ಮತದಾರರ ಪಟ್ಟಿಯ ವಿಶೇಷ ತೀವ್ರ ಪರಿಷ್ಕರಣೆ(SIR) ವಿರುದ್ಧ ಕೇರಳ ವಿಧಾನಸಭೆಯಲ್ಲಿ ನಿರ್ಣಯವು ಸರ್ವಾನುಮತದಿಂದ ಅಂಗೀಕಾರಗೊಂಡಿದೆ. ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ನಿರ್ಣಯವನ್ನು ಮಂಡಿಸಿದ್ದು, ವಿರೋಧ ಪಕ್ಷದ ಸದಸ್ಯರು ಕೆಲವು ತಿದ್ದುಪಡಿಗಳನ್ನು ಸೂಚಿಸಿದರು. ಈ ತಿದ್ದುಪಡಿಗಳಲ್ಲಿ ಕೆಲವನ್ನು ನಿರ್ಣಯ ಅಂಗೀಕರಿಸುವ ಮುನ್ನ ಸೇರಿಸಲಾಗಿದೆ.
ಇನ್ನು ಧರ್ಮದ ಆಧಾರದ ಮೇಲೆ ಪೌರತ್ವವನ್ನು ನೀಡುವ, ಪ್ರಜಾಪ್ರಭುತ್ವಕ್ಕೆ ಸವಾಲೊಡ್ಡುವ ಪೌರತ್ವ ತಿದ್ದುಪಡಿ ಕಾಯ್ದೆಯನ್ನು ಜಾರಿಗೊಳಿಸಲು ಯತ್ನಿಸುವವರು ಮಾತ್ರ SIR ಪ್ರಕ್ರಿಯೆಯನ್ನು ಬಳಸಿಕೊಳ್ಳುವುದು ಎಂಬ ಕಳವಳವನ್ನು ನಿರ್ಣಯದಲ್ಲಿ ವ್ಯಕ್ತಪಡಿಸಲಾಗಿದೆ.
ಇದನ್ನು ಓದಿದ್ದೀರಾ? ‘ಕೇರಳ’ವನ್ನು ‘ಕೇರಳಂ’ ಎಂದು ಹೆಸರು ಬದಲಾಯಿಸಲು ಕೇಂದ್ರಕ್ಕೆ ಒತ್ತಾಯಿಸುವ ನಿರ್ಣಯ ಅಂಗೀಕಾರ
ಹಾಗೆಯೇ, “ಮೂಲಭೂತ ಹಕ್ಕುಗಳನ್ನು ಉಲ್ಲಂಘಿಸುವ ಇಂತಹ ಕ್ರಮಗಳನ್ನು ಧಿಕ್ಕರಿಸಿ, ಮತದಾರರ ಪಟ್ಟಿಯನ್ನು ಪಾರದರ್ಶಕವಾಗಿ ನವೀಕರಿಸುವ ಪ್ರಕ್ರಿಯೆಯನ್ನು ಚುನಾವಣಾ ಆಯೋಗವು ನಡೆಸಬೇಕು ಎಂದು ಸಭೆಯು ಸರ್ವಾನುಮತದಿಂದ ಒತ್ತಾಯಿಸುತ್ತದೆ” ಎಂದು ನಿರ್ಣಯದಲ್ಲಿ ಉಲ್ಲೇಖಿಸಲಾಗಿದೆ.
ಹಾಗೆಯೇ SIRನ ಆತುರದ ಅನುಷ್ಠಾನವನ್ನು ವಿಧಾನಸಭೆಯು ಟೀಕಿಸಿದೆ. ಈ ಪ್ರಕ್ರಿಯೆ ನಡೆಸಬೇಕಾದರೆ ದೀರ್ಘಾವಧಿಯ ಸಿದ್ಧತೆ ಮತ್ತು ಸಮಾಲೋಚನೆಯ ಅಗತ್ಯವಿದೆ. ಕೇರಳದಲ್ಲಿ ಶೀಘ್ರದಲ್ಲೇ ಸ್ಥಳೀಯ ಸಂಸ್ಥೆಗಳಿಗೆ ಚುನಾವಣೆಗಳು ನಡೆಯಲಿರುವ ಹಿನ್ನೆಲೆಯಲ್ಲಿ, SIR ಅನ್ನು ಆತುರದಿಂದ ನಡೆಸುವುದು ದುರುದ್ದೇಶಪೂರಿತವೆಂದು ತೋರುತ್ತದೆ. ಜನರ ಇಚ್ಛೆಯನ್ನು ಬುಡಮೇಲು ಮಾಡಬಹುದು ಎಂದು ನಿರ್ಣಯವು ಎಚ್ಚರಿಸಿದೆ.
ಇನ್ನು ಬಿಹಾರದ ಬಗ್ಗೆಯೂ ಈ ನಿರ್ಣಯದಲ್ಲಿ ಉಲ್ಲೇಖಿಸಲಾಗಿದೆ. SIR ಪ್ರಕ್ರಿಯೆಯನ್ನು ಪಟ್ಟಿಯಿಂದ ಮತದಾರರನ್ನು ಹೊರಗಿಡುವ ರಾಜಕೀಯವೆಂದು ದೂರಲಾಗಿದೆ. “ಬಿಹಾರ SIR ಪ್ರಕ್ರಿಯೆಯ ಸಾಂವಿಧಾನಿಕ ಸಿಂಧುತ್ವವು ಸುಪ್ರೀಂ ಕೋರ್ಟ್ನ ಪರಿಗಣನೆಯಲ್ಲಿದೆ. ಆದರೆ ಚುನಾವಣೆಯ ಅಂಚಿನಲ್ಲಿರುವ ಕೇರಳ, ತಮಿಳುನಾಡು ಮತ್ತು ಪಶ್ಚಿಮ ಬಂಗಾಳ ರಾಜ್ಯಗಳಲ್ಲಿ ಅದೇ ಪ್ರಕ್ರಿಯೆಯನ್ನು ತರಾತುರಿಯಲ್ಲಿ ಪರಿಚಯಿಸಲಾಗುತ್ತಿದೆ ಎಂದು ನಿಷ್ಕಪಟವಾಗಿ ನೋಡಲಾಗುವುದಿಲ್ಲ” ಎಂದು ನಿರ್ಣಯ ಹೇಳುತ್ತದೆ.
ಪರಿಷ್ಕರಣೆಗಾಗಿ 2002ರ ಮತದಾರರ ಪಟ್ಟಿಯನ್ನು ಅವಲಂಬಿಸಿರುವುದನ್ನೂ ನಿರ್ಣಯ ಟೀಕಿಸಿದೆ. “ಅವೈಜ್ಞಾನಿಕ” ಎಂದು ಕರೆದಿದೆ. SIR ಅಡಿಯಲ್ಲಿ, 1987ರ ನಂತರ ಜನಿಸಿದ ಮತದಾರರು ಇಬ್ಬರೂ ಪೋಷಕರ ಪೌರತ್ವ ದಾಖಲೆಗಳನ್ನು ಸಲ್ಲಿಸಿದರೆ ಮಾತ್ರ ಮತದಾರರ ಪಟ್ಟಿಯಲ್ಲಿ ಸೇರ್ಪಡೆಗೊಳ್ಳಬಹುದು. 2003ರ ನಂತರ ಜನಿಸಿದವರು ಇದೇ ರೀತಿಯ ನಿರ್ಬಂಧಗಳನ್ನು ಎದುರಿಸುತ್ತಾರೆ ಎಂದು ನಿರ್ಣಯವು ಎತ್ತಿ ತೋರಿಸಿದೆ.
ಇಂತಹ ನಿಯಮಗಳು ಅಲ್ಪಸಂಖ್ಯಾತ ಗುಂಪುಗಳು, ಪರಿಶಿಷ್ಟ ಜಾತಿಗಳು ಮತ್ತು ಪರಿಶಿಷ್ಟ ಪಂಗಡಗಳು, ಮಹಿಳೆಯರು ಮತ್ತು ಬಡ ಕುಟುಂಬಗಳು ಸೇರಿದವರಿಗೆ ಹೆಚ್ಚಿನ ಪ್ರಭಾವ ಬೀರುತ್ತದೆ. ಎಲ್ಲರ ಬಳಿ ಈ ದಾಖಲೆಗಳು ಇರುವುದಿಲ್ಲ. ಅನಿವಾಸಿ ಭಾರತೀಯರ ಮತದಾನದ ಹಕ್ಕನ್ನು ಕಸಿದುಕೊಳ್ಳುತ್ತದೆ ಎಂದೂ ನಿರ್ಣಯ ಒತ್ತಿ ಹೇಳಿದೆ.
