‘ಜನ್-ಝೀ’ ಪ್ರತಿಭಟನೆಗೆ ಗುರಿಯಾಗಿ, ಸರ್ಕಾರ ಉರುಳಿಬಿದ್ದಿದ್ದ ನೇಪಾಳದಲ್ಲಿ ಚುನಾವಣೆ ನಡೆಯುತ್ತಿದೆ. ಗುರುವಾರ ಮತದಾನ ಆರಂಭವಾಗಿದೆ. ಯುವಜನರ ಪ್ರತಿಭಟನೆಯಿಂದ ಅಧಿಕಾರ ಕಳೆದುಕೊಂಡಿದ್ದ ಮಾಜಿ ಪ್ರಧಾನಿ ಕೆ.ಪಿ ಶರ್ಮಾ ಓಲಿ ಕೂಡ ಚುನಾವಣೆಯಲ್ಲಿ ಸ್ಪರ್ಧಿಸಿದ್ದಾರೆ. ನೇಪಾಳ ಜನರು ಓಲಿ ಅವರಿಗೆ ಮತ್ತೆ ಅಧಿಕಾರ ನೀಡುವರೇ ಎಂಬ ಕುತೂಹಲ ಹೆಚ್ಚಿದೆ.
ಕೆ.ಪಿ ಶರ್ಮಾ ಓಲಿ ಅವರು ನೇಪಾಳ ರಾಜಕೀಯದಲ್ಲಿ ಪಳಗಿರುವ ಹಿರಿಯ ನಾಯಕ. ಸುಮಾರು 50 ವರ್ಷಗಳ ರಾಜಕೀಯ ಅನುಭವ ಹೊಂದಿರುವ ಓಲಿ ಅವರು ‘ಜನ್-ಝೀ’ ಪ್ರತಿಭಟನೆಯನ್ನು ಮುನ್ನಡೆಸಿದ್ದ ಯುವ ನಾಯಕ ಬಾಲೆನ್ ವಿರುದ್ಧ ಕಣಕ್ಕಳಿದಿದ್ದಾರೆ. ಈ ಇಬ್ಬರೂ ಝಾಪಾ-5 ಕ್ಷೇತ್ರದಲ್ಲಿ ಸ್ಪರ್ಧಿಸಿದ್ದಾರೆ. ಈ ಕ್ಷೇತ್ರವು ಓಲಿ ಅವರ ಭದ್ರಕೋಟೆಯೂ ಆಗಿದೆ ಎನ್ನಲಾಗಿದೆ.
1952ರಲ್ಲಿ ಜನಿಸಿದ ಓಲಿ 1970ರಲ್ಲಿ ಹದಿಹರೆಯದ ಕಮ್ಯುನಿಸ್ಟ್ ಹೋರಾಟದ ಮೂಲಕ ಮುಂಚೂಣಿಗೆ ಬಂದವರು. ಪಕ್ಷರಹಿತ ವ್ಯವಸ್ಥೆಯನ್ನು ಮತ್ತು ರಾಜಪ್ರಭುತ್ವವನ್ನು ವಿರೋಧಿಸಿದ್ದವು. ಅವರು 1973ರ ಅಕ್ಟೋಬರ್ನಲ್ಲಿ ಝಾಪಾ ದಂಗೆ ಮತ್ತು ರಾಜಪ್ರಭುತ್ವ ವಿರೋಧಿ ಹೋರಾಟದಲ್ಲಿ ಬಂಧನಕ್ಕೊಳಗಾಗಿ, 14 ವರ್ಷ ಜೈಲಿನಲ್ಲಿದ್ದರು. ಆದರೆ, ಜೈಲಿನಿಂದ ಮರಳಿದ ಬಳಿಕ, ತಾವು ವಿರೋಧಿಸಿದ್ದ ಪಕ್ಷರಹಿತ ವ್ಯವಸ್ಥೆಯಲ್ಲಿಯೇ ಓಲಿ ಕೂಡ ಪ್ರಬಲ ನಾಯಕನಾಗಿ ಬೆಳೆದರು.
2024ರಲ್ಲಿ ಮತ್ತೆ ದೇಶದ ಚುಕ್ಕಾಣಿ ಹಿಡಿದ ಓಲಿ ನೇತೃತ್ವದ ಸಮ್ಮಿಶ್ರ ಸರ್ಕಾರದ ವಿರುದ್ಧ ಭ್ರಷ್ಟಾಚಾರ, ವಂಶಾಡಳಿತ, ಸ್ವಜನ ಪಕ್ಷಪಾತದ ಆರೋಪಗಳು ಗಾಢವಾಗಿದ್ದವು. ಜೊತೆಗೆ, ಆರ್ಥಿಕ ಬಿಕ್ಕಟ್ಟಿ ಜನರನ್ನು ಕಾಡಲಾರಂಭಿಸಿತ್ತು. ಪರಿಣಾಮ, 2025ರ ಸೆಪ್ಟೆಂಬರ್ನಲ್ಲಿ ಓಲಿ ಸರ್ಕಾರದ ವಿರುದ್ಧ ಯುವಜನರು ಬೀದಿಗಿಳಿದಿದ್ದರು. ಯುವಜನರ ಪ್ರತಿಭಟನೆ ಹಿಂಸಾಚಾರಕ್ಕೆ ತಿರುಕುತ್ತಿದ್ದಂತೆಯೇ, ಓಲಿ ರಾಜೀನಾಮೆ ನೀಡಿದರು. ಇದೀಗ, ಅವರು ಝಾಪಾ-5 ಕ್ಷೇತ್ರದಲ್ಲಿ ಸ್ಪರ್ಧಿಸಿದ್ದಾರೆ.
