಾನವನ್ನು ಗೆದ್ದುಕೊಂಡಿದೆ. ಉಳಿದ ಒಂದು ಸ್ಥಾನವನ್ನು ಎಐಎಫ್‌ಬಿ ಗೆದ್ದಿದೆ.

ಎಂಸಿಡಿಯ 12 ಸ್ಥಾನಗಳಿಗೆ ನವೆಂಬರ್ 30ರಂದು ಮತದಾನ ನಡೆದಿತ್ತು. ಮತದಾನ ನಡೆದ ಸ್ಥಾನಗಳ ಪೈಕಿ ಈ ಹಿಂದೆ ಬಿಜೆಪಿ 9 ಸ್ಥಾನಗಳನ್ನು ತನ್ನ ತೆಕ್ಕೆಯಲ್ಲಿ ಇರಿಸಿಕೊಂಡಿತ್ತು. ಇದೀಗ, 2 ಸ್ಥಾನಗಳನ್ನು ಕಳೆದುಕೊಂಡಿದೆ. ಈ ಹಿಂದೆಯೂ ಮೂರು ಸ್ಥಾನಗಳನ್ನು ಎಎಪಿ ಹೊಂದಿತ್ತು. ಈಗಲೂ ಮೂರರಲ್ಲಿ ಮಾತ್ರವೇ ಗೆದ್ದಿದೆ. ಕಾಂಗ್ರೆಸ್‌ ಮತ್ತು ಎಐಎಫ್‌ಬಿ ತಲಾ ಒಂದು ಸ್ಥಾನವನ್ನು ತಮ್ಮ ತೆಕ್ಕೆಗೆ ತೆಗೆದುಕೊಂಡಿವೆ.